ជាតិ
នយោបាយជាតិ
សង្គ្រោះជាតិ នឹងរើសអនុប្រធានឡើងវិញ តែរង់ចាំមហាផ្ទៃទទួលស្គាល់លក្ខន្តិកៈថ្មី ជាមុនសិន ទីស្នាក់ការកណ្តាលគណបក្សសង្គ្រោះជាតិ ស្ថិតក្នុង សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ។
× ភ្នំពេញ៖ លុះត្រាតែក្រសួងមហាផ្ទៃ ទទួលស្គាល់លក្ខន្តិកៈជាមុនសិន ទើបបក្សប្រឆាំង ចាប់ផ្តើមគិតគូរពីការជ្រើសរើសអនុប្រធានរបស់ខ្លួន ឡើងវិញ។ បក្សប្រឆាំង នឹងបញ្ជូនលក្ខន្តិកៈរបស់ខ្លួន ទៅកាន់ក្រសួងមហាផ្ទៃ នៅរសៀលថ្ងៃពុធនេះ។
លោក យ៉ែម បុញ្ញឫទ្ធិ អ្នកនាំពាក្យគណបក្សសង្គ្រោះជាតិ បានប្រាប់សារព័ត៌មានថ្មីៗថា គណបក្សសង្គ្រោះជាតិ នឹងយកលក្ខន្តិកៈថ្មី ដែលទើបតែត្រូវបានធ្វើវិសោធកម្មតាមរយៈសមាជវិសាមញ្ញ ទៅឲ្យក្រសួងមហាផ្ទៃ នៅរសៀលថ្ងៃទី២៦ ខែមេសា ឆ្នាំ២០១៧នេះ។
លោក យ៉ែម បុញ្ញឫទ្ធិ បញ្ជាក់ថា គណបក្សសង្គ្រោះជាតិ មិនទាន់អាចបើកកិច្ចប្រជុំក្នុងគណៈកម្មាធិកានាយក ដើម្បីជ្រើសរើសអនុប្រធានគណបក្សនោះទេ ដរាបណាក្រសួងមហាផ្ទៃ មិនទាន់ប្រកាសទទួលស្គាល់លក្ខន្តិកៈថ្មី។ លោក និយាយត្រឡប់មកវិញថា បន្ទាប់ពីក្រសួងមហាផ្ទៃទទួលស្គាល់លក្ខន្តិកៈថ្មីរួចហើយ គណៈកម្មាធិការនាយកនៃគណបក្សសង្គ្រោះជាតិ នឹងបើកកិច្ចប្រជុំ ដើម្បីជ្រើសរើសអនុប្រធានគណបក្ស។
បច្ចុប្បន្ននេះ លោក ប៉ុល ហំម លោក អេង ឆៃអ៊ាង និងលោកស្រី មូរ សុខហួរ គឺជាអនុប្រធានគណបក្សសង្គ្រោះជាតិ ដែលមិនទាន់មានការទទួលស្គាល់ពីក្រសួងមហាផ្ទៃ។ អ្នកទាំង៣រូប នៅតែមានបំណងឈរឈ្មោះ ជាបេក្ខជនអនុប្រធានគណបក្សសង្គ្រោះជាតិដដែល នៅពេលគណៈកម្មាធិនាយក បើកកិច្ចប្រជុំ ដើម្បីជ្រើសរើសអនុប្រធានគណបក្ស ម្តងទៀត នាពេលខាងមុខ។ នេះជាការអះអាងរបស់លោក យ៉ែម បុញ្ញឫទ្ធិ ដដែល។
អ្នកនាំពាក្យបក្សប្រឆាំងរូបនេះ និយាយដូច្នេះថា៖«ប្រហែលជាមិនមានការផ្លាស់ប្តូរទេ ចំពោះអនុប្រធានទាំង៣។ តែខ្ញុំ មិនទាន់អាចបញ្ជាក់ឲ្យច្បាស់ទេ ថាយ៉ាងម៉េច។ អ្វីៗ គឺរង់ចាំការសម្រេចក្នុងគណៈកម្មាធិការនាយក»។
កន្លងមក ក្រសួងមហាផ្ទៃ ធ្លាប់អះអាងថា គណបក្សសង្គ្រោះជាតិ បានជ្រើសរើសអនុប្រធាន ដោយហួសពីរយៈពេល៣០ថ្ងៃ។ ការជ្រើសរើសអនុប្រធានដោយហួសពីរយៈពេល៣០ថ្ងៃនេះ ត្រូវបានក្រសួងមហាផ្ទៃ ចាត់ទុកថា គណបក្សសង្គ្រោះជាតិ ធ្វើខុសទៅនឹងលក្ខន្តិកៈ ត្រង់ប្រការ ៤៧ (ថ្មី)។
ដើម្បីគេចចេញពីបញ្ហាជាមួយក្រសួងមហាផ្ទៃ គណបក្សសង្គ្រោះជាតិ បានធ្វើវិសោធនកម្មលក្ខន្តិកៈ ត្រង់ប្រការ ៤៧ (ថ្មី) ឲ្យទៅជា ប្រការ ៤៧ (ថ្មី១) ដោយលុបចោល «រយៈពេល៣០ថ្ងៃ» ចេញតែម្តង។ ក្នុងន័យនេះ គណបក្សសង្គ្រោះជាតិ អាចជ្រើសរើសអនុប្រធានគណបក្ស ពេលណាក៏បាន ដោយមិនគិតពី «រយៈពេល៣០ថ្ងៃ» ដូចមុន នោះទេ។
ប្រការ ៤៧ (ថ្មី១) ក្នុងលក្ខន្តិកៈគណបក្សសង្គ្រោះជាតិ បានសរសេរថា ក្នុងករណី ដែលមិនមានអនុប្រធានគណបក្ស គណៈកម្មាធិការនាយក ត្រូវជ្រើសរើសអនុប្រធានគណបក្សយ៉ាងតិច១រូប ដើម្បីជួយការងារប្រធានគណបក្ស៕
Tag:
យ៉ែម បុញ្ញឫទ្ធិ
ក្រសួងមហាផ្ទៃ
© រក្សាសិទ្ធិដោយ thmeythmey.com