ផ្លូវដែលគណបក្សសង្គ្រោះជាតិជ្រើសរើសដើរ ដើម្បីគេចចេញពីបញ្ហាជាមួយក្រសួងមហាផ្ទៃ

ជាតិ

ផ្លូវដែលគណបក្សសង្គ្រោះជាតិជ្រើសរើសដើរ ដើម្បីគេចចេញពីបញ្ហាជាមួយក្រសួងមហាផ្ទៃ

25, Apr 2017 , 5:18 pm

រូបភាព

ដោយ: ម៉ៅ សុផា

ភ្នំពេញ៖ បញ្ហាដែលគណបក្សសង្គ្រោះជាតិ កំពុងប្រឈមបច្ចុប្បន្ន គឺក្រសួងមហាផ្ទៃ ចាត់ទុក ការជ្រើសរើសអនុប្រធានទាំង៣រូប របស់គណបក្សសង្គ្រោះជាតិ ថាផ្ទុយទៅនឹងលក្ខន្តិកៈគណបក្ស។ ចំណុច ដែលក្រសួងមហាផ្ទៃ ចាត់ទុកថា គណបក្សសង្គ្រោះជាតិ ធ្វើខុសនឹងលក្ខន្តិកៈ គណបក្សសង្គ្រោះជាតិ បានលុបចោលនូវចំណុចនោះ ចេញពីលក្ខន្តិកៈតែម្តង។ នេះ គឺជាច្រកចេញរបស់គណបក្សសង្គ្រោះជាតិ ដើម្បីរួចផុតពីបញ្ហាខាងលើ។

អស់រយៈពេលជាង១ខែហើយ ដែលក្រសួងមហាផ្ទៃ នៅតែយល់ថា ការជ្រើសរើសលោក ប៉ុល ហំម លោក អេង ឆៃអ៊ាង និងលោកស្រី មូរ សុខហួរ ឲ្យធ្វើជាអនុប្រធានគណបក្សសង្គ្រោះជាតិ គឺផ្ទុយពីលក្ខន្តិកៈគណបក្សខ្លួនឯង។ ភាពរកាំរកួសជាមួយក្រសួងមហាផ្ទៃនេះ បានជំរុញឲ្យគណបក្សសង្គ្រោះជាតិ ត្រូវតែធ្វើវិសោធនកម្មលើលក្ខន្តិកៈរបស់ខ្លួន ដោយចៀសមិនរួច។ ដើម្បីធ្វើវិសោធកម្មលើលក្ខន្តិកៈ គណបក្សសង្គ្រោះជាតិ ក៏សម្រេចរៀបចំសមាជវិសាមញ្ញសាជាថ្មី នៅព្រឹកថ្ងៃទី២៥ ខែមេសា ឆ្នាំ២០១៧ នេះ។

គោលបំណងតែមួយគត់ ក្នុងការធ្វើសមាជវិសាមញ្ញនៅព្រឹកនេះ គឺការកែប្រែលក្ខន្តិកៈ ត្រង់ប្រការ ៤៧ (ថ្មី) ទៅជាប្រការ ៤៧ (ថ្មី១) ដែលមានចែងអំពីប្រធាន និង អនុប្រធានគណបក្សសង្គ្រោះជាតិ។ មូលហេតុ នៃការកែប្រែលក្ខន្តិកៈត្រង់ប្រការ ៤៧ (ថ្មី) គឺដើម្បីឲ្យលោក ប៉ុល ហំម លោក អេង ឆៃអ៊ាង និងលោកស្រី មូរ សុខហួរ ក្លាយជាអនុប្រធានគណបក្សសង្គ្រោះជាតិ ដោយពេញលក្ខណៈ ហើយក៏ដើម្បីបញ្ចប់បញ្ហាជាមួយក្រសួងមហាផ្ទៃផងដែរ ដែលមិនព្រមទទួលស្គាល់នូវភាពស្របច្បាប់របស់អ្នកទាំង៣រូប កន្លងមក។

ក្រសួងមហាផ្ទៃ បានលើកអំណះអំណាងថា ការជ្រើសរើសអនុប្រធានគណបក្សសង្គ្រោះជាតិ កន្លងមក គឺហួសពីរយៈពេល៣០ថ្ងៃ។ ការជ្រើសរើសអនុប្រធាន ដោយហួសពីរយៈពេល៣០ថ្ងៃនេះ ត្រូវបានក្រសួងមហាផ្ទៃ ចាត់ទុកថា គណបក្សសង្គ្រោះជាតិ ធ្វើខុសពីលក្ខន្តិកៈ។

ប្រកាស ៤៧ (ថ្មី) ក្នុងលក្ខន្តិកៈគណបក្សសង្គ្រោះជាតិ បានចែងថា ក្នុងករណី ដែលមិនមានអនុប្រធានគណបក្ស គណៈកម្មាធិកានាយក ត្រូវជ្រើសរើសអនុប្រធានយ៉ាងតិច១រូប ដោយមិនឲ្យហួសពីរយៈពេល៣០ថ្ងៃ។

ដើម្បីកុំឲ្យមានកំហុងឆ្គង ដូចដែលក្រសួងមហាផ្ទៃ បានលើកឡើងខាងលើ គណបក្សសង្គ្រោះជាតិ ក៏បង្ខំចិត្តកែប្រែលក្ខន្តិកៈត្រង់ប្រការ ៤៧ (ថ្មី) ទៅជា ប្រការ ៤៧ (ថ្មី១) ដោយបានលុបរយៈពេល ៣០ថ្ងៃនេះចេញ តែម្តង។

ប្រការ ៤៧ (ថ្មី១) ក្នុងលក្ខន្តិកៈរបស់គណបក្សសង្គ្រោះជាតិ បានសរសេរថា ក្នុងករណី ដែលមិនមានអនុប្រធានគណបក្ស គណៈកម្មាធិការនាយក ត្រូវជ្រើសរើសអនុប្រធានគណបក្ស យ៉ាងតិច១រូប ដើម្បីជួយការងារប្រធានគណបក្ស។

តាមពិតទៅ គណបក្សសង្គ្រោះជាតិ ក៏ធ្លាប់លើកហេតុផលដែរថា ការជ្រើសរើសអនុប្រធានគណបក្សសង្គ្រោះជាតិ មិនបានលើសពីរយៈពេល៣០ថ្ងៃនោះទេ ហើយក៏មិនផ្ទុយពីលក្ខន្តិកៈអ្វីដែរ។ ប៉ុន្តែ ទំនងជាមិនចង់តវ៉ាច្រើនជាមួយនឹងក្រសួងមហាផ្ទៃ ទើបគណបក្សសង្គ្រោះជាតិ សម្រេចធ្វើសមាជវិសាមញ្ញ ដើម្បីលុបចោល «រយៈពេល៣០ថ្ងៃ» ចេញពីប្រការ ៤៧ (ថ្មី) តែម្តង។

គណបក្សសង្គ្រោះជាតិ ហាក់ចង់បញ្ចប់បញ្ហាជាមួយនឹងក្រសួងមហាផ្ទៃ ឲ្យបានឆាប់រហ័ស ដើម្បីមានពេលវេលាគ្រប់គ្រាន់ សម្រាប់គិតគូរនិងយកចិត្តទុកដាក់លើកិច្ចការបោះឆ្នោត ដែលនឹងឈានមកដល់ក្នុងពេលឆាប់ៗនេះ។

កន្លងមក ក្រសួងមហាផ្ទៃ មិនត្រឹមតែមិនទទួលស្គាល់អនុប្រធានទាំង៣រូបនោះទេ តែក៏ធ្លាប់មិនទទួលស្គាល់ឯកឧត្តម កឹម សុខា ជាប្រធានគណបក្សសង្គ្រោះជាតិ ផងដែរ។ ប៉ុន្តែ ក្រោយពីមានការសម្របសម្រួលឡើងវិញនៅក្នុងគណៈកម្មាធិការនាយកនៃគណបក្សសង្គ្រោះជាតិ ក្រសួងមហាផ្ទៃ ក៏ប្រកាសទទួលស្គាល់ឯកឧត្តម កឹម សុខា ជាប្រធានគណបក្សសង្គ្រោះជាតិ ឡើងវិញ៕