វត្តមានល្ខោនខោល នៅអង្គរសង្ក្រាន្ត ធ្វើឲ្យសិល្បករត្រេកអរ និងប្តេជ្ញាសម្តែងឲ្យល្អ

ជាតិ

បទយកការណ៍ / បទសម្ភាសន៍

វត្តមានល្ខោនខោល នៅអង្គរសង្ក្រាន្ត ធ្វើឲ្យសិល្បករត្រេកអរ និងប្តេជ្ញាសម្តែងឲ្យល្អ

15, Apr 2017 , 8:00 pm

រូបភាព

លោក ខុន ចន្ទ័ស៊ីណា លោក សួរ គឹមសេង និងលោក ខុន ចន្ទ័សិទ្ធិការ្យ

ដោយ: ញឹក ស្រីល័ក្ខ (Nhek Sreyleak)

ភ្នំពេញ៖ ព្រឹត្តិការណ៍អង្គរសង្ក្រាន្តឆ្នាំ២០១៧នេះ មានសម្ដែងជូនភ្ញៀវជាតិ និងអន្តរជាតិទស្សនា មួយថ្ងៃ ២ លើក នាបរិវេណភូមិខ្ញុំ។ ក្រុមយុវជនល្ខោនខោលកម្ពុជា លើកយកឈុតឆាកចំនួនពីរ គឺឈុត សុវណ្ណមច្ចា និងឈុត ចៅស៊ីផាន់ (យក្សកាត់មាន់)សម្រាប់ព្រឹត្តិការណ៍នេះ។ នៅពេលល្ខោនខោលមានវត្តមានក្នុងព្រឹត្តិការណ៍អង្គរសង្ក្រាន្ត សិល្បករល្ខោនខោល សុទ្ធតែសប្បាយរីករាយ និងខិតខំហ្វឹកហាត់អស់ពីកម្លាំងកាយ ចិត្ត ដើម្បីបង្ហាញពីភាពរស់រវើក និងភាពអស្ចារ្យ នៃល្ខោនខោលខ្មែរ។

ដើម្បីឲ្យការសម្ដែងល្ខោនខោលទ្រង់ទ្រាយធំ រយៈពេល៣ថ្ងៃ នាព្រឹត្តិការណ៍អង្គរសង្ក្រាន្ត បានល្អអស្ចារ្យ សិល្បករទាំងអស់ បានខិតខំប្រឹងប្រែងហ្វឹកហាត់ សម្តែងយ៉ាងកំពុងហាត់សមយ៉ាងយកចិត្តទុកដាក់។ សិល្បករទាំងអស់ បានចំណាយពេលកន្លះខែ ក្នុងការហ្វឹកហាត់ត្រង់ឈុត សុវណ្ណមច្ចា និងឈុត ចៅស៊ីផាន់ (យក្សកាត់មាន់) ដែលត្រូវលើកយកទៅសម្ដែងជូនភ្ញៀវទេសចរជាតិ និងអន្តរជាតិ។ ការហ្វឹកហាត់នេះ ធ្វើឡើងយ៉ាងក្លៀវក្លា នៅក្នុងសាលាមធ្យមវិចិត្រសិល្បៈ។ ជាការហ្វឹកហាត់ ដែលពោរពេញទៅដោយសមត្ថភាព និងទេពកោសល្យ។

កំពុងអង្គុយពោលឃ្លា និងទស្សនាការហាត់សមផង លោក ខុន ចន្ទ័សិទ្ធិការ្យ ប្រធានក្រុមយុវជនល្ខោនខោលកម្ពុជា បានបង្ហាញភាពសប្បាយរីករាយ ដែលក្រុមការងាររៀបចំព្រឹត្តិការណ៍អង្គរសង្ក្រាន្តបានជ្រើសរើសក្រុមខ្លួន សម្រាប់ការសម្តែងល្ខោនខោល។ លោក ខុន ចន្ទ័សិទ្ធិការ្យ អះអាថា ក្រុមយុវជនល្ខោនខោល បានត្រៀមខ្លួចរួចរាល់ហើយ រួមទាំងបច្ចេកទេស ទាំងស្នាដៃ និងការហាត់សមសម្រាប់សម្ដែងឲ្យល្អជូនទស្សនិកជនទស្សនា បន្ទាប់ពីហាត់សមកន្លះខែរួចមក។

ប្រធានក្រុមយុវជនល្ខោនខោលកម្ពុជារូបនេះ ជឿជាក់ថា ការខិតខំប្រឹងប្រែងហ្វឹកហាត់របស់សិល្បករ នឹងនាំយកនូវភាពភាពអស្ចារ្យនៃល្ខោនខោលខ្មែរ សម្រាប់ភ្ញៀវទេសចរជាតិ និងអន្តរជាតិ។ ក្នុងព្រឹត្តិការណ៍អង្គរសង្ក្រាន្តនេះ ក្រុមយុវជនល្ខោនខោលកម្ពុជា នឹងលើកយកទស្សនីយភាពល្ខោនខោល ឈុត សុវណ្ណមច្ចា និងឈុត ចៅស៊ីផាន់ (យក្សកាត់មាន់) ទៅសម្ដែងជូនទស្សនិកជន។ ការសម្តែង នឹងធ្វើឡើង២ដង ក្នុងមួយថ្ងៃ នាបរិវេណភូមិខ្ញុំ។

នេះជាឆ្នាំទី១ ដែលក្រុមយុវជនល្ខោនខោលកម្ពុជា មានឱកាសទៅសម្ដែងក្នុងព្រឹត្តិការណ៍អង្គរសង្ក្រាន្ត។ លោក សួរ គឹមសេង ជាសិល្បករ ក៏រីករាយដែរ ចំពោះការសម្តែងល្ខោនខោល ក្នុងព្រឹត្តិការណ៍អង្គរសង្ក្រាន្តនេះ។ លោក សួរ គឹមសេង ដែលជាសាស្ត្រាចារ្យល្ខោនខោលនៅសាលាមធ្យមវិចិត្រសិល្បៈផង បញ្ជាក់ដូច្នេះថា៖ «ខ្ញុំសប្បាយចិត្តមែនទែន ដែលសិល្បៈគ្រប់ទម្រង់មានវត្តមាន ក្នុងព្រឹត្តិការណ៍អង្គរសង្ក្រាន្ត ជាពិសេសល្ខោនខោល។ ពួកខ្ញុំបានត្រៀមខ្លួនរួចហើយ ដើម្បីសម្ដែងឲ្យបានល្អ»។

ទោះជាការសម្ដែងលើឆាកមានរយៈពេលតែ ១៥នាទី ក៏ដោយ ប៉ុន្តែសិល្បករទាំងអស់ ត្រូវចំណាយពេល ១៥ថ្ងៃ ដើម្បីហាត់សមការសម្ដែងនេះ និងចំណាយពេល២ម៉ោង ក្នុង១ថ្ងៃ ដើម្បីហាត់សមឲ្យខ្លាំង និងរស់រវើក។

មិនខុសគ្នាពីសិល្បករខាងលើនោះទេ សម្រាប់លោក ខុន ចន្ទ័ស៊ីណា ជាក៏សិល្បករល្ខោនខោលរូប ដែលកំពុងហាត់សម ដើម្បីចូលរួមសម្ដែងក្នុងព្រឹត្តិការណ៍អង្គរសង្ក្រាន្តផងដែរ។ បន្ថែមពីនេះ លោក ខុន ចន្ទ័ស៊ីណា ជឿថាវត្តមានក្នុងព្រឹត្តិការណ៍ដ៏ធំមួយនេះ នឹងបង្កើនការយល់ដឹងដល់ប្រជាពលរដ្ឋកម្ពុជា និងជាឱកាសបង្ហាញទៅភ្ញៀវទេសអន្តរជាតិ ឲ្យបានស្គាល់ច្បាស់ពីទម្រង់សិល្បៈល្ខោនខោលខ្មែរ។

គួរបញ្ជាក់ថា ល្ខោនខោល ឬល្ខោនពាក់របាំងមុខ គឺជាល្ខោនមួយដែលមានអាយុកាលចំណាស់តាំងពីមុនសម័យអង្គរ ក្នុងសតវត្សទី៩ តាមរយៈចម្លាក់លឹបក្នុងតាមជញ្ជាំងប្រាសាទអង្គរ។ តួសម្ដែង សុទ្ធសឹងតែជាបុរស ដែលតែងតួជានារី។ ភាគច្រើនល្ខោនខោល មានការសម្ដែងតែក្នុងព្រះបរមរាជវាំង និងក្នុងកម្មវិធីធំៗរបស់ជាតិប៉ុណ្ណោះ៕