ក្រសួងមហាផ្ទៃជាតំណាងរដ្ឋដែលត្រួតពិនិត្យមើលដំណើរការរបស់អង្គការសមាគម និងគណបក្សនយោបាយផង តាមរយៈលក្ខន្តិកៈផ្ទៃក្នុងរបស់ស្ថាប័នទាំងនោះ។ នៅពេលការបោះឆ្នោតក្រុមប្រឹក្សាឃុំសង្កាត់ជិតមកដល់ គណបក្សប្រឆាំងដែលត្រូវរើសក្បាលម៉ាស៊ីនថ្មី ត្រូវក្រសួងមហាផ្ទៃប្រាប់ម្តងហើយម្តងទៀតថា ខ្លួនចេះតែធ្វើខុសលក្ខន្តិកៈ។ គណបក្សសង្គ្រោះជាតិវិញមិនជឿថា គ្មានសមត្ថភាពរហូតដល់ធ្វើលក្ខន្តិកៈមិនច្បាស់លាស់នោះដែរ។
ក្រោយការលាលែងរបស់លោក សម រង្ស៊ី ( ១១កុម្ភៈ២០១៧) គណបក្សសង្គ្រោះជាតិ ក៏បានរៀបចំសមាជវិសាមញ្ញ ដើម្បីជ្រើសរើសប្រធាននិងអនុប្រធានថ្មី។ អង្គសមាជវិសាមញ្ញ ដែលរៀបចំឡើងកាលពីថ្ងៃទី២ ខែមីនា ឆ្នាំ២០១៧ បានជ្រើសរើសឯកឧត្តម កឹម សុខា ឲ្យធ្វើប្រធានគណបក្សសង្គ្រោះជាតិ ហើយលោក ប៉ុល ហំម លោក អេង ឆៃអ៊ាង និងលោកស្រី មូរ សុខហូរ ជាអនុប្រធាន។
បន្ទាប់ពីធ្វើសមាជវិសាមញ្ញ ដើម្បីរៀបចំរចនាសម្ព័ន្ធថ្មីនៃថ្នាក់ដឹកនាំរួចមក គណបក្សសង្គ្រោះជាតិ ចាប់ផ្តើមមានបញ្ហាជាបន្តបន្ទាប់ជាមួយនឹងក្រសួងមហាផ្ទៃ ។
បញ្ហាដំបូង គឺក្រសួងមហាផ្ទៃ មិនព្រមទទួលស្គាល់ភាពស្របច្បាប់របស់ប្រធាននិងអនុប្រធានថ្មីនៃគណបក្សសង្គ្រោះជាតិ។ ក្រសួងមហាផ្ទៃ លើកហេតុផលថា ការជ្រើសរើសប្រធាននិងអនុប្រធានថ្មីនៃគណបក្សសង្គ្រោះជាតិ គឺមិនត្រឹមត្រូវតាមប្រការ៤៧ (ថ្មី) នៃលក្ខន្តិកៈរបស់គណបក្សខ្លួនឯង។
ប្រការ៤៧ (ថ្មី) ដែលកើតចេញពីប្រការ៤៧ (ចាស់) តាមរយៈការធ្វើវិសោធកម្មនៅក្នុងអង្គសមាជវិសាមញ្ញនោះ បានចែងថា៖«ករណីប្រធានគណបក្ស ទទួលមរណភាព លាឈប់ បាត់បង់សមាជិកភាព ឬបាត់បង់សមត្ថភាពដឹកនាំគណបក្ស ដែលបញ្ជាក់ដោយគណៈកម្មាធិការនាយក បើ៖
- ចំណុច១៖ អាណត្តិនៅតិចជាង១៨ខែ អនុប្រធានគណបក្សមួយរូប ដែលមានអាយុច្រើនជាងគេ ត្រូវទទួលនាទីជាប្រធានគណបក្ស ហើយបើគ្មានអនុប្រធានគណបក្ស គណៈកម្មាធិការនាយក ត្រូវជ្រើសរើសអនុប្រធានគណបក្សថ្មីយ៉ាងតិចមួយរូប ក្នុងរយៈពេល៣០ថ្ងៃយ៉ាងយូរ ពីក្នុងចំណោមសមាជិករបស់ខ្លួន ដោយសំឡេងភាគច្រើនដាច់ខាត (៥០%+១) នៃសមាជិកគណៈកម្មាធិការនាយកទាំងមូល ដើម្បីជួយសម្រួលការងារប្រធានគណបក្ស រហូតដល់ចប់អាណត្តិ ។
- ចំណុច២៖ អាណត្តិនៅលើស១៨ខែ គណៈកម្មាធិការអចិន្ត្រៃយ៍ ត្រូវកំណត់ពេលរៀបចំធ្វើសមាជវិសាមញ្ញ ដើម្បីជ្រើសរើសប្រធានគណបក្ស និងអនុប្រធានគណបក្សថ្មី ក្នុងរយៈពេលយ៉ាងយូរ៣០ថ្ងៃ ដើម្បីដឹកនាំគណបក្សរហូតដល់ចប់អាណត្តិ»។
កំហុសដំបូងរបស់គណបក្សសង្គ្រោះជាតិ ដែលក្រសួងមហាផ្ទៃបានមើលឃើញ គឺទាក់ទងនឹងចំណុចទី២នៃប្រការ៤៧ថ្មី នៃលក្ខន្តិកៈរបស់គណបក្សប្រឆាំងនេះ។ បើតាមក្រសួងមហាផ្ទៃ បើគិតចាប់ពីថ្ងៃដែលឯកឧត្តម សម រង្ស៊ី លាលែងពីតំណែងរហូតដល់ថ្ងៃចប់អាណត្តិនោះ មានរយៈពេលតែ១៤ខែប៉ុណ្ណោះ។ ប៉ុន្តែគណបក្សសង្គ្រោះជាតិ បានប្រើចំណុចទី២នៃប្រការ៤៧ថ្មីនៃលក្ខន្តិកៈ ដែលចែងអំពីអាណត្តិអវត្តមានប្រធានគណបក្សលើស១៨ខែទៅវិញ ដើម្បីរៀបចំសមាជវិសាមញ្ញរើសក្បាលម៉ាស៊ីនថ្មី។
ក្រោយពីក្រសួងមហាផ្ទៃបកស្រាយបែបនេះហើយ គណបក្សសង្គ្រោះជាតិ ក៏ត្រឡប់ទៅអនុវត្តតាមខ្លឹមសារក្នុងចំណុច១នៃប្រការ៤៧ (ថ្មី) វិញម្តង។ ចំណុចទី១នៃប្រការ ៤៧ (ថ្មី) បានចែងយ៉ាងច្បាស់ថា នៅពេលគណបក្សសង្គ្រោះជាតិមិនមានប្រធាន នោះអនុប្រធានដែលមានអាយុច្រើនជាងគេត្រូវទទួលតំណែងជាប្រធាន រហូតដល់ចប់អាណត្តិ។ ដោយអនុវត្តចំណុចទី១នេះដដែល គណបក្សសង្គ្រោះជាតិ ក៏បានបើកកិច្ចប្រជុំក្នុងគណៈកម្មាធិការនាយក កាលពីថ្ងៃទី២ ខែមេសា ឆ្នាំ២០១៧ ដើម្បីជ្រើសរើសអនុប្រធានគណបក្ស ហើយក៏បានអបអរសាទរប្រធាននិងអនុប្រធានម្តងទៀត។ ប៉ុន្តែ បញ្ហានៅមិនទាន់ចប់ទេ។
ក្រសួងមហាផ្ទៃ បានប្រកាសទទួលស្គាល់ឯកឧត្តម កឹម សុខា ជាប្រធានគណបក្សសង្គ្រោះជាតិ តែបានបដិសេធ និងមិនព្រមទទួលស្គាល់លោក ប៉ុល ហំម លោក អេង ឆៃអ៊ាង និងលោកស្រី មូរ សុខហួរ ជាអនុប្រធានគណបក្សឡើយ។ ដោយយោងលើចំណុច១នៃប្រការ៤៧នៃលក្ខន្តិកៈបក្សសង្គ្រោះជាតិដដែល ក្រសួងមហាផ្ទៃបានចង្អុលបង្ហាញថ្នាក់ដឹកនាំគណបក្សសង្គ្រោះជាតិថា ចំណុច១នៃប្រការ៤៧ថ្មីនេះ អនុញ្ញាតឲ្យមានការជ្រើសរើសអនុប្រធានគណបក្សក្នុងរយៈពេល៣០ថ្ងៃយ៉ាងយូរ។ ក្រសួងមហាផ្ទៃបន្តបញ្ជាក់ថា ការជ្រើសរើសអនុប្រធានគណបក្សសង្គ្រោះជាតិនៅថ្ងៃទី២ខែមេសានោះ មានរយៈពេលដល់៥០ថ្ងៃ បើគិតពីថ្ងៃដែលឯកឧត្តម សម រង្ស៊ី លាលែងពីតំណែង។
ក្នុងកាលៈទេសៈនេះ គណបក្សសង្គ្រោះជាតិ ហាក់ទាល់ច្រក នៅពេលដែលក្រសួងមហាផ្ទៃ មិនព្រមទទួលស្គាល់អនុប្រធានទាំងបីរូប។ ដោយមិនចង់ឲ្យមានបញ្ហាកើតមានតទៅទៀត គណបក្សសង្គ្រោះជាតិ ចង់ឲ្យក្រសួងមហាផ្ទៃ ប្រាប់ខ្លួនឲ្យត្រង់ៗនិងច្បាស់លាស់តែម្តង ថាត្រូវធ្វើដូចម្តេច? ក្រសួងមហាផ្ទៃ បានអះអាងថា ខ្លួនមិនមានសិទ្ធិបញ្ជាឲ្យគណបក្សសង្គ្រោះជាតិធ្វើបែបនេះ ឬធ្វើបែបនោះឡើយ។
ទោះយ៉ាងណាក៏ដោយ គណបក្សសង្គ្រោះជាតិក៏មិនអាចនៅស្ងៀមគ្មានអនុប្រធានដែរ។ គណបក្សប្រឆាំងដែលបានពុះពារឆ្លងកាត់ព្យុះភ្លៀងឡើងល្វើយហើយនោះ គ្មានជម្រើសអ្វីក្រៅពីព្យាយាមប្រមូលគំនិតអនុវត្តនីតិវិធីរើសអនុប្រធានរហូតដល់ត្រូវនោះឡើយ៕