កីឡាជាតិ
ជាតិ
ញ៉ែម បូរ៉ា និងស្រ៊ាង សុរ៉ាឃីម បានមេដាយប្រាក់ប៉េតង់ពិភពលោកពីបែលហ្ស៊ិកលើវិញ្ញាសាវាយគូចម្រុះ កីឡាករ ញ៉ែម បូរ៉ា និងកីឡាការិនី ស្រ៊ាង សុរ៉ាឃីម បានទទួលមេដាយប្រាក់លើវិញ្ញាសាវាយគូចម្រុះ។ ប្រភពរូបថត៖ Hun Samuth
× កីឡាករ ញ៉ែម បូរ៉ា និងកីឡាការិនី ស្រ៊ាង សុរ៉ាឃីម បានទទួលមេដាយប្រាក់លើវិញ្ញាសាវាយគូចម្រុះ (Doubles Mixed) ពីព្រឹត្តិការណ៍ប្រកួតកីឡាប៉េតង់លំដាប់ពិភពលោក World Championship Petanque 2017 នៅទីក្រុង Ghent ប្រទេសបែលហ្ស៊ិក។ បូរ៉ា និងសុរ៉ាឃីម ដែលទើបតែទទួលបានបទពិសោធន៍ប្រកួតលំដាប់ពិភពលោកលើកដំបូង បានប្រកួតចាញ់ក្រុមទុយនេស៊ី ៧-១៣ នៅវគ្គផ្តាច់ព្រ័ត្រ នាថ្ងៃនេះ បន្ទាប់ពីកីឡាការិនី អ៊ុក ស្រីមុំ បានមេដាយមាសក្រោយយកឈ្នះកីឡាការិនីមកពីតំបន់អាហ្វ្រិកខាងជើងមួយនេះដូចគ្នា។
នៅការប្រកួតវគ្គជម្រុះដំបូង ញ៉ែម បូរ៉ា និង ស្រ៊ាង សុរ៉ាឃីម បានចាញ់ក្រុមបារាំង ៧-៨ តែឈ្នះហុងគ្រី ១៣-៥ និងឈ្នះសាធារណរដ្ឋឆែក ១៣-១ ដើម្បីទទួលបានកៅអីនៅវគ្គ១៦ក្រុមចុងក្រោយ។
ឈានដល់វគ្គ១៦ក្រុមចុងក្រោយ ប៉ូរ៉ា និង សុរ៉ាឃីម បានយកឈ្នះ Salim Raza Bhaye SOOKHARRY និង Pamela WONG របស់ម៉ូរីទូស ១៣-០ ហើយបន្តឈ្នះ Alessio COCCIOLO និង Valentina PETULICCHIO របស់អ៊ីតាលី ១៣-៤ នៅវគ្គ៨ក្រុមចុងក្រោយ។
ឈានដល់វគ្គពាក់កណ្តាលផ្តាច់ព្រ័ត្រ កីឡាករ និងកីឡាការិនីរបស់កម្ពុជា បានយកឈ្នះ Jean-Michel DERLINCOURT និង Sonia COULOMBE របស់កាណាដា ក្នុងលទ្ធផល ១៣-៥ ប៉ុន្តែបានចាញ់ Khaled LAKHAL និង Nadia BEN ABDESSALEM របស់ទុយនេស៊ី ៧-១៣ ដោយទទួលបានមេដាយប្រាក់។
សម្រាប់លទ្ធផលផ្សេងទៀតរបស់កម្ពុជា កីឡាការិនី អ៊ុក ស្រីមុំ ឈ្នះមេដាយមាសលើវិញ្ញាសាឯកត្តជន។ ប៉ុន្តែ អ៊ុក ស្រីមុំ និង ស្រ៊ាង សុរ៉ាឃីម បានចាញ់ក្រុមអាល្លឺម៉ង់ ៤-១៣ នាការប្រកួតលើវិញ្ញាសាវាយគូនារី នៅវគ្គ១៦ក្រុមចុងក្រោយ។
សម្រាប់វិញ្ញាសាបុរស សុខ ចាន់មាន បានចាញ់កីឡាករបែលហ្ស៊ិក ១១-១៣ នៅវគ្គ១៦ក្រុមចុងក្រោយលើវិញ្ញាសាឯកត្តជន រីឯវិញ្ញាសាវាយគូបុរស ចាន់មាន និង បូរ៉ា ឈ្នះក្រុមអង់គ្លេស ១៣-១១ នៅវគ្គ១៦ក្រុមចុងក្រោយ តែចាញ់ក្រុមអាល្លឺម៉ង់ ៩-១៣ នៅវគ្គ៨ក្រុមចុងក្រោយ៕
© រក្សាសិទ្ធិដោយ thmeythmey.com