កីឡាជាតិ
ជាតិ
គ្រូបង្វឹកជម្រើសជាតិកម្ពុជា លោក Vitorino នឹងបន្តចុះចែករំលែកបទពិសោធន៍នៅតាមក្លិបក្នុងលីកកំពូល
× គ្រូបង្វឹកក្រុមជម្រើសជាតិកម្ពុជាលោក Leonardo Vitorino និងក្រុមការងារនឹងចុះទៅចែករំលែកបទពិសោធន៍នៅតាមបណ្តាក្លិបទាំងអស់ក្នុងក្របខណ្ឌលីកកំពូលកម្ពុជា ដើម្បីជួយអភិវឌ្ឍន៍វិស័យកីឡាបាល់ទាត់កម្ពុជាឲ្យមានការរីកចម្រើន រួមទាំងក្រុមជ្រើសជាតិផងដែរ។ គ្រូបង្វឹករូបនេះសង្កត់ធ្ងន់ថា ក្រុមជម្រើសជាតិកម្ពុជាអាចរីកចម្រើនបានវាអាស្រ័យទៅលើក្លិបនីមួយៗ។
នៅក្នុងកិច្ចប្រជុំជាមួយថ្នាក់ដឹកនាំក្លិបដែលប្រកបអាជីពក្នុងក្របខណ្ឌលីកកំពូលកម្ពុជាកាលពីថ្ងៃទី១១ ខែមេសា លោក Leonardo Vitorino គ្រូបង្វឹកក្រុមជម្រើសជាតិកម្ពុជាបានប្រកាសថា លោក និងក្រុមការងារនឹងចុះទៅពង្រឹងការហ្វឹកហាត់នៅតាមក្លិបឲ្យមានស្តង់ដារដូចបណ្តាប្រទេសនៅតាមតំបន់អឺរ៉ុប។ លោកបញ្ជាក់ថា ការងារនេះអាចសម្រេចទៅបាន លុះត្រាមានការចូលរួមសហការពីបណ្តាក្លិបនីមួយៗ។ នេះបើយោងតាមលោក ម៉ែន ពិសិដ្ឋ អគ្គលេខាធិការក្លិបបាល់ទាត់អាស៊ីអឺរ៉ុប។
ការចុះទៅចែករំលែកបទពិសោធន៍ ក៏ដូចជាពង្រឹងដោយផ្ទាល់នៅតាមបណ្តាក្លិបនេះ ក្នុងគោលបំណងដើម្បីជួយពង្រឹងការហ្វឹកហាត់របស់ក្លិបនីមួយៗឲ្យមានស្តង់ដារដូចបណ្តាប្រទេសក្នុងតំបន់អាស៊ី និងអឺរ៉ុប។ លើសពីនេះ ដើម្បីជួយអភិវឌ្ឍន៍វិស័យកីឡាបាល់ទាត់ និងក្រុមជម្រើសជាតិកម្ពុជាឲ្យកាន់តែមានការរីកចម្រើន។ គ្រូបង្វឹកក្រុមជម្រើសជាតិរូបនេះសង្កត់ធ្ងន់ថា ក្រុមជម្រើសជាតិអាចរីកចម្រើនទៅបានលុះត្រាតែក្លិបនីមួយៗរីកចម្រើសជាមុនសិន។
គួរបញ្ជាក់ថា លោក Leonardo Vitorino គ្រូបង្វឹកក្រុមជម្រើសជាតិកម្ពុជា រួមជាមួយគ្រូបង្វឹក ថ្នាក់ដឹកនាំក្លិបក្នុងក្របខណ្ឌលីកកំពូលកម្ពុជាបានជួបប្រជុំគ្នាបែបសង្កាត់មួយកាលពីម្សិលមិញនៅវិមានពហុកីឡដ្ឋានជាតិ។ ការប្រជុំនេះ ក្នុងគោលបំណង ស្វែងរកដំណោះស្រាយ និងគន្លឹះសំខាន់ៗ ដើម្បីជួយអភិវឌ្ឍន៍វិស័យកីឡាបាល់ទាត់កម្ពុជាឲ្យមានការរីកចម្រើនមួយកម្រិតទៀត លើការរីកចម្រើននាពេលបច្ចុប្បន្ន។
ជាមួយគ្នានេះ លោក ម៉ែន ពិសិដ្ឋ អគ្គលេខាធិការក្លិបបាល់ទាត់អាស៊ីអឺរ៉ុប បានចាត់ទុកការជួបប្រជុំនេះជាសញ្ញាមួយដ៏ល្អសម្រាប់វិស័យកីឡាបាល់ទាត់កម្ពុជាក្នុងការឈានឆ្ពោះទៅរកភាពរីកចម្រើន។ លើសពីនេះ លោក បានចាត់ទុកការជួបប្រជុំលើកដំបូងក្នុងវិស័យកីឡាបាល់ទាត់កម្ពុជានេះថា ជាការជួបជុំមួយដ៏ល្អ ព្រោះគ្រូទាំងអស់ទទួលបានបទពិសោធន៍ និងការបកស្រាយចម្ងល់របស់ខ្លួនពីសំណាក់គ្រូបង្វឹកមកពីទ្វីបអាមេរិករូបនេះ៕
Tag:
បាល់ទាត់
Vitorino
ម៉ែន ពិសិដ្ឋ
© រក្សាសិទ្ធិដោយ thmeythmey.com