ជាតិ
នយោបាយជាតិ
សង្គ្រោះជាតិ ធូរចិត្ត ក្រោយដោះស្រាយបញ្ហារួចរាល់ជាមួយមហាផ្ទៃ
× ភ្នំពេញ៖ ក្រសួងមហាផ្ទៃ បានចាត់ទុកលក្ខន្តិកៈថ្មីរបស់គណបក្សសង្គ្រោះជាតិ ថាត្រឹមត្រូវ។ ក្រោយអស់កង្វល់រឿងលក្ខន្តិកៈរបស់ខ្លួន គណបក្សសង្គ្រោះជាតិ នឹងមានពេលវេលាគ្រប់គ្រាន់ ក្នុងការបំពេញការងារផ្នែកនយោបាយ ជាពិសេសការងារ ដែលទាក់ទងនឹងការបោះឆ្នោត។
នៅទីបំផុត ក្រសួងមហាផ្ទៃ បានទទួលស្គាល់លក្ខន្តិកៈថ្មីរបស់គណបក្សសង្គ្រោះជាតិហើយ នៅថ្ងៃទី៣ ខែឧសភា ឆ្នាំ២០១៧។ ការទទួលស្គាល់នូវលក្ខន្តិកៈថ្មីនេះ គឺមានន័យថា បញ្ហារវាងគណបក្សសង្គ្រោះជាតិ និងក្រសួងមហាផ្ទៃកន្លងមក ត្រូវបានបញ្ចប់នៅក្នុងពេលនេះ។
មួយរយៈចុងក្រោយនេះ គណបក្សសង្គ្រោះជាតិ មានកង្វល់ច្រើន ដោយសារក្រសួងមហាផ្ទៃ មិនព្រមទទួលស្គាល់ លោក ប៉ុល ហំម លោក អេង ឆៃអ៊ាង និងលោកស្រី មូរ សុខហួរ ជាអនុប្រធានគណបក្សសង្គ្រោះជាតិ។ ហេតុផលតែមួយគត់ ដែលក្រសួងមហាផ្ទៃ លើកឡើង គឺគណបក្សសង្គ្រោះជាតិ ធ្វើខុសលក្ខន្តិកៈ ក្នុងការជ្រើសរើសអនុប្រធាន។
លោក ប៉ុល ហំម ប្រធានគណៈកម្មាធិការនាយក និងជាអនុប្រធានគណបក្សសង្គ្រោះជាតិ បានប្រាប់សារព័ត៌មានថ្មីៗថា ទោះជាកន្លងមក ក្រសួងមហាផ្ទៃ មិនព្រមទទួលស្គាល់អនុប្រធានគណបក្សសង្គ្រោះជាតិក៏ពិតមែន ប៉ុន្តែកិច្ចការនៅក្នុងគណបក្សសង្គ្រោះជាតិ មិនជាប់គាំងនោះទេ។ យ៉ាងណា លោក នៅតែយល់ថា ការទទួលស្គាល់នូវលក្ខន្តិកៈថ្មីនេះ គឺជាសញ្ញាណវិជ្ជមានមួយ ដែលបើកផ្លូវឲ្យគណបក្សសង្គ្រោះជាតិ អាចធ្វើកិច្ចការនយោបាយ បានពេញលេញ ដោយមិនសូវខ្វល់ខ្វាយដូចមុន។
លោក បញ្ជាក់ដូច្នេះថា៖«រឿងស្បើយចិត្ត គឺស្បើយចិត្តហើយ ពេលយើងអស់បញ្ហាបែបនេះ។ កន្លងមក យើង ក៏មិនចង់ធ្វើអ្វីឲ្យមានបញ្ហា ជាមួយក្រសួងមហាផ្ទៃដែរ។ អ៊ីចឹងហើយ បានជាយើង ប្រឹងកែប្រែលក្ខន្តិកៈ ឲ្យច្បាស់លាស់តែម្តង»។
លើលពីនេះ លោក ប៉ុល ហំម មើលឃើញទៀតថា ការទទួលស្គាល់នូវលក្ខន្តិកៈថ្មី នឹងផ្តល់ភាពងាយស្រួលដល់គណៈកម្មាធិការនាយកនៃគណបក្សសង្គ្រោះជាតិ ក្នុងការជ្រើសរើសអនុប្រធានគណបក្ស ឡើយវិញ។ ប៉ុន្តែ លោក មិនទាន់អាចបញ្ជាក់បានទេថា គណៈកម្មាធិការនាយកនៃគណបក្សសង្គ្រោះជាតិ នឹងបើកកិច្ចប្រជុំ ដើម្បីជ្រើសរើសអនុប្រធានគណបក្ស នៅពេលណា។
បើតាមលោក ប៉ុល ហំម ដដែល បេក្ខជនឈរឈ្មោះជាអនុប្រធានគណបក្សសង្គ្រោះជាតិ ប្រហែលជា មិនផ្លាស់ប្តូរឡើយ នៅពេលគណៈកម្មាធិការនាយកនៃគណបក្សសង្គ្រោះជាតិ បើកកិច្ចប្រជុំ ដើម្បីជ្រើសរើសអនុប្រធាន នាពេលខាងមុខ។
លោក យ៉ែម បុញ្ញឫទ្ធិ អ្នកនាំពាក្យគណបក្សសង្គ្រោះជាតិ ធ្លាប់និយាយថា គណបក្សសង្គ្រោះជាតិ បានចំណាយពេលវេលាច្រើន ក្នុងការដោះស្រាយបញ្ហាជាមួយនឹងក្រសួងមហាផ្ទៃ។ លោក ធ្លាប់លើកឡើងទៀតថា បញ្ហាដែលកើតឡើងជាមួយនឹងក្រសួងមហាផ្ទៃ ធ្វើឲ្យប៉ះពាល់ដល់ការងារផ្នែកការបោះឆ្នោត ដែលគណបក្សសង្គ្រោះជាតិ កំពុងតែគិតគូរ។
យ៉ាងណា ពេលនេះ គណបក្សសង្គ្រោះជាតិ នឹងមិនពិបាកទៀតឡើយ ក្នុងការជ្រើសរើសអនុប្រធានគណបក្ស ក្រោយពីក្រសួងមហាផ្ទៃ ទទូលស្គាល់លក្ខន្តិកៈថ្មី។ ម្យ៉ាងទៀត គណបក្សសង្គ្រោះជាតិ ក៏មានពេលវេលាគ្រប់គ្រាន់ដែរ ដើម្បីគិតគូរពីកិច្ចការបោះឆ្នោត៕
Tag:
CNRP
លក្ខន្តិកៈ
មហាផ្ទៃ
© រក្សាសិទ្ធិដោយ thmeythmey.com