អត្ថបទពាណិជ្ជកម្ម
នាយក CamEd៖«ត្រូវចៀសវាងកំហុសអតីតកាល ដើម្បីស្ថិរភាពកម្ពុជា»
× មានរឿងរ៉ាវអវិជ្ជមានច្រើននៅក្នុងរបបសាធារណរដ្ឋខ្មែរដែលត្រូវបានបង្ហាញនៅក្នុងសៀវភៅ «សាធារណរដ្ឋខ្មែរ»ជាភាសាបារាំង របស់លោក រស់ ចន្ត្រាបុត្រ ហើយដែលកំពុងបន្តកើតមាននៅក្នុងកម្ពុជាបច្ចុប្បន្នទៀត។ នាយកសាលា CamEd Business School ដ៏ល្បីនៅកម្ពុជា លោក ខេស៊ី បានែត (Casey Barnett) បានសម្រេចបកប្រែសៀវភៅសាធារណរដ្ឋខ្មែរនេះពីភាសាបារាំង មកជាភាសាអង់គ្លេស និងភាសាខ្មែរ សម្រាប់ការសិក្សារបស់យុវជនខ្មែរជំនាន់ក្រោយ។
នៅថ្ងៃទី២១មេសានេះ លោក ខេស៊ី បានែត នាយកសាលា CamEd Business School និងលោក រស់ ចន្ត្រាបុត្រ អ្នកនិពន្ធសៀវភៅ La république Khmère បានធ្វើសន្និសីទកាសែតរួមគ្នាប្រកាសចេញលក់សៀវភៅ «The Khmer Republic» ជាភាសាអង់គ្លេស។ សៀវភៅកម្រាស់ជាង៣០០ទំព័រត្រូវដាក់លក់នៅ បណ្ណាគារ Monument Book និងជា ebook នៅលើវេបសាយ Amazon.com។ ចំណែកឯសៀវភៅជាភាសាខ្មែរនឹងអាចមកដល់ទីផ្សារនៅក្នុងខែសីហាខាងមុខនេះដែរ។
មានមូលហេតុសំខាន់ៗមួយចំនួនដែលបានជំរុញឲ្យឲ្យលោក Casey ត្រូវបកប្រែសៀវភៅសាធារណរដ្ឋខ្មែរ របស់លោក រស់ ចន្ត្រាបុត្រ មកជាភាសាអង់គ្លេស និងភាសាខ្មែរ។ នៅក្នុងសេចក្តីអត្ថាធិប្បាយនៅលើទំព័រខាងដើមនៃសៀវភៅដែលលោកស្នើឲ្យមានការបកប្រែនេះលោកនាយកសាលា CamEd ដែលមករស់នៅ និងធ្វើការនៅក្នុងប្រទេសកម្ពុជា១៨ឆ្នាំមកហើយនោះ បានកត់សម្គាល់ថា យុវជខ្មែរជំនាន់ក្រោយមិនបានស្គាល់ច្បាស់ពីរបបសាធារណរដ្ឋខ្មែរនៃលោកសេនាប្រមុខ លន់ នល់ ឡើយ។ លើសពីនេះ លោក ខេស៊ី មិនចង់ឲ្យកម្ពុជាបច្ចុប្បន្នដើរជាន់ដានប្រតិសាស្ត្រឡើយ។
នៅក្នុងសេចក្តីផ្តើមនៃសៀវភៅ «The Khmer Republic» លោក ខេស៊ី សរសេរយ៉ាងដូច្នេះ៖«បើនិយាយពីរបបសាធារណរដ្ឋខ្មែរ ពលរដ្ឋខ្មែរគិតដល់តែពាក្យមួយឃ្លាដែលគេនិយមនិយាយតៗគ្នាគឺ ភ្នាក់ងារស៊ើបអង្កេតអាមេរិក CIA បានប្រើប្រាស់លោក លន់ នល់ ឲ្យទម្លាក់សម្តេច សីហនុ»។
នៅក្នុងសេចក្តីអធិប្បាយនៅលើសៀវភៅនោះដដែល លោកនាយកសាលា CamEd យល់ឃើញថា សៀវភៅសាធារណរដ្ឋខ្មែរនឹងផ្តល់ប្រយោជន៍ច្រើនដល់យុវជនខ្មែរជំនាន់ក្រោយ ប្រសិនបើពួកគេចង់ស្គាល់របបមួយនេះឲ្យច្បាស់លាស់ ដោយសារតែអ្នកនិពន្ធគឺជាសាក្សីម្នាក់ និងជាមនុស្សសំខាន់ម្នាក់នៃរបបនេះ។
លោក រស់ ចន្ត្រាបុត្រ ដែលសព្វថ្ងៃគឺជាទីប្រឹក្សារបស់សម្តេចនាយករដ្ឋមន្ត្រី ហ៊ុន សែន មានឋានៈស្មើទេសរដ្ឋមន្ត្រី ធ្លាប់ជាមនុស្សជំនិតម្នាក់របស់លោក លន់ នន់ ដែលជាប្អូនប្រុសរបស់លោកសេនាប្រមុខ លន់ នល់។ លោក រស់ ចន្ត្រាបុត្រ ក៏ធ្លាប់ជាសមាជិកនៃគណកម្មាធិការព្រាងរដ្ឋធម្មនុញ្ញនៃរបបសាធារណរដ្ឋខ្មែរដែរ។
មូលហេតុផ្សេងទៀតដែលធ្វើឲ្យលោក ខេស៊ី យល់ឃើញថា សៀវភៅរបស់ រស់ ចន្ត្រាបុត្រ កាន់តែមានតម្លៃនោះ គឺទិដ្ឋភាពអវិជ្ជមានជាច្រើនដែលអ្នកនិពន្ធលើកឡើងនៅក្នុងសៀវភៅ ក៏កំពុងតែកើតឡើងនៅក្នុងកម្ពុជាចប្ចុប្បន្នដែរ។ លោក ខេស៊ី សរសេរថា បើទោះជាពលរដ្ឋ បញ្ញវន្ត អ្នកនយោបាយ បានលះបង់កម្លាំងកាយចិត្តក្នុងគោលដៅធ្វើឲ្យលទ្ធិប្រជាធិបតេយ្យដំណើរការនៅក្នុងរបបសាធារណរដ្ឋខ្មែរយ៉ាងណាក៏ដោយ ប៉ុន្តែវានៅតែបរាជ័យដោយសារតែជម្លោះផ្ទៃក្នុង អំពើពុករលួយ និងសង្គ្រាម។
នាយកសាលា CamEd បន្តថា សព្វថ្ងៃនេះកម្ពុជាកំពុងមានសន្តិភាព និងស្គាល់ភាពរីកចម្រើននៃកំណើនសេដ្ឋកិច្ច ដែលបានជួយកាត់បន្ថយភាពក្រីក្ររបស់ពលរដ្ឋទៀតផង។
«ប៉ុន្តែនៅលើផ្លូវដ៏វែងឆ្ងាយ ចីរភាព និងស្ថិរភាពរបស់ប្រទេស តម្រូវឲ្យគេត្រូវចៀសវាកំហុសដែលធ្លាប់កើតមានពីអតីតកាល។ ខ្ញុំសង្ឃឹមថា សៀវភៅមួយក្បាលនេះ នឹងជួយឲ្យមានការចៀសផុតពីកំហុស អតីតកាលនោះ»។ នេះជាការបញ្ជាក់របស់លោក ខេស៊ី បានែត អ្នកឧបត្ថម្ភការបោះពុម្ពផ្សាយសៀវភៅសាធារណរដ្ឋខ្មែរជាភាសាអង់គ្លេស និងភាសាខ្មែរ៕
© រក្សាសិទ្ធិដោយ thmeythmey.com