ជាតិ
មេធាវី ប្តឹងទៅឧទ្ធរណ៍ ដើម្បីជំទាស់សាលាដំបូង ដែលបន្តឃុំមន្ត្រីអាដហុកនិងមន្ត្រីគ.ជ.ប ៦ខែទៀត
× ភ្នំពេញ៖ ដោយមិនសុខចិត្តនឹងចៅក្រមស៊ើបសួរនៃសាលាដំបូងរាជធានីភ្នំពេញ ដែលបន្តឃុំមន្ត្រីអាដហុកនិងមន្ត្រីគ.ជ.ប ចំនួន៦ខែទៀត ក្រុមមេធាវី ក៏បានដាក់បណ្តឹងទៅកាន់សាលាឧទ្ធរណ៍ ដើម្បីសុំជំទាស់។ មេធាវីរបស់មន្ត្រីអាដហុក បានដាក់បណ្តឹងទៅកាន់សាលាឧទ្ធរណ៍រួចហើយ ដើម្បីសុំជំទស់នឹងរឿងនេះ។ ដោយឡែក មេធាវីរបស់មន្ត្រីគ.ជ.ប នៅមិនទាន់ដាក់បណ្តឹងទៅកាន់សាលាឧទ្ធរណ៍ នោះទេ។
ក្រុមមេធាវី ការពារក្តីឲ្យមន្ត្រីអាដហុក៤រូប បានដាក់បណ្តឹងទៅកាន់សាលាឧទ្ធរណ៍រួចហើយ ដើម្បីប្រឆាំងនឹងចៅក្រមស៊ើបសួរនៃសាលាដំបូងរាជភ្នំពេញ ដែលបន្តឃុំកូនក្តីរបស់ពួកគេចំនួន៦ខែបន្ថែមទៀត ទាក់ទងនឹងរឿងអាស្រូវរបស់ស្រីមុំ ជាមួយនឹងឯកឧត្តម កឹម សុខា ប្រធានគណបក្សសង្គ្រោះជាតិ។ នេះបើតាមលោក សំ សុគង់ មេធាវីរបស់មន្ត្រីនៃគណៈកម្មាធិការជាតិរៀបចំការបោះឆ្នោត (គ.ជ.ប) ដែលកំពុងជាប់ឃុំ ក្នុងសំណុំរឿងតែមួយ ជាមួយនឹងមន្ត្រីអាដហុក។
ប៉ុន្តែ លោក សំ សុគង់ ប្រាប់សារព័ត៌មានថ្មីៗថា ខ្លួនលោកផ្ទាល់ ដែលការពារក្តីឲ្យមន្ត្រីគ.ជ.ប មិនទាន់បានដាក់បណ្តឹងទៅកាន់សាលាឧទ្ធរណ៍ ដើម្បីប្រឆាំងនឹងចៅក្រមស៊ើបសួរនៃសាលាដំបូងរាជធានីភ្នំពេញ នៅឡើយទេ។ លោក គ្រាន់តែបញ្ជាក់ថា លោក នឹងធ្វើកិច្ចការនេះឲ្យបានលឿន។
កន្លងមក លោក សំ សុគង់ ធ្លាប់និយាយថា ការបន្តឃុំខ្លួនដ៏យូរបែបនេះ គឺប៉ះពាល់ដល់សិទ្ធិរបស់ជនត្រូវចោទ។ លោក ធ្លាប់លើកឡើងទៀតថា រដ្ឋធម្មនុញ្ញនៃប្រទេសកម្ពុជា រួមទាំងសទ្ធិសញ្ញាអន្តរជាតិនានា បានចែងអំពីសិទ្ធិរបស់ជនត្រូវចោទ ដែលត្រូវទទួលបានការជំនុំជម្រះដោយឆាប់រហ័ស។
បើគិតរហូតមកដល់ពេលនេះ មន្ត្រីអាដហុក៤រូប រួមមានលោក នី សុខា លោក ណៃ វង់ដា លោក យី សុខសាន្ត និងលោកស្រី លឹម មុន្នី ព្រមទាំងអគ្គលេខាធិការងនៃគ.ជ.ប គឺលោក នី ចរិយា បានជាប់ឃុំអស់រយៈពេល១ឆ្នាំហើយ។ ក្រោយជាប់ឃុំអស់រយៈពេល១ឆ្នាំ ចៅក្រមស៊ើបសួរ មិនបានលើកលែងការចោទប្រកាន់ ឬបញ្ជូនមន្ត្រីអាដហុក និងមន្ត្រីគ.ជ.ប ទៅជំនុំជម្រះ នោះទេ។ ផ្ទុយទៅវិញ ចៅក្រមស៊ើបសួរ បានកំណត់ឲ្យមន្ត្រីអាដហុក និងមន្ត្រីគ.ជ.ប ជាប់ឃុំជាបណ្តោះអាសន្នចំនួន ៦ខែបន្ថែមទៀត ដោយលើកហេតុផលថា ការស៊ើបសួរក្នុងសំណុំរឿងនេះ នៅមិនទាន់មានលក្ខណៈពេញលេញ។
សូមបញ្ជាក់ថា មន្ត្រីអាដហុកនិងមន្ត្រីគ.ជ.ប ត្រូវបានចៅក្រមស៊ើបសួរ យកទៅឃុំកាលពីថ្ងៃទី២ ខែឧសភា ឆ្នាំ២០១៦។ មន្ត្រីអាដហុក រងពីបទចោទ «សូកប៉ាន់សាក្សី» ហើយមន្ត្រីគ.ជ.ប រងពីបទចោទ «សមគំនិតក្នុងអំពើសូកប៉ាន់សាក្សី»៕
Tag:
អាដហុក
គជប
មេធាវី
តុលាការ
© រក្សាសិទ្ធិដោយ thmeythmey.com