បក្សប្រឆាំង សង្ឃឹមថា នឹងលែងមានបញ្ហាជាមួយក្រសួងមហាផ្ទៃ

ជាតិ

បក្សប្រឆាំង សង្ឃឹមថា នឹងលែងមានបញ្ហាជាមួយក្រសួងមហាផ្ទៃ

04, Apr 2017 , 4:22 pm

រូបភាព

ដោយ: ម៉ៅ សុផា

ភ្នំពេញ៖ គណបក្សសង្គ្រោះជាតិ បានបញ្ជូនលិខិត ទៅកាន់ក្រសួងមហាផ្ទៃម្តងទៀត ដើម្បីបញ្ជាក់ថា ឯកឧត្តម កឹម សុខា នៅតែជាប្រធាន ហើយលោក ប៉ុល ហំម លោក អេង ឆៃអ៊ាង និងលោកស្រី មូរ សុខហួរ នៅតែជាអនុប្រធាន ដដែល។

គណបក្សសង្គ្រោះជាតិយល់ថា បញ្ហាដែលខ្លួនកំពុងប្រឈមជាមួយក្រសួងមហាផ្ទៃ អាចនឹងចប់ ពីព្រោះអ្វី ដែលខ្លួនបានធ្វើ គឺត្រឹមត្រូវទៅតាមលក្ខន្តិកៈរបស់គណបក្ស។ គណបក្សប្រឆាំងដ៏ធំមួយនេះនៅតែប្រកាន់ជំហរថា ការជ្រើសរើសឯកឧត្តម កឹម សុខា ឲ្យធ្វើជាប្រធាន ព្រមទាំងលោក ប៉ុល ហំម លោក អេង ឆៃអ៊ាង និងលោកស្រី មូរ សុខហួរ ជាអនុប្រធាន គឺមិនប្រាសចាកពីលក្ខន្តិកៈរបស់គណបក្សឡើយ។ ដោយប្រកាន់ជំហរបែបនេះ គណបក្សសង្គ្រោះជាតិ ក៏បានបើកកិច្ចប្រជុំមួយនៅក្នុងគណៈកម្មាធិការនាយក ដើម្បីអបអរសាទរសាជាថ្មី ចំពោះឯកឧត្តម កឹម សុខា លោក ប៉ុល ហំម លោក អេង ឆៃអ៊ាង និងលោកស្រី មូរ សុខហួរ។

លោក យ៉ែម បុញ្ញឫទ្ធិ អ្នកនាំពាក្យគណបក្សសង្គ្រោះជាតិ បានប្រាប់សារព័ត៌មានថ្មីៗថា ក្រោយបញ្ចប់កិច្ចប្រជុំខាងលើ គណបក្សសង្គ្រោះជាតិ បានដាក់លិខិតចំនួនពីរច្បាប់ ទៅកាន់ក្រសួងមហាផ្ទៃ នៅថ្ងៃទី៣ ខែមេសា ឆ្នាំ២០១៧។ លោក បញ្ជាក់ថា លិខិតទីមួយ គឺគណៈកម្មាធិការនាយកនៃគណបក្សសង្គ្រោះជាតិ បានអបអរសាទរម្តងទៀត ចំពោះ ឯកឧត្តម កឹម សុខា ដែលត្រូវបានជ្រើសរើសឲ្យធ្វើជាប្រធាន រួមទាំងលោក ប៉ុល ហំម លោក អេង ឆៃអ៊ាង និងលោកស្រី មូរ សុខហួរ ដែលត្រូវបានជ្រើសរើសឲ្យធ្វើជាអនុប្រធាន ហើយលិខិតទីពីរ គឺគណបក្សសង្គ្រោះជាតិ សម្រេចឈប់ប្រើពាក្យស្លោក «ដូរមេឃុំ បម្រើបក្ស ដាក់មេឃុំ បម្រើរាស្ត្រ»។

យ៉ាងណា រហូតមកដល់ពេលនេះ លោក យ៉ែម បុញ្ញឫទ្ធិ នៅមិនទាន់ទទួលបានការឆ្លើយតបពីក្រសួងមហាផ្ទៃនោះទេ ជុំវិញលិខិតខាងលើ។

នៅពេលដែលសួរថា បើគ្រាន់តែប្រជុំគណៈកម្មាធិការនាយក ហើយរក្សាទុកតំណែងជាប្រធានឲ្យឯកឧត្តម កឹម សុខា រួមទាំងតំណែងជាអនុប្រធានឲ្យលោក ប៉ុល ហំម លោក អេង ឆៃអ៊ាង និងលោកស្រី មូរ សុខហួរ ដដែល តើគណបក្សសង្គ្រោះជាតិ អាចនឹងមានបញ្ហាជាមួយនឹងក្រសួងមហាផ្ទៃ តទៅទៀតទេ? លោក យ៉ែម បុញ្ញឫទ្ធិ បានឆ្លើយយ៉ាងខ្លីថា៖«មិនមានបញ្ហាអ្វីទេ។ ហើយចំពោះប្រធាននិងអនុប្រធាន គឺគ្មានអ្វីប្រែប្រួលឡើយ»។

ជុំវិញបញ្ហានេះ លោក ខៀវ សុភ័គ អ្នកនាំពាក្យក្រសួងមហាផ្ទៃ បានអះអាងថា ក្រោយទទួលបានលិខិតទាំងពីរច្បាប់របស់គណបក្សសង្គ្រោះជាតិរួចហើយ លោកក៏បញ្ជូនលិខិតទាំងនោះទៅកាន់សម្តេច ស ខេង ដើម្បីសម្រេច។ លោកនិយាយថា ក្រសួងមហាផ្ទៃ មិនដែលលូកដៃចូលទៅក្នុងផ្ទៃក្នុងរបស់គណបក្សសង្គ្រោះជាតិ នោះទេ។ លោក បន្តថា ក្រសួងមហាផ្ទៃ គ្រាន់តែក្រើនរម្លឹកគណបក្សសង្គ្រោះជាតិ ឲ្យធ្វើតាមលក្ខន្តិកៈ ប៉ុណ្ណោះ។

សូមរម្លឹកថា ការរៀបចំសមាជវិសាមញ្ញរបស់គណបក្សសង្គ្រោះជាតិ កាលពីដើមខែមីនា ដើម្បីជ្រើសរើសប្រធាននិងអនុប្រធានថ្មី បានបន្សល់ទុកស្លាកស្នាម ដល់ក្រសួងមហាផ្ទៃ។ ក្រោយសិក្សារួច ក្រសួងមហាផ្ទៃ បានរកឃើញថា គណកប្សសង្គ្រោះជាតិ បានបំពានលក្ខន្តិកៈរបស់ខ្លួន ក្នុងការជ្រើសរើសប្រធាននិងអនុប្រធានថ្មី ។ យ៉ាងណាក្រសួងមហាផ្ទៃ មិនបានបញ្ជាក់ឬបញ្ជាថា ឲ្យគណបក្សសង្គ្រោះជាតិ ធ្វើបែបនេះ ឬធ្វើបែបនោះ ឡើយ។ អ្វីដែលដែលក្រសួងមហាផ្ទៃ លើកឡើងដដែលៗ គឺថាសូមឲ្យគណបក្សសង្គ្រោះជាតិ ធ្វើយ៉ាងឲ្យត្រឹមត្រូវតាមលក្ខន្តិកៈរបស់ខ្លួនឡើងវិញ ក្នុងការជ្រើសរើសប្រធាននិងអនុប្រធាន៕