ជាតិ
មេធាវីលោកគឹម សុខ ប្តឹងសាទុក្ខពីរ ទៅតុលាការកំពូល ដើម្បីប្រឆាំងតុលាការជាន់ទាប លោក ជូង ជូងី មេធាវីការពារក្តីឲ្យលោក គឹម សុខ
× ភ្នំពេញ៖ ក្រោយមិនបានទទួលលទ្ធផលជាវិជ្ជមាន នៅតុលាការជាន់ទាប មេធាវីរបស់លោក គឹម សុខ ក៏បន្តយកសំណុំរឿងទៅតវ៉ានៅតុលាការកំពូល។ មេធាវី បានដាក់បណ្តឹងសាទុក្ខចំនួនពីរ នៅតុលាការកំពូល ដើម្បីជំទាស់នឹងសេចក្តីសម្រេចរបស់តុលាការជាន់ទាប។
លោក គឹម សុខ អ្នកវិភាគនយោបាយ ដែលកំពុងជាប់ពន្ធនាគារ ដោយសារតែបណ្តឹងរបស់សម្តេច ហ៊ុន សែន នាយករដ្ឋមន្ត្រី និងជាប្រធានគណបក្សប្រជាជនកម្ពុជា បានប្រគល់សិទ្ធិជូនមេធាវី ឲ្យដាក់បណ្តឹងសាទុក្ខចំនួនពីរ ទៅកាន់តុលាការកំពូល ដើម្បីតវ៉ានឹងការសម្រេចរបស់សាលាដំបូងនិងសាលាឧទ្ធរណ៍ កន្លងមក។
លោក ជូង ជូងី មេធាវីរបស់លោកគឹម សុខ បានប្រាប់សារព័ត៌មានថ្មីៗ នៅថ្ងៃអង្គារនេះថា បណ្តឹងទីមួយ គឺសុំឲ្យដោះលែងលោក គឹម សុខ ជាបណ្តោះអាសន្ន ហើយបណ្តឹងទីពីរ គឺសុំឲ្យកោះហៅសម្តេច ហ៊ុន សែន ក្នុងនាមជាដើមចោទ ចូលខ្លួនទៅតទល់ជាមួយនឹងលោកគឹម សុខ នៅក្នុងតុលាការ។ លោក បន្តថា រហូតមកដល់ពេលនេះ តុលាការកំពូល មិនទាន់ផ្តល់ព័ត៌មានយ៉ាងណានោះទេ ពាក់ព័ន្ធនឹងបណ្តឹងទាំងពីរខាងលើ។
លោកមេធាវីរូបនេះ និយាយថា លោក មិនគិតពីលទ្ធផលនៃការតវ៉ាឡើយ។ ប៉ុន្តែ ក្នុងនាមជាមេធាវី លោក ត្រូវធ្វើអ្វី ឲ្យស្របទៅតាមនីតិវិធី ដែលកូនក្តីស្នើឡើង។ លោក បញ្ជាក់ដូច្នេះថា៖«ខ្ញុំមិនពិចារណាទេ ថារឿងហ្នឹងទៅរួចឬទៅមិនរួច។ អ្វីដែលខ្ញុំពិចារណា គឺពិចារណពីផ្លូវច្បាប់ ដែលខ្ញុំត្រូវធ្វើទៅតាមសំណើរបស់កូនក្តីខ្ញុំ។ ហើយការសម្រេចយ៉ាងណានោះ គឺជាឆន្ទានុសិទ្ធិរបស់ចៅក្រម»។
កន្លងមក លោក ជូង ជូងី បានដាក់បណ្តឹងទាំងពីរខាងលើ ទៅកាន់សាលាដំបូងរាជធានីភ្នំពេញ និងសាលាឧទ្ធរណ៍ រួចទៅហើយ។ ប៉ុន្តែ បណ្តឹងខាងលើ សុទ្ធតែត្រូវបានតុលាការទាំងពីរថ្នាក់នេះ ច្រានចោល។
ក្រោយទទួលបានបណ្តឹងពីលោក គី តិច មេធាវីរបស់សម្តេច ហ៊ុន សែន សាលាដំបូងរាជធានីភ្នំពេញ ក៏បានកោះហៅលោក គឹម សុខ ទៅសួរ កាលពីថ្ងៃទី១៧ ខែកុម្ភៈ ឆ្នាំ២០១៧។ បន្ទាប់ពីសួររួច សាលាដំបូងរាជធានីភ្នំពេញ ក៏យកលោកគឹម សុខ ទៅឃុំនៅពន្ធនាគារព្រៃស ក្នុងថ្ងៃនោះតែម្តង ដោយចោទពីបទ «ញុះញង់ឲ្យប្រព្រឹត្តបទឧក្រិដ្ឋជាអាទិ៍ និងបរិហារកេរ្តិ៍ជាសាធារណៈ»។
បើតាមលោក គី តិច មេធាវីរបស់សម្តេច ហ៊ុន សែន ការដាក់បណ្តឹងនេះ គឺដោយសារតែលោក គឹម សុខ និយាយថាគណបក្សប្រជាជនកម្ពុជា នៅពីក្រោយខ្នងនៃអំពើឃាតកម្មលើលោក កែម ឡី។ ក្នុងបណ្តឹងនេះ សម្តេច ហ៊ុន សែន ក្នុងនាមជាប្រធានគណបក្សប្រជាជនកម្ពុជា សុំទារសំណងជំងឺចិត្តពីលោក គឹម សុខ ចំនួន ៥០ម៉ឺនដុល្លារ៕
© រក្សាសិទ្ធិដោយ thmeythmey.com