ជាតិ
ស្លាប់-របួសជិត១០នាក់, ជនល្មើសត្រូវគេវាយស្ទើរស្លាប់៖ ជាការព្រមាន ឬបង្ហាញពីហិង្សា?
× ភ្នំពេញ៖ កាលពីល្ងាចថ្ងៃចន្ទកន្លងមកនេះ យុវជនម្នាក់បានបើកបររថយន្តបុកសម្លាប់មនុស្សបីនាក់ និងរបួស៦នាក់នៅក្បែរវិទ្យាល័យបឹងត្របែកក្នុងរាជធានីភ្នំពេញ។ នេះ គឺជាវិនាសកម្មក្នុងគ្រោះចរាចរណ៍ដ៏រន្ធត់មួយដែលផ្តាច់ជីវិតមនុស្សច្រើន របួសច្រើន ហើយអ្វីដែលរឹតតែរន្ធត់ទៀតនោះ គឺថា ជនល្មើសត្រូវបានពលរដ្ឋវាយដំស្ទើរបាត់បង់ជីវិត។ តើកំហឹងខាងលើបង្ហាញពីហិង្សារបស់ពលរដ្ឋ? បង្ហាញពីភាពគ្មានជំនឿលើប្រព័ន្ធតុលាការ? បង្ហាញពីការព្រមានចំពោះជនខិលខូច? បង្ហាញពីភាពខ្វះការពិចារណា ឬខ្វះចំណេះដឹងរបស់ពលរដ្ឋ?
គ្រោះថ្នាក់ចរាចរណ៍នៅកម្ពុជានិយាយជារួម នៅទីក្រុងភ្នំពេញនិយាយដោយឡែក កំពុងក្លាយទៅជាកង្វល់រួមរបស់មហាជន។ អ្នកធ្វើដំណើរនៅលើដងផ្លូវ ជាពិសេស អ្នកជិះកង់ ម៉ូតូ តែងតែភ័យព្រួយខ្លាច គេបុកឲ្យស្លាប់។
ជាក់ស្តែង គ្រោះថ្នាក់ដ៏រន្ធត់មួយបានកើតឡើងកាលពីថ្ងៃចន្ទកន្លងមក បានសម្លាប់មនុស្ស៣នាក់, បង្កឲ្យរបួស៦នាក់ និងបំផ្លាញសម្ភារអស់ជាច្រើន។ អ្នកបើកបរម៉ូតូទាំងឡាយមិនដឹងខ្លួនសោះ ស្រាប់តែជនល្មើសជិះឡាន មកបុកឲ្យស្លាប់តែម្តង។
ក្រោយបុកឲ្យមនុស្សស្លាប់ពេញផ្លូវរួចហើយ ជនល្មើសត្រូវបានពលរដ្ឋព្រួតគ្នាវាយស្ទើរបាត់បង់ជីវិត។
នៅក្នុងសាច់រឿងគ្រោះថ្នាក់ចរាចរណ៍នេះ ជនល្មើស គឺជាអ្នកបង្កហេតុពិតប្រាកដ ហើយជនល្មើសនេះ គឺជាអ្នកខុសទាំងស្រុងនៅចំពោះមុខច្បាប់។ នៅចំពោះមុខច្បាប់ លោក(ជនល្មើស)ត្រូវទទួលទោសដែលច្បាប់បានកំណត់។ ប៉ុន្តែ ក្រោយពេលដែលជនល្មើសបានបង្ករួចហើយ ស្រាប់តែពលរដ្ឋនាំគ្នាទៅវាយជនល្មើសដោយបង្កហិង្សាឲ្យរបួសស្នាមដល់ជនល្មើសទៅវិញ តើពលរដ្ឋមានកំហុសដែរឬទេ?
នេះជាសំណួរដែលមហាជនបាន និងកំពុងជជែកគ្នានៅគ្រប់ទីកន្លែងនៅក្នុងប្រទេសកម្ពុជា។ មតិទី១យល់ថា ពលរដ្ឋមិនគួរសងសឹកវាយដំជនល្មើសឡើយ ពោលគឺទុកឲ្យតុលាការជាអ្នកកាត់ទោសជនល្មើសទៅតាមផ្លូវច្បាប់ទៅចុះ។ ប្រសិនបើពលរដ្ឋប្រើហិង្សាទៅលើគាត់ដូច្នេះ ពេលនោះ ពលរដ្ឋក៏បង្កឲ្យមានកំហុសដែរ។
រីឯមតិទី២វិញ ពួកគេបានអត្ថាធិប្បាយថា ការវាយដំទៅលើជនល្មើសដែលបង្កគ្រោះថ្នាក់ឲ្យគេស្លាប់ និងរបួសជាច្រើននាក់ដូច្នេះ គឺជាការព្រមានចំពោះបុគ្គលដែលបើកបរផ្សេងទៀតមិនគោរពច្បាប់ ហើយចូលចិត្តមានបំណងបង្កគ្រោះថ្នាក់ដល់អ្នកដទៃ។ ការសងសឹកក្រៅប្រព័ន្ធតុលាការដូច្នេះ ក៏ជាការព្រមានដ៏មានប្រសិទ្ធភាពមួយដែរ បើទោះបីជាពួកគេដឹងថា ទង្វើសងសឹកក្រៅប្រព័ន្ធតុលាការនះ វាខុសច្បាប់ក៏ដោយ។
មតិផ្សេងទៀតបានបកស្រាយថា ការសងសឹកក្រៅប្រព័ន្ធតុលាការនេះ បង្ហាញថា ពលរដ្ឋខ្មែរនៅមានហិង្សាខ្លាំង ខ្វះការពិចារណាគ្រប់ជ្រុងជ្រោយ។ ម្យ៉ាងវិញទៀត វាក៏បង្ហាញផងដែរថា ពួកគេបាត់បង់ជំនឿមួយផ្នែកណាមួយនោះទៅលើប្រព័ន្ធតុលាការ ដូច្នេះហើយបានជាពួកគេចាត់ការដោយខ្លួនឯងតែម្តងទៅ។
បើទោះបីជាមតិខាងលើបង្កប់នូវទឡ្ហីករណ៍រៀងៗខ្លួនយ៉ាងណាក៏ដោយ តែជនដែលបង្កហិង្សា គួរគិតឲ្យបានវែងឆ្ងាយមុននឹងលើកដៃបង្កហិង្សាសងសឹក។ ទាំងជនល្មើស និងជនរងគ្រោះត្រូវប្រកាន់ទង្វើអហិង្សា។ អហិង្សា នាំមកនូវសេចក្តីសុខ៕
© រក្សាសិទ្ធិដោយ thmeythmey.com