ជាតិ
កំណាត់ផ្លូវជាតិលេខ៦ តម្លៃទឹកប្រាក់៧០លានដុល្លារ ត្រូវបានដាក់ឲ្យប្រើប្រាស់ជាផ្លូវការ
× ភ្នំពេញ៖ ប្រមុខរដ្ឋាភិបាលសម្ដេច ហ៊ុន សែន នៅព្រឹកថ្ងៃទី៦ មេសានេះ បានសម្ពោធដាក់ឲ្យប្រើប្រាស់កំណត់ផ្លូវជាតិលេខ៦ ដែលមានប្រវែង៤០គីឡូម៉ែត្រ ចាប់ពីសង្កាត់ព្រែកលៀប ខណ្ឌជ្រោយចង្វារ រាជធានីភ្នំពេញ ដល់ថ្នល់កែង ក្នុងឃុំសំបូរ ស្រុកបាធាយ ខេត្តកំពង់ចាម។
តាមរយៈការថ្លែងសន្ទរកថា របស់រដ្ឋមន្ត្រីក្រសួងសាធារណការ និងដឹកជញ្ជូនលោក ស៊ុន ចាន់ថុល បានឲ្យដឹងថា កំណាត់ផ្លូវជាតិលេខ៦នេះ ជាប្រភេទផ្លូវបេតុងកៅស៊ូ AC ស្តង់ដារផ្លូវកម្រិតទី១ តាមគំរូបទដ្ឋានបច្ចេកទេស នៃសាធារណរដ្ឋប្រជាមានិតចិន មានទទឹងសរុបប្រវែង ២៦ម៉ែត្រ ។ ចំណែកផ្លូវក្នុងក្រុងមានដាំបង្គោលអគ្គិសនីមួយជួរលើសួនកណ្តាលទ្រូងផ្លូវ និងមានលូបង្ហូរទឹកភ្លៀង។
បើតាមលោក ស៊ុន ចាន់ថុល កំណាត់ផ្លូវនេះ បានចំណាយថវិកាសាងសង់សរុប ៧០,២៥លានដុល្លារអាមេរិក ដែលក្នុងនោះជាហិរញ្ញប្បទានសម្បទាន ពីរដ្ឋាភិបាលចិន និងថវិកាបដិភាគ របស់រាជរដ្ឋាភិបាលកម្ពុជា សម្រាប់ដោះស្រាយផលប៉ះពាល់ និងបោសសម្អាតយុទ្ធភ័ណ្ឌមិនទាន់ផ្ទះ។ កំណាត់ផ្លូវជាតិលេខ៦នេះ បានចាប់ផ្ដើមសាងសងតាំងពីខែមករា ឆ្នាំ២០១២ រហូតដល់ដើមឆ្នាំ២០១៧ ដោយក្រុមហ៊ុនសំណង់ Shanghai Group និង ត្រួតពិនិត្យបច្ចេកទេស ដោយក្រុមហ៊ុនទីប្រឹក្សាបច្ចេកទេស Guangzhou Wanan (Guangzhou Wanan Construction Supervision Co.,Ltd.) របស់សាធារណរដ្ឋប្រជាមានិតចិន ។
កំណាត់ផ្លូវជាតិលេខ៦ នេះ មានប្រវែងសរុបជាង ៤០គីឡូម៉ែត្រ ចាប់ពីសង្កាត់ព្រែកលៀប ត្រង់ចំណុចគីឡូម៉ែត្រលេខ៦+០០៨ ខណ្ឌជ្រោយចង្វារ រាជធានីភ្នំពេញ ដល់ឃុំសំបូរ (ថ្នល់កែង) ត្រង់គីឡូម៉ែត្រលេខ៤៦+៥០០ ចំណុចបំបែកផ្លូវជាតិលេខ៦១ ស្ថិតក្នុងស្រុកបាធាយ ខេត្ដកំពង់ចាម។ កំណាត់ផ្លូវនេះ បានសាងសង់ស្ពានថ្មីចំនួន ២៦កន្លែង ប្រវែងសរុប ១,៣៧០ម៉ែត្រ សាងសង់លូគ្រប់ប្រភេទចំនួន ០៩កន្លែង ប្រវែងសរុប ២៣៨ម៉ែត្រ សង់ស្ពានរំលង ០១កន្លែង និងផ្លូវតភ្ជាប់ប្រវែង ១,០០០ម៉ែត្រ។នេះជាការបញ្ជាក់របស់លោក ស៊ុន ចាន់ថុល ដែលបានបន្ថែមថា កំណាត់ផ្លូវជាតិលេខ៦នេះ ជាចំណែកមួយជួយដល់ការរីកចម្រើនរបស់សេដ្ឋកិច្ចជាតិ និងគោលនយោបាយកាត់បន្ថយភាពក្រីក្រ របស់ប្រជាពលរដ្ឋ ហើយក៏ជួយសម្រួលដល់ចរាចរណ៍ឲ្យមានភាពងាយស្រួលជាងមុនផងដែរ៕
Tag:
ផ្លូវជាតិលេខ៦
កម្ពុជា
ចិន
© រក្សាសិទ្ធិដោយ thmeythmey.com