ជាតិ
ឯ.ឧ កឹម សុខា ជឿជាក់កាន់តែខ្លាំងថា CNRP នឹងឈ្នះឆ្នោត តែCPP ថា ជាការស្រមើស្រមៃ
× ភ្នំពេញ៖ មេបក្សប្រឆាំង នៅតែជឿជាក់ថា នឹងទទួលបានជ័យជំនះក្នុងការបោះឆ្នោតថ្នាក់ឃុំ សង្កាត់ និងការបោះឆ្នោតថ្នាក់ជាតិ នាពេលខាងមុខ។ រីឯ អ្នកនាំពាក្យបក្សកាន់អំណាច មិនមានអ្វីឆ្លើយតបច្រើននោះទេ ក្រៅតែពីការសើចចំអកឲ្យមេបក្សប្រឆាំង ដែលតែងចាញ់ឆ្នោត ជារៀងរាល់អាណត្តិ តែបែរជានិយាយថា ឈ្នះ ឥតឈប់ ទៅវិញ។
នៅចំពោះមុខមន្ត្រីជាន់ខ្ពស់ និងសកម្មជន ព្រមទាំងអ្នកគាំទ្ររាប់រយនាក់ ដែលចូលរួមក្នុងអង្គសមាជវិសាមញ្ញ នាពេលព្រឹកថ្ងៃទី២៥ ខែមេសានេះ ដើម្បីកែប្រែលក្ខន្តិកៈបក្សរបស់ខ្លួន ឯកឧត្តម កឹម សុខា ប្រធានគណបក្សសង្គ្រោះជាតិ បាននិយាយ ដោយអមជាមួយកាយវិការបែបជឿជាក់ថា គណបក្សសង្គ្រោះជាតិ នឹងឈ្នះឆ្នោត ហើយឆ្ពោះទៅដឹកនាំរដ្ឋាភិបាល នាពេលខាងមុខ។ ឯកឧត្តម កឹម សុខា បានសង្កត់ធ្ងន់ថា គណបក្សសង្គ្រោះជាតិ មិនទន់ខ្សោយឬបែកបាក់គ្នាជាដាច់ខាត ទោះជួបឧបសគ្គយ៉ាងណាក៏ដោយ។
មេបក្សប្រឆាំងរូបនេះ និយាយដូច្នេះថា៖«គណបក្សសង្គ្រោះជាតិ ទៅមុខជានិច្ច។ គណបក្សសង្គ្រោះជាតិ ទៅជិតដល់គោលដៅហើយ។ […..] ការធ្វើដំណើរពីចាញ់ទៅឈ្នះ ពិបាកបន្តិចហើយ បងប្អូន។ យើង ដឹងថា នៅខាងមុខ នៅមានឧបសគ្គច្រើនទៀត។ តែយើងទាំងអស់គ្នា នៅតែអត់ធ្មត់បាន ហើយនឹងធ្វើដំណើរទៅឲ្យដល់ចំណុចកំពូល។ ចំណុចកំពូល គឺដើម្បីដឹកនាំប្រទេសកម្ពុជា នាពេលអនាគត។ យើង ធ្វើដំណើរកាន់តែយូរទៅ កាន់តែរឹងមាំទៅ កាន់តែរួបរួមគ្នាទៅ។ [……] យើង ចាប់ដៃគ្នាឲ្យកាន់តែរឹងមាំ ធ្វើដំណើរទៅមុខ ឲ្យដល់គោលដៅ ដែលប្រជាជពលរដ្ឋខ្មែរ ចង់បាន»។
គណៈកម្មាធិការជាតិរៀបចំការបោះឆ្នោត (គ.ជ.ប) មានលក្ខណៈល្អប្រសើរ និងគួរឲ្យទុកចិត្តជាមុន។ ចំណែកឯ គណបក្សសង្គ្រោះជាតិ ក៏បានរៀបចំបេក្ខជនរបស់ខ្លួន ឲ្យឈរឈ្មោះជាក្រុមប្រឹក្សាឃុំ សង្កាត់ នៅទូទាំងប្រទេស។ មន្ត្រី សកម្មជន រួមទាំងអ្នកគាំទ្រក្នុងប្រទេសនិងក្រៅប្រទេស នៅតែជឿជាក់លើគណបក្សសង្គ្រោះជាតិ។ ហើយសហគមន៍អន្តរជាតិនានា ក៏រង់ចាំជួយជ្រោមជ្រែងគណបក្សសង្គ្រោះជាតិ ថែមទៀត។ ជាពិសេស គណបក្សសង្គ្រោះជាតិ នៅតែរក្សាជំហរអហិង្សា អត់ធ្មត់ និងពុះពាររាល់ឧបសគ្គ ដែលកំពុងតែកើតមានឡើង។ ចំណុចទាំងនេះហើយ ដែលឯកឧត្តម កឹម សុខា បានរៀបរាប់នៅចំពោះមុខអ្នកចូលរួមក្នុងអង្គសមាជវិសាមញ្ញនាព្រឹកនេះ ហើយហ៊ានអះអាងជាថ្មីថា គណបក្សសង្គ្រោះជាតិ នឹងឈ្នះការបោះឆ្នោត។
ឯកឧត្តម កឹម សុខា អះអាងទៀតថា គូប្រកួតលើឆាកនយោបាយនៅកម្ពុជា នាពេលបច្ចុប្បន្ន គឺមានតែគណបក្សប្រជាជនកម្ពុជា និងគណបក្សសង្គ្រោះជាតិ ប៉ុណ្ណោះ។ ឯកឧត្តម កឹម សុខា សង្កត់ធ្ងន់ថា ថ្វីដ្បិតនៅកម្ពុជា មានគណបក្សនយោបាយច្រើនក៏ពិតមែន ប៉ុន្តែប្រជាពលរដ្ឋកម្ពុជា រួមទាំងសហគមន៍អន្តជាតិ ចាប់អារម្មណ៍តែគណបក្សសង្គ្រោះជាតិ និងគណបក្សប្រជាជនកម្ពុជា ដែលមានអ្នកគាំទ្រប្រហាក់ប្រហែលគ្នា។
ក្រៅពីបង្ហាញក្តីសង្ឃឹមថា នឹងទទួលបានជ័យជំនះក្នុងការបោះឆ្នោតរួចហើយ ឯកឧត្តម កឹម សុខា ក៏និយាយពាក់ព័ន្ធបញ្ហាសង្គ្រាម និង សន្តិភាព។ ឯកឧត្តម កឹម សុខា លើកឡើងម្តងទៀតថា ពេលគណបក្សសង្គ្រោះជាតិ ឈ្នះឆ្នោត នឹងនាំមកនូវសុខសន្តិភាពសម្រាប់ប្រទេសជាតិទាំងមូល។ ផ្ទុយទៅវិញ ឯកឧត្តមក កឹម សុខា បានច្រានចោលទាំងស្រុងចំពោះការព្រួយបារម្ភថា សង្គ្រាម អាចនឹងកើតឡើង ក្រោយគណបក្សសង្គ្រោះជាតិ ឈ្នះឆ្នោត។
ជុំវិញការលើកឡើងខាងលើ លោក សុខ ឥសាន អ្នកនាំពាក្យគណបក្សប្រជាជនកម្ពុជា ចាត់ទុកពាក្យ «ឈ្នះ» របស់មេដឹកនាំបក្សប្រឆាំងថា ជារឿងធម្មតា និងជាការស្រមើស្រមៃ។ សម្រាប់លោក សុខ ឥសាន វា គ្មានអ្វីដែលគួរឲ្យភ្ញាក់ផ្អើលនោះទេ ដែលមេបក្សប្រឆាំង ព្យាយាម ប្រាប់អ្នកគាំទ្ររបស់ខ្លួនថា ឈ្នះឆ្នោត ម្តងហើយម្តងទៀតបែបនេះ។ លោក យល់ថា ឈ្នះឬចាញ់ គឺប្រជាពលរដ្ឋ ជាអ្នកសម្រេច មិនមែនអាស្រ័យលើការលើកឡើងរបស់ឯកឧត្តម កឹម សុខា ឡើយ។
អ្នកនាំពាក្យបក្សកាន់អំណាចរូបនេះ បានបញ្ជាក់ប្រាប់សារព័ត៌មានថ្មីៗដូច្នេះថា៖«គាត់ (ឯកឧត្តម កឹម សុខា) និយាយហ្នឹង គឺគ្រាន់តែជាការបំភាន់ភ្នែកប្រជាពលរដ្ឋទេ។ គាត់ និយាយ ដើម្បីកុំឲ្យអ្នកគាំទ្ររបស់គាត់ បាក់ទឹកចិត្ត។ គាត់ថា ឈ្នះតែរហូត។ យើងមើល លោក សម រង្ស៊ី និយាយថា ឈ្នះ តាំងពី ឆ្នាំ៩០ជាងមកម្ល៉េះ តែមិនដែលឃើញឈ្នះ ផងហ្នឹង។ ហើយ លោក កឹម សុខា ហ្នឹង រៀនតាមមេរបស់គាត់ (លោក សម រង្ស៊ី)»។
បន្ទាប់ពីសើចចំអកឲ្យមេបក្សប្រឆាំងបែបនេះហើយ លោក សុខ ឥសាន ក៏បែរមកលើកពីគុណសម្បតិ្តរបស់បក្សកាន់អំណាច ក្នុងការរក្សាសុខសន្តិភាព និងការអភិវឌ្ឍ។ គុណសម្បត្តិទាំងនេះ ត្រូវបានលោក សុខ ឥសាន ចាត់ទុកថាជា ទុននិងតម្លៃ ដែលនាំឲ្យបក្សកាន់អំណាច អាចឈ្នះឆ្នោត សាជាថ្មី៕
© រក្សាសិទ្ធិដោយ thmeythmey.com