សង្គ្រោះជាតិ នឹងរៀបចំអនុប្រធានទាំងបីរូបម្តងទៀត ដើម្បីឲ្យត្រូវតាមលក្ខន្តិកៈ

ជាតិ

សង្គ្រោះជាតិ នឹងរៀបចំអនុប្រធានទាំងបីរូបម្តងទៀត ដើម្បីឲ្យត្រូវតាមលក្ខន្តិកៈ

10, Apr 2017 , 1:56 pm

រូបភាព

ដោយ: ម៉ៅ សុផា

ភ្នំពេញ៖ បក្សប្រឆាំង ត្រូវដោះស្រាយបញ្ហាផ្ទៃក្នុងរបស់ខ្លួនម្តងទៀត ទាក់ទងនឹងអនុប្រធានទាំងបីរូប ដែលក្រសួងមហាផ្ទៃ មិនព្រមទទួលស្គាល់ចំនួនពីរលើក កន្លងមក។ បក្សប្រឆាំង សង្ឃឹមថា ដំណោះស្រាយលើកចុងក្រោយនេះ នឹងអាចរួចផុតពីបញ្ហា ដែលកំពុងតែប្រឈមជាមួយក្រសួងមហាផ្ទៃ។

លោក យ៉ែម បុញ្ញឫទ្ធិ អ្នកនាំពាក្យគណបក្សសង្គ្រោះជាតិ បានប្រាប់សារព័ត៌មានថ្មីៗ នៅថ្ងៃចន្ទនេះថា គណបក្សសង្គ្រោះជាតិ នឹងគិតគូរឡើងវិញចំពោះបញ្ហាអនុប្រធានទាំងបីរូប ដែលក្រសួងមហាផ្ទៃ មិនទាន់ទទួលស្គាល់ពីភាពស្របច្បាប់។ លោក អះអាងថា មុននឹងដោះស្រាយបញ្ហានេះឡើងវិញ គណបក្សសង្គ្រោះជាតិ ត្រូវសិក្សាឲ្យបានល្អិតល្អន់ ពីលក្ខន្តិកៈរបស់ខ្លួន និងច្បាប់ស្តីពី គណបក្សនយោបាយ ដើម្បីធ្វើយ៉ាងណាកុំឲ្យមានកំហុសឆ្គង កើតឡើងម្តងទៀត។

បើតាមលោក យ៉ែម បុញ្ញឫទ្ធិ ដដែល លោក ប៉ុល ហំម លោក អេង ឆៃអ៊ាង និងលោកស្រី មូរ សុខហួរ ដែលបច្ចុប្បន្ន ជាអនុប្រធានគណបក្សសង្គ្រោះជាតិ នឹងមិនត្រូវផ្តាស់ប្តូរ នោះទេ។ ប៉ុន្តែ អ្វីដែលលោក សង្កត់នោះ គឺគណបក្សសង្គ្រោះជាតិ គ្រាន់តែចង់សម្របសម្រួលផ្នែកនីតិវិធីឡើងវិញប៉ុណ្ណោះ ដើម្បីធ្វើឲ្យអ្នកទាំង ៣ រូបនោះ ក្លាយជាអនុប្រធាន ដោយស្របទៅតាមលក្ខន្តិកៈ។ អ្នកនាំពាក្យបក្សប្រឆាំងរូបនេះ បានបញ្ជាក់ដូច្នេះថា៖«បេក្ខភាព គឺនៅដដែលទេ។ តែអ្វីដែលយើងត្រូវគិត គឺគិតពីនិតីវិធី ដោយធ្វើយ៉ាងណាឲ្យត្រូវទៅតាមលក្ខន្តិកៈ»។

លោក យ៉ែម បុញ្ញឫទ្ធិ និយាយទៀតថា បញ្ហាខាងលើនេះ នឹងត្រូវដោះស្រាយ នៅពេលឯកឧត្តម កឹម សុខា ប្រធានគណបក្សសង្គ្រោះជាតិ ដែលកំពុងបំពេញបេសកកម្មនៅឯបរទេស វិលមកប្រទេសកម្ពុជាវិញ នៅថ្ងៃទី១៩ ខែមេសា ឆ្នាំ២០១៧ ខាងមុខ។

បន្ទាប់ពីការលាលែងរបស់លោក សម រង្ស៊ី ឯកឧត្តម កឹម សុខា ក៏ត្រូវបានជ្រើសរើសឲ្យធ្វើជាប្រធានគណបក្សសង្គ្រោះជាតិ ហើយលោក ប៉ុល ហំម លោក អេង ឆៃអ៊ាង និងលោកស្រី មូរ សុខហួរ ត្រូវបានជ្រើសរើសឲ្យធ្វើជាអនុប្រធាន នៅក្នុងអង្គសមាជវិសាមញ្ញ កាលពីថ្ងៃទី២ ខែមីនា ឆ្នាំ២០១៧។ ការរៀបចំរចនាសម្ព័ន្ធនៃថ្នាក់ដឹកនាំនេះ ត្រូវបានក្រសួងមហាផ្ទៃ អះអាងថា គណបក្សសង្គ្រោះជាតិ ធ្វើខុសទៅនឹងលក្ខន្តិកៈរបស់ខ្លួនឯង។

ក្រោយមក គណបក្សសង្គ្រោះជាតិ ក៏សម្រេចបើកកិច្ចប្រជុំមួយ នៅក្នុងគណៈកម្មាធិការនាយក ដើម្បីអបអរសាទរប្រធាននិងអនុប្រធាន ម្តងទៀត។ ការធ្វើបែបនេះ បានផ្តល់ផលវិជ្ជមាន ចំពោះឯកឧត្តម កឹម សុខា ដែលត្រូវបានក្រសួងមហាផ្ទៃ ប្រកាសទទួលស្គាល់ជាប្រធានគណបក្សសង្គ្រោះជាតិ។ ប៉ុន្តែ ក្រសួងមហាផ្ទៃ នៅតែយល់ថា ការជ្រើសរើសអនុប្រធានគណបក្សសង្គ្រោះជាតិ មិនទាន់ត្រូវទៅតាមលក្ខន្តិកៈ នោះទេ។

គណបក្សសង្គ្រោះជាតិ ចង់ឲ្យក្រសួងមហាផ្ទៃ ប្រាប់ឲ្យត្រង់ៗនិងច្បាស់លាស់តែម្តង ថា ចង់ឲ្យខ្លួនធ្វើដូចម្តេច ដើម្បីកុំឲ្យមានបញ្ហាបន្តទៀត។ ជាការឆ្លើយតប ក្រសួងមហាផ្ទៃ អះអាងថា មិនមានសិទ្ធិទៅបញ្ជាគណបក្សសង្គ្រោះជាតិ ឲ្យធ្វើបែបនេះ ឬធ្វើបែបនោះ ឡើយ។ ក្រសួងមហាផ្ទៃ បានត្រឹមតែលើកឡើងដដែលៗ ថា គណបក្សសង្គ្រោះជាតិ ត្រូវធ្វើយ៉ាងណា ដើម្បីឲ្យត្រូវទៅតាមលក្ខន្តិកៈ ក្នុងការជ្រើសរើសអនុប្រធានរបស់ខ្លួន៕