ពីនេះ ពីនោះ
តើពាក្យ «បេក្ខជន និង បេក្ខភាព» ខុសគ្នាដូចម្តេច?
× ភ្នំពេញ៖ «បេក្ខជន» គឺសំដៅលើ តួអង្គជាបុគ្គល មនុស្ស ឬជន។ ប៉ុន្តែ «បេក្ខភាព» មិនមែនជាមនុស្សនោះទេ។ «បេក្ខភាព» សំដៅលើភាវៈនៃបុគ្គល ដែលសុំចូលរួមប្រកួតប្រជែង ដើម្បីបានតួនាទីឬឋានៈអ្វីមួយ។
វចនានុក្រម សម្តេច ជួន ណាត ពន្យល់ថា «បេក្ខជន» គឺជា ជនសម្លឹង, អ្នកប៉ងប្រាថ្នា, អ្នកចង់បាននូវមុខតំណែង, មុខការងារ ឬ ឋានៈអ្វីមួយ។ ឧទាហរណ៍ថា៖«គណបក្សប្រជាជនកម្ពុជា និងគណបក្សសង្គ្រោះជាតិ បានរៀបចំបេក្ខជនរបស់ខ្លួនរួចរាល់អស់ហើយ ដើម្បីប្រកួតប្រជែងក្នុងការបោះឆ្នោតថ្នាក់ឃុំ សង្កាត់ នាពេលខាងមុខ»។
ចំណែកឯ «បេក្ខភាព» គឺជាភាវៈ, ភាព, ឋានៈ ឬលក្ខណសម្បត្តិរបស់បេក្ខជន។ នេះ ជាការពន្យល់នៅក្នុងវចនានុក្រម សម្តេច ជួន ណាត ដដែល។ ឧទាហរណ៍ថា៖«ខ្ញុំបានដាក់ពាក្យប្រឡង ធ្វើជាគ្រូបង្រៀន។ ប៉ុន្តែ បេក្ខភាពរបស់ខ្ញុំ បែរជាត្រូវបានលុបចោល ដោយមិនដឹងមូលហេតុ»៕
Tag:
ពាក្យ
បេក្ខជននិងបេក្ខភាព
© រក្សាសិទ្ធិដោយ thmeythmey.com