ជាតិ
សិល្បះ
ក្រសួងវប្បធម៌ កំពុងពិនិត្យករណីភាពយន្តថៃមួយ យករូបអង្គរវត្តដាក់Background
× ក្រសួងវប្បធម៌ និងវិចិត្រសិល្បៈ កំពុងសិក្សា និងត្រួតពិនិត្យលើការផ្សាយភាពយន្តថៃមួយមានចំណងជើងថា«បារមីនាគរាជ» ដែលមានភ្ជាប់រូបអមជាប្រាសាទអង្គរវត្តរបស់កម្ពុជា។
លោក ថៃ នរៈសត្យា អ្នកនាំពាក្យក្រសួងវប្បធម៌ និងវិចិត្រសិល្បៈ បានបញ្ជាក់ប្រាប់សារព័ត៌មានថ្មីៗតាមទូរសព្ទដូច្នេះថា៖«នាយកដ្ឋានភាពយន្ត និងផ្សព្វផ្សាយវប្បធម៌នៃក្រសួងវប្បធម៌ កំពុងសិក្សា និងពិនិត្យលើករណីនេះ»។
ការឆ្លើយតបនេះ គឺបន្ទាប់ពីមានប្រតិកម្មពីសាធារណជន ដែលបានលើកឡើងនូវក្តីបារម្ភថា ការយករូបប្រាសាទអង្គរវត្ត ដែលជាសម្បត្តិបេតិកភណ្ឌពិភពលោករបស់កម្ពុជា ទៅអមនៅផ្នែកខាងក្រោយ(Background)នៃតួសម្តែងក្នុងភាពយន្តបែបនេះ អាចធ្វើឲ្យពិភពលោកយល់ច្រឡំ។
ដ្បិតមិនទាន់ទទួលបានព័ត៌មានលម្អិត ប៉ុន្តែ លោក ថៃ នរៈសត្យា បានអះអាងថា ខាងផលិតកម្មរបស់ថៃនោះ ចាំបាច់ត្រូវសុំការអនុញ្ញាតពីអាជ្ញាធរជាតិជាមុនសិន មុននឹងផ្សព្វផ្សាយ។ អ្នកនាំពាក្យរូបនេះ បញ្ជាក់ដូច្នេះថា៖« បើគេសុំច្បាប់ហើយ គឺអត់អីទេ ប៉ុន្តែបើអត់ទេ គឺយើងទាមទារឲ្យសុំការអនុញ្ញាតជាមុនសិន ហើយយើងចង់ឲ្យមានការបញ្ជាក់ថាហេតុអ្វីបានជាមានករណីនេះ? ហើយបើការឆ្លើយតបយ៉ាងណាទៀត យើងចាំមើលទៀត»។
បើផ្អែតាមផ្ទាំងផ្សព្វផ្សាយដដែល ភាពយន្ត នឹងចាក់បញ្ចាំងបញ្ចាំងឆាប់ៗនេះ នៅទូរទស្សន៍ថៃ ប៉ុស្ដិ៍លេខ៥ រៀងរាល់ថ្ងៃអង្គារ វេលាម៉ោង ២០:២០នាទី ដល់ម៉ោង ២១:២០ នាទីយប់៕
Tag:
អង្គរវត្ត
ភាពយន្ត
ថៃ នរៈសត្យា
© រក្សាសិទ្ធិដោយ thmeythmey.com