អន្តរជាតិ
ត្រាំ បំផ្លាញគោលនយោបាយដោះស្រាយបញ្ហាប្រែប្រួលអាកាសធាតុរបស់អូបាម៉ា
× ប្រធានាធិបតីអាមេរិក ដូណាល់ ត្រាំ បានចុះហត្ថលេខាលើក្រឹត្យដើម្បីលុបចោលគោលនយោបាយថ្នាក់ជាតិសំដៅដោះស្រាយបញ្ហាប្រែប្រួលអាកាសធាតុតាមរយៈការបន្ថយការប្រើប្រាស់ថាមពលធ្យូងថ្មដែលដាក់ចេញដោយលោក បារ៉ាក់ អូបាម៉ា។ លោកប្រកាសថា «សង្គ្រាមប្រឆាំងធ្យូងថ្មចប់ហើយ» ហើយបទបញ្ញត្តិដែលបំផ្លាញការងារប្រជាជនអាមេរិកក៏លែងមានទៀតដែរ។
ដូចការសន្យាក្នុងពេលឃោសនា លោក ដូណាល់ ត្រាំ បានចេញក្រឹត្យមួយដើម្បីរំលាយចោលវិធានការជួយដោះស្រាយបញ្ហាប្រែប្រួលអាកាសធាតុពិភពលោកដែលជាមរតករបស់រដ្ឋបាលមុន។ ដូណាល់ ត្រាំ ប្រកាសប្រាប់គេឯងថា ចំណាត់ការរបស់លោកនឹងបង្កើតសករាជថ្មីសម្រាប់វិស័យថាមពើអាមេរិកនិងលើកស្ទួយការបង្កើតការងារសម្រាប់ប្រជាជនអាមេរិក។
យោងតាមសារព័ត៌មាន New York Times លោក ដូណាល់ ត្រាំ បានបញ្ជាក់ច្បាស់ថា អាមេរិកគ្មានឡើយការប្តេជ្ញាចិត្តក្នុងការបំពេញតាមគោលនយោបាយថ្នាក់ជាតិដែលរដ្ឋបាល លោកបារ៉ាក់ អូបាម៉ា បានរៀបចំឡើងដូចជាការកាត់បន្ថយការបញ្ចេញថាមពលកាបូនឌីអុកស៊ីតនិងបិទរោងចក្រធ្យូងថ្មជាដើមឡើយ។
ក្នុងពេលចុះហត្ថលេខាលើក្រឹត្យប្រធានាធិបតី លោក ដូណាល់ ត្រាំ បានបញ្ជាឲ្យអង្គភាពការពារបរិស្ថាន (EPA) ចាប់ផ្តើមនីតិវិធីដើម្បីដកនិងរៀបចំឡើងវិញរាល់បទបញ្ញត្តិស្តីពី «ផែនការថាមពលស្អាត»ដែលបង្កើតឡើងក្នុងអាណត្តិលោក បារ៉ាក់ អូបាម៉ា។ ផែនការនេះមានគោលដៅបិទចោលរោងចក្រថាមពលធ្យូងថ្មជាច្រើនកន្លែងនិងជំនួសមកវិញដោយការបង្កើតកសិដ្ឋានដែលផលិតថាមពលស្អាតករកើតឡើងវិញមានកង្ហារខ្យល់និងបន្ទះសូឡា។
ក្នុងពិធីចុះហត្ថលេខានេះ ប្រធានាធិបតីដែលចាត់ទុកការប្រែប្រួលអាកាសធាតុជារឿងបោកប្រាសនេះ បានប្រកាសពេញមាត់ថា «សង្គ្រាមប្រឆាំងធ្យូងថ្ម» ដល់ទីបញ្ចប់ចប់ ហើយបទបញ្ញតិ្តដែលបំផ្លាញការងារប្រជាជនអាមេរិកក៏លែងមានទៀតដែរ។ «ប្រជាជនទាំងអស់គ្នា អ្នកដឹងថា នេះជាអ្វីឬអត់? ហើយអ្នកដឹងទេថា វានិយាយពីអ្វីទេ? អ្នកទាំងអស់គ្នានឹងត្រឡប់ទៅធ្វើការងារក្នុងឧស្សាហកម្មធ្យូងថ្មវិញ»។ នេះជាសម្តីរបស់លោក ដូណាល់ ត្រាំ ។
បទបញ្ជារបស់ត្រំា ដែលបញ្ចប់ការប្រឹងប្រែងរបស់អាមេរិកដែលជាមហាអំណាចបំពុលពិភពលោកជាងគេលេខរៀងទី២ ក្នុងការចូលរួមដោះស្រាយបញ្ហាប្រែប្រួលអាកាសធាតុនេះ បានធ្វើឲ្យបណ្តាអ្នកការទូតទូទាំងពិភពលោកព្រួយបារម្ភខ្លាំង។ មកដល់ឥឡូវ គេនៅមិនទាន់ដឹងថា អាមេរិកនឹងដកខ្លួនចេញចេញពីកិច្ចព្រមព្រៀងអាកាសធាតុប៉ារីសទៀតឬយ៉ាងណាឡើយ ព្រោះដូណាល់ ត្រាំ មិនទាន់សម្រេចចិត្តជាផ្លូវការរឿងអាមេរិកចេញពីកិច្ចព្រមព្រៀងអាកាសធាតុក្រុងប៉ារីស នៅឡើយទេ។
តាមពិតទៅកិច្ចព្រមព្រៀងប្រែប្រួលអាកាសធាតុដែលគេសម្រេចបាននៅឆ្នាំ២០១៥នេះ មានគោលដៅចម្បងរក្សាការពារពិភពលោកពីការកើនកម្តៅច្រើនជាង ៣,៦ អង្សា ដែលតាមការវាយតម្លៃរបស់អ្នកវិទ្យាសាស្ត្រ កម្រិតនេះនឹងបង្កើតបញ្ហាធ្ងន់ធ្ងរជាពិសេសគ្រោះរាំងស្ងួត ទឹកជំនន់ ការកើនឡើងនៃកម្រិតនីវ៉ូទឹកសមុទ្រ និងគ្រោះទុរភិក្សកង្វះស្បៀងជាដើមនាពេលអនាគត។
ដូច្នេះហើយដើម្បីរួមចំណែកពន្យឺតការកើនឡើងកម្តៅនៃផែនដីនេះ លោក បារ៉ាក់ អូបាម៉ា បានប្តេជ្ញាចិត្តកាត់បន្ថយកម្រិតនៃការបញ្ចេញឧស្ម័នកាបូឌីអុកស៊ីតចន្លោះប្រហែល ២៦ ភាគរយពី ឆ្នាំ ២០១៥ ដល់ឆ្នាំ ២០២៥។ ដើម្បីសម្រេចបានតាមការកំណត់ អាមេរិកត្រូវអនុវត្តតាម «ផែនការថាមពលស្អាត»នេះឯង៕
Tag:
ដូណាល់ ត្រាំ
បារ៉ាក់ អូបាម៉ា
ប្រែប្រួលអាកាសធាតុ
© រក្សាសិទ្ធិដោយ thmeythmey.com