អាជ្ញាធរភ្នំពេញបញ្ចៀសចរាចរតាមផ្លូវមួយចំនួនក្នុងព្រឹត្តិការណ៍រត់ Baton Run

កីឡាជាតិ

ជាតិ

អាជ្ញាធរភ្នំពេញបញ្ចៀសចរាចរតាមផ្លូវមួយចំនួនក្នុងព្រឹត្តិការណ៍រត់ Baton Run

21, Apr 2017 , 9:59 pm

រូបភាព

ដោយ:

ភ្នំពេញ៖ អាជ្ញាធរសាលារាជធានីភ្នំពេញ បានប្រកាសបញ្ចៀសចរាចរតាមផ្លូវមួយចំនួនជាបណ្តោះអាសន្នក្នុងព្រឹត្តិការណ៍រត់ Baton Run នៅថ្ងៃទី២២ ខែមេសានេះ ដើម្បីសាទរការប្រកួតកីឡាស៊ីហ្គេមលើកទី២៩ និងកីឡាអាស៊ានប៉ារ៉ាហ្គេមលើកទី៩ ឆ្នាំ២០១៧នេះ ក្នុងប្រទេសម៉ាឡេស៊ី។

អាជ្ញាធរសាលារាជធានីភ្នំពេញ បានជូនដំណឹងនៅថ្ងៃទី២១ ខែមេសានេះឲ្យដឹងថា ពួកគេផ្អាកចរាចរណ៍តាមផ្លូវមួយចំនួនជាបណ្តោះអាសន្ន ចាប់ពីម៉ោង ៦កន្លះព្រឹក ដល់ម៉ោង ៩កន្លះព្រឹក ដើម្បីរក្សាសន្តិសុខ សុវត្ថិភាព សណ្តាប់ធ្នាប់សាធារណៈក្នុងព្រឹត្តិការណ៍ថ្ងៃស្អែកនេះ។

អាជ្ញាធរបញ្ជាក់ថា កីឡាករជាង ៦០០នាក់ នឹងចូលរួមព្រឹត្តិការណ៍រត់ Baton run ហើយពួកគេនឹងចាប់ផ្តើមរត់ពីមុខស្ថានទូតម៉ាឡេស៊ីឆ្ពោះទៅទៅពហុកីឡដ្ឋានជាតិអូឡាំពិក ដោយឆ្លងកាត់មហាវិថីព្រះនរោត្តម ផ្លូវសុធារស ឆ្ពោះទៅរង្វង់មូលសម្តេចព្រះសង្ឃរាជ ជួន ណាត វិថីព្រះស៊ីសុវត្ថិ ផ្លូវលេខ១៥៤ មហាវិថីព្រះនរោត្តម ផ្លូវលេខ២១៤ ផ្លូវលេខ១៦១ ផ្លូវលេខ១៨២ ផ្លូវលេខ២១៧ និងតាមផ្លូវព្រះមុនីរ៉េតឆ្ពោះទៅពហុកីឡដ្ឋានជាតិអូឡាំពិក។

អាជ្ញាធរប្រាប់អ្នកដំណើរទាំងអស់ដែលឆ្លងកាត់តាមតម្រាយផ្លូវខាងលើ ត្រូវបញ្ចៀសចរាចរណ៍បណ្តោះអាសន្ន ដើម្បីឲ្យព្រឹត្តិការណ៍រត់សាទរការប្រកួតកីឡាស៊ីហ្គេម និងកីឡាអាស៊ានប៉ារ៉ាហ្គេមឆ្នាំនេះ ប្រព្រឹត្តទៅដោយរលូន។ អនុរដ្ឋមន្ត្រីក្រសួងកីឡាម៉ាឡេស៊ី និងលោក ហង់ ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា នឹងកាន់ភ្លើងគុបសិប្បនិម្មិតរត់ក្នុងព្រឹត្តិការណ៍ខាងលើដែរ៕