ខ្សែបម្រើ N’Golo Kante និង Dele Alli បានក្លាយជាម្ចាស់ពានរង្វាន់កីឡាករឆ្នើម និងកីឡាករយុវជនឆ្នើមប្រចាំឆ្នាំ២០១៧របស់សមាគម Professional Footballers’ Association ក្នុងពិធីចែករង្វាន់នៅសណ្ឋាគារ Grosvenor ក្រុងឡុងដ៍ កាលពីថ្ងៃទី២៣ ខែមេសា ឆ្នាំ២០១៧ ។
N’Golo Kante បានក្លាយជាម្ចាស់ពាន PFA Player of the Year ដោយទទួលបានសំឡេងឆ្នោតគាំទ្រលើសមិត្តរួមក្រុម Chelsea ខ្សែបម្រើ Eden Hazard ខ្សែប្រយុទ្ធ Harry Kane របស់ Tottenham, Romelu Lukaku របស់ Everton, Zlatan Ibrahimovic របស់ Manchester United និងខ្សែបម្រើ Alexis Sanchez របស់ Arsenal។
ខ្សែបម្រើសញ្ជាតិបារាំង Kante បានក្លាយជាកម្លាំងដ៏សំខាន់របស់ Chelsea នៅរដូវកាលនេះ បន្ទាប់ពីរូបគេបានជួយឲ្យ Leicester City លើកពាន Premier League ជាប្រវត្តិសាស្ត្រ កាលពីរដូវកាលមុន។
ជាមួយគ្នានេះ ផងដែរ ខ្សែបម្រើអន្តរជាតិអង់គ្លេស Dele Alli ដែលលេងឲ្យក្លិប Tottenham Hotspur បានឈ្នះពានកីឡាករយុវជនឆ្នើម PFA Young Player សម្រាប់រយៈពេល២ឆ្នាំជាប់ៗគ្នា។ នៅរដូវកាលនេះ Alli បានស៊ុតបាល់បញ្ចូលទី១៦គ្រាប់ឲ្យ Tottenham ក្នុងនាមជាកីឡាករដែលមិនលេងនៅតំបន់ប្រយុទ្ធ តែរកគ្រាប់បាល់បញ្ចូលទីបានច្រើនជាងគេ។
អតីតប្រធានក្រុមជម្រើសជាតិអង់គ្លេស និងក្លិប Manchester United លោក David Beckham ទទួលបានពានរង្វាន់ PFA Merit Award ចំពោះស្នាដៃដែលគាត់បានបំពេញសម្រាប់ក្លិប និងប្រទេសជាតិ។
ដោយឡែក កីឡាការិនី Lucy Bronze ដែលលេងឲ្យក្លិប Manchester City បានឈ្នះពាន Women’s Player of the Year ខណៈកីឡាការិនី Jess Carter នៃក្លិប Birmingham ឈ្នះពាន Women’s Young Player of the Year។ អតីតកីឡាការិនី Arsenal និងជាប្រធានក្រុមជម្រើសជាតិអង់គ្លេស Kelly Smith MBE ទទួលបានពាន PFA Special Achievement Award៕
N’Golo Kante បានក្លាយជាម្ចាស់ពាន PFA Player of the Year
ខ្សែបម្រើអន្តរជាតិអង់គ្លេស Dele Alli ដែលលេងឲ្យក្លិប Tottenham Hotspur បានឈ្នះពានកីឡាករយុវជនឆ្នើម PFA Young Player
អតីតប្រធានក្រុមជម្រើសជាតិអង់គ្លេស និងក្លិប Manchester United លោក David Beckham ទទួលបានពានរង្វាន់ PFA Merit Award
កីឡាការិនី Lucy Bronze ដែលលេងឲ្យក្លិប Manchester City បានឈ្នះពាន Women’s Player of the Year
កីឡាការិនី Jess Carter នៃក្លិប Birmingham ឈ្នះពាន Women’s Young Player of the Year
អតីតកីឡាការិនី Arsenal និងជាប្រធានក្រុមជម្រើសជាតិអង់គ្លេស Kelly Smith MBE ទទួលបានពាន PFA Special Achievement Award