តុលាការបញ្ជានគរបាលយុត្តិធម៌ប្រើកម្លាំងបង្ខំលោក ជុន ច័ន្ទបុត្រ ឲ្យចូលបង្ហាញខ្លួន

ជាតិ

តុលាការបញ្ជានគរបាលយុត្តិធម៌ប្រើកម្លាំងបង្ខំលោក ជុន ច័ន្ទបុត្រ ឲ្យចូលបង្ហាញខ្លួន

02, May 2017 , 4:32 pm

រូបភាព

លោក ឌុន វិបុល មេធាវីរបស់លោក ជុន ច័ន្ទបុត្រ ផ្តល់បទសម្ភាសដល់អ្នកសារព័ត៌មាននៅមុខសាលាដំបូងរាជធានីភ្នំពេញនៅព្រឹកថ្ងៃទី២ ខែឧសភា ឆ្នាំ២០១៧ ជុំវិញករណី ដែលលោក ជុន ច័ន្ទបុត្រ មិនចូលបំភ្លឺតាមដីកាកោះ។

ដោយ: ម៉ៅ សុផា

ភ្នំពេញ៖ អយ្យការអមសាលាដំបូងរាជធានីភ្នំពេញ បានចេញដីកាបញ្ជាឲ្យ លោក ជុន ច័ន្ទបុត្រ ចូលខ្លួនដើម្បីយកទៅដោះស្រាយតាមផ្លូវច្បាប់។ ប៉ុន្តែ រហូតមកដល់ពេលនេះ លោក ជុន ច័ន្ទបុត្រ បានចាកចេញពីប្រទេសកម្ពុជា ទៅដល់សហរដ្ឋអាមេរិកហើយ។

លោក សៀង សុខ ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ បានចេញដីកា នៅថ្ងៃទី២ ខែឧសភា ឆ្នាំ២០១៧នេះ ដើម្បីឲ្យ លោក ជុន ច័ន្ទបុត្រ ដែលមានឈ្មោះជាផ្លូវការថា ហួត វុទ្ធី នាយករងនៃវិទ្យុអាស៊ីសេរីផ្នែកភាសាខ្មែរ ចូលខ្លួនបំភ្លឺនៅតុលាការ។ ដីកានោះ បានសរសេរដូច្នេះថា៖«បង្គាប់ឲ្យកម្លាំងសមត្ថកិច្ចនាំលោក ជុន ច័ន្ទបុត្រ មកបង្ហាញខ្លួន នៅអយ្យការអមសាលាដំបូងរាជធានីភ្នំពេញ ដើម្បីសាកសួរដំណើររឿង ផ្តល់សេចក្តីប្រកាសដោយភូតកុហក បន្លំខ្លួនចូលពន្ធានាគា»។

ការចេញដីកាខាងលើ គឺធ្វើឡើងក្រោយពីលោក ជុន ច័ន្ទបុត្រ មិនព្រមចូលទៅបំភ្លឺនៅចំពោះមុខព្រះរាជអាជ្ញា តាមកាលកំណត់។ តាមអំណាចនៃដីកានេះ មន្ត្រីនគរបាលយុត្តិធម៌អាចប្រើប្រាស់កម្លាំងសាធារណដើម្បីបង្ខំបុគ្គលឲ្យចូលបង្ហាញខ្លួន។

ក្រោយព្រះរាជអាជ្ញា ចេញដីកាកោះហៅ លោក ជុន ច័ន្ទបុត្រ ក៏បានចាកចេញពីប្រទេសកម្ពុជា កាលពីប៉ុន្មានថ្ងៃមុន។ លោក ឌុល វិបុល មេធាវីរបស់លោក ជុន ច័ន្ទបុត្រ បានប្រាប់សារព័ត៌មានថ្មីៗថា បច្ចុប្បន្ន លោក ជុន ច័ន្ទបុត្រ កំពុងតែស្ថិតនៅសហរដ្ឋអាមេរិក។

ព្រះរាជអាជ្ញា មិនត្រឹមតែចេញដីកាបង្គាប់ឲ្យចាប់លោក ជុន ច័ន្ទបុត្រ ប៉ុណ្ណោះទេ តែក៏បានចេញសេចក្តីថ្លែងការណ៍មួយផ្សេងទៀតផងដែរ ជុំវិញដំណើររឿងក្តីនេះ។ ព្រះរាជអាជ្ញា បានបញ្ជាក់នៅក្នុងសេចក្តីថ្លែងការណ៍ដូច្នេះថា៖«លោក ជុន ច័ន្ទបុត្រ បានជូនដំណឹងមកអយ្យការអមសាលាដំបូងរាជធានីភ្នំពេញ អំពីការចាកចេញទៅបរទេស ហើយនឹងត្រឡប់មកវិញ ដើម្បីបង្ហាញខ្លួនតាមកាលបរិច្ឆេទ។ ប៉ុន្តែ ជនសង្ស័យរូបនេះ មិនបានបង្ហាញខ្លួនតាមកាលកំណត់ ដែលបានសន្យាឡើយ»។

វិទ្យុអាស៊ីសេរី ព្រួយបារម្ភពីសុវត្ថិភាពរបស់លោក ជុន ច័ន្ទបុត្រ ទើបឲ្យលោក ជុន ច័ន្ទបុត្រ ចាកចេញពីប្រទេសកម្ពុជា ដើម្បីគេចចេញពីចំណាត់ការរបស់តុលាការ។ វិទ្យុអាស៊ីសេរី អះអាងដូច្នេះ នៅក្នុងសេចក្តីថ្លែងការណ៍ ដែលបង្ហោះលើទំព័រហ្វេសប៊ុក នៅថ្ងៃទី២ ខែឧសភា ឆ្នាំ២០១៧នេះ។

ហេតុផលមួយទៀត ដែលលើកឡើងនៅក្នុងសេចក្តីថ្លែងការណ៍ដដែល គឺវិទ្យុអាស៊ីសេរី យល់ថា អាជ្ញាធរ ហាក់ចង់យកករណីលោក ជុន ច័ន្ទបុត្រ ធ្វើជារឿងនយោបាយ ខណៈការបោះឆ្នោតថ្នាក់ឃុំ សង្កាត់ កាន់តែខិតជិតមកដល់។ លើសពីនេះ សេចក្តីថ្លែងការណ៍នោះ ក៏បានបញ្ជាក់ទៀតថា វិទ្យុអាស៊ីសេរី មិនជឿលើតុលាការកម្ពុជា ដែលនឹងដោះស្រាយករណីលោក ជុន ច័ន្ទបុត្រ ដោយយុត្តិធម៌ នោះទេ។

ការក្លាយជាជនសង្ស័យនៅក្នុងដំណើររឿងខាងលើ គឺដោយសារតែលោក ជុន ច័ន្ទបុត្រ ចូលទៅជួបមន្ត្រីនិងសកម្មជនគណបក្សសង្គ្រោះជាតិ នៅក្នុងពន្ធានាគារព្រៃស កាលពីថ្ងៃទី១៩ ខែមេសា ឆ្នាំ២០១៧។ សកម្មភាពរបស់លោក ជុន ច័ន្ទបុត្រ ត្រូវបានសមត្ថកិច្ច និងតុលាការ ចាត់ទុកថា ជាការបន្លំខ្លួនទាំងបំពានច្បាប់ ក្នុងការចូលទៅជួបអ្នកជាប់ឃុំនៅក្នុងពន្ធនាគារព្រៃស។

អ្នក ដែលនាំលោក ជុន ច័ន្ទបុត្រ ទៅជាមួយ ពេលចូលសួរសុខទុក្ខអ្នកជាប់ឃុំក្នុងពន្ធាគារព្រៃស គឺលោកស្រី មូរ សុខហួរ និងលោក ឡុង រី តំណាងរាស្ត្រគណបក្សសង្គ្រោះជាតិ។ តំណាងរាស្ត្រទាំងពីររូបនេះ បានចូលទៅបំភ្លឺក្នុងនាមជាសាក្សីរួចហើយ ជុំវិញដំណើររឿងខាងលើ។ យ៉ាងណា ពួកគាត់ទាំងពីររូប មិនបានរងបទចោទអ្វីឡើយ៕