ការដាំកូនឈើទ្រង់ទ្រាយធំក្នុងយុទ្ធនាការស្តារឡើងវិញនូវព្រៃឈើលើភ្នំគូលែន

ជាតិ

ការដាំកូនឈើទ្រង់ទ្រាយធំក្នុងយុទ្ធនាការស្តារឡើងវិញនូវព្រៃឈើលើភ្នំគូលែន

08, May 2017 , 10:19 pm

រូបភាព

ដោយ: អុីសា រ៉ហានី (Isa Rohany)

សៀមរាប៖ ដើម្បីស្រោចស្រង់ព្រៃឈើនៅលើភ្នំគូលែន ដែលរងការកាប់បំផ្លាញស្ទើរទាំងស្រុងនោះ ក្រសួងបរិស្ថាន និងសាលាខេត្តសៀមរាប បានរៀបចំឲ្យមានការដាំកូនឈើជាទ្រង់ទ្រាយធំមួយ។ នេះជាយុទ្ធនាការដ៏ធំសម្រាប់ឆ្នាំ២០១៧នេះ ហើយតាមគម្រោងដើមឈើដែលត្រូវយកមកដាំមានចំនួនជាង៧ម៉ឺនដើម។

ក្រសួងបរិស្ថាន និងសាលាខេត្តសៀមរាបបានបង្ហាញជំហរដ៏ច្បាស់លាស់មួយ ក្នុងការស្តារឡើងវិញចំពោះព្រៃឈើដែលបានបាត់បង់នៅលើខ្នងភ្នំគូលែន។ តាមការប៉ាន់ស្មានពីអង្គការមួយ ព្រៃឈើនៅលើភ្នំគូលែន នៅសល់មិនដល់២០%ផង។ យុទ្ធនាការដាំកូនឈើជាទ្រង់ទ្រាយធំរបស់ក្រសួងបរិស្ថាន និងសាលាខេត្តសៀមរាប ក្រោមប្រធានបទ «ការស្តារឡើងវិញព្រៃឈើនៅភ្នំគូលែន» ហើយមានការចូលរួមយ៉ាងផុសផុល ពីសំណាក់ប្រជាពលរដ្ឋ និងអង្គការដៃគូអភិវឌ្ឍន៍។

តាមមន្ត្រីនៃអង្គការ ADF ដែលធ្វើការជាមួយក្រសួងបរិស្ថាននៅលើភ្នំគូលែន គម្រោងដាំកូនឈើខ្នាតធំនេះ ធ្វើឡើងនៅលើផ្ទៃដីជាង ១៦ហិកតា (១៦.៣ហិកតា) ហើយកូនឈើដែលត្រូវដាំមានចំនួន ៧៥,០០០ដើម។ លោក សាឃឿន សក្កា កូនឈើទាំងនោះ ១៥,០០០ដើមជាប្រភេទឈើហូបផ្លែ និង៦ម៉ឺនដើមទៀត ជាឈើព្រៃ មានគ្រញូងជាដើម។

តាមការបញ្ជាក់របស់លោក សក្កា នៅថ្ងៃទី៨ ខែឧសភា យុទ្ធនាការខាងលើត្រូវបានចាប់ផ្តើមអនុវត្តន៍ជាបណ្តើរៗ ដោយក្នុងនោះមន្ត្រីឧទ្យានុរក្ស គ្រូបង្រៀន និងសិស្សានុសិស្ស បានចុះដាំកូនឈើទាំងនោះ បានជាងមួយម៉ឺនដើមហើយដែរ។ លោកពន្យល់ថា៖« ដោយសារកូនឈើមានច្រើន ណាមួយភ្លៀងចាប់ធ្លាក់ជាបណ្តើរហើយដែរ ដូច្នេះយើងប្រញាប់ដាំ»។

តាមគម្រោង ក្រសួងបរិស្ថាន និងសាលាខេត្តសៀមរាប បានកំណត់យកថ្ងៃទី២៣ ខែឧសភា ឆ្នាំ២០១៧ ដើម្បីដាំជាទ្រង់ទ្រាយធំ និងជាថ្ងៃសម្រាប់ការដាំបញ្ចប់នៃគម្រោងមួយនេះ។ បែបនេះក្តី ដោយសារកូនឈើមានចំនួនច្រើន ហើយផ្ទៃដីធំល្វឹងល្វើយនោះ ឧទ្យានុរក្សបាននិងកំពុងចុះដាំជាបណ្តើរៗ។

គម្រោងស្តារឡើងវិញព្រៃឈើភ្នំគូលែន ជាគម្រោងដ៏ធំរបស់ក្រសួងបរិស្ថាន និងសាលាខេត្តសៀមរាប ក្រោយរមណីដ្ឋានភ្នំគូលែន បានត្រូវរាជរដ្ឋាភិបាលសម្រេចដកហូតពីក្រុមហ៊ុនឯកជន មកគ្រប់គ្រងជំនួសវិញ កាលពីចុងឆ្នាំ២០១៥។ បែបនេះក្តី រហូតមកដល់បច្ចុប្បន្ននេះ ការដោះស្រាយ និងការផ្តល់សំណងនានា ហាក់នៅត្រឹងថ្កល់នៅឡើយ។

អង្គការ ADF ដែលធ្វើការស្រាវជ្រាវលើកបុរាណដ្ឋាននៅលើភ្នំគូលែន ធ្លាប់បានបញ្ជាក់ថា ការងារបុរាណដ្ឋានរបស់ខ្លួនជួបនឹងបញ្ហាដោយសារការទន្ទ្រាញព្រៃខុសច្បាប់។ អង្គការមួយនេះពន្យល់ថា ខ្លួនធ្លាប់ផ្តល់គម្រោងស្តារជីវភាពប្រជាជននៅលើខ្នងភ្នំមួយនេះ ដូចជាការទុនសម្រាប់ចិញ្ចឹមត្រី មាន់ ទា និងបណ្តុះផ្សិតជាដើម តែពួកគេទទួលស្គាល់ថា ពលរដ្ឋខ្លះនៅតែងាកទៅទន្ទ្រាញព្រៃ រានធ្វើចំការដដែល។

គួរបញ្ជាក់ថា គម្រោងស្តារព្រៃឈើនេះដែរ ក្នុងនោះក៏មានគម្រោងមួយ រវាងក្រសួងបរិស្ថាន និងមូលនិធិ Adaptation ដោយមានកិច្ចសហប្រតិបត្តិពីអង្គការ ADF, UNEP និងសាលាបឋមសិក្សាអន្លង់ធំ។ ការងារនេះមានការចូលរួមយ៉ាងផុសផុលពីនាយកសាលា លោកគ្រូអ្នកគ្រូ និងសិស្សានុសិស្សនៃសាលាបឋមសិក្សាអន្លង់ធំ៕