ជាតិ
នយោបាយជាតិ
មេបក្សប្រឆាំង៖«រឿងខ្លះ គេធ្វើបាន តែយើងធ្វើមិនបាន»
× ភ្នំពេញ៖ មេបក្សប្រឆាំង អះអាងថា បក្សខ្លួននៅតែមិនអាចធ្វើសកម្មភាពនយោបាយបានដោយពេញលេញទេ ព្រោះតែការរងសម្ពាធពីបក្សដទៃ។ ប៉ុន្តែអ្នកនាំពាក្យបក្សកាន់អំណាច បានច្រានចោលការលើកឡើងខាងលើ ហើយអះអាងថា បច្ចុប្បន្ន បក្សប្រឆាំង មានសិទ្ធិធ្វើសកម្មភាព ឬនិយាយស្តី ដូចបក្សផ្សេងៗដែរ។
ឯកឧត្តម កឹម សុខា ប្រធានគណបក្សសង្គ្រោះជាតិ បាននិយាយថា គណបក្សលោកមិនទាន់ទទួលបានសិទ្ធិពេញលេញក្នុងការធ្វើសកម្មភាពនយោបាយឡើយ ដោយសាររងការគំរាមកំហែងពីអ្នកនយោបាយដទៃ។ ត្បិតមិននិយាយចំឈ្មោះអ្នកនយោបាយណាក្តី តែមេបក្សប្រឆាំងរូបនេះ បាននិយាយដូច្នេះថា៖«ក្នុងនាមខ្ញុំជាអ្នកដឹកនាំ ខ្ញុំដឹងថា ស្ថានការណ៍បច្ចុប្បន្ននេះ មានផ្លូវខ្លះ គេអាចដើរបាន តែយើងដើរមិនបាន។ មានសកម្មភាពខ្លះ គេអាចធ្វើបាន តែយើងធ្វើមិនបាន។ មានពាក្យសម្តីខ្លះ គេ អាចនិយាយបានតាមអំពើចិត្តិ តែយើងនិយាយមិនបាន»។
ទោះជាសិ្ថតក្នុងស្ថានភាពបែបនេះក្តី ប៉ុន្តែឯកឧត្តម កឹម សុខា នៅតែទទូចឲ្យមន្ត្រី សកម្មជន និងអ្នកគាំទ្ររបស់ខ្លួន ប្រកួតប្រជែងនយោបាយដោយអត់ធ្មត់ ចៀសវាងការជេរប្រមាថ ឬការប្រើអំពើហិង្សាលើអ្នកដទៃ។ « ការអត់ធ្មត់ នឹងអាចឲ្យបក្សប្រឆាំង ទទួលបានជោគជ័យក្នុងការបោះឆ្នោត នាពេលខាងមុខ»។ នេះជាការលើកឡើងរបស់ប្រធានគណបក្សសង្គ្រោះជាតិ ដែលដ្លែងនៅក្នុងអង្គសមាជវិសាមញ្ញ នៅថ្ងៃទី២៥ ខែមេសា ឆ្នាំ២០១៧។
ជុំវិញបញ្ហានេះ លោក សុខ ឥសាន អ្នកនាំពាក្យគណបក្សប្រជាជនកម្ពុជា ឆ្លើយតបថា ការលើកឡើងរបស់ឯកឧត្តម កឹម សុខា ខាងលើ គឺខុសពីការពិត។ លោក អះអាងថា បច្ចុប្បន្ននេះ ពុំមានគណបក្ស និងស្ថាប័នណា ទៅរារាំងឬដាក់សម្ពាធលើគណបក្សសង្គ្រោះជាតិ មិនឲ្យនិយាយ ឬមិនឲ្យធ្វើសកម្មភាពអ្វីមួយ នោះទេ។
អ្នកនាំពាក្យបក្សកាន់អំណាចរូបនេះ បានបញ្ជាក់ដូច្នេះថា៖«គ្មានអ្នកណា មិនឲ្យគាត់ (ឯកឧត្តម កឹម សុខា) ធ្វើសកម្មភាព មិនឲ្យគាត់និយាយទេ។ គាត់ ចេះតែនិយាយទៅ។ ចុះគាត់ កំពុងតែនិយាយហ្នឹង ម៉េចក៏និយាយបាន។ បើគេ មិនឲ្យគាត់និយាយ ស្មានតែគាត់ និយាយបាន?»៕
Tag:
CPP
CNRP
កឹម សុខា
សុខ ឥសាន
បោះឆ្នោត
© រក្សាសិទ្ធិដោយ thmeythmey.com