ជាតិ
ទ័ពខ្មែរពលីជីវិតនៅបរទេសដែលមានសង្គ្រាម!
× ភ្នំពេញ៖ ទាហានមួកខៀវកម្ពុជាទាំង៤រូប ដែលជាកងកម្លាំងរក្សាសន្តិសុខនៃអង្គការសហប្រជាជាតិ ប្រចាំអាហ្វ្រិកកណ្តាល បានបាត់បង់ជីវិត ដោយសារការវាយប្រហារពីពួកឧទ្ទាម Anti-Balaka ។
ទាហានមួកខៀវកម្ពុជាទាំង៤រូបខាងលើ ដែលត្រូវពួកឧទ្ទាម Anti-Balaka នៅអាហ្វ្រិកកណ្តាល សម្លាប់ គឺលោកអនុសេនីយ៍ទោ អ៊ឹម សំ លោកអនុសេនីយ៍ឯង ម៉ៅ អេង លោកព្រឹន្ទបាលទោ មុំ តុលា និងលោកព្រឹន្ទបាលទោ ស៊ាង នរិន្ទ។
កាលពីថ្ងៃទី៨ ខែឧសភា ឆ្នាំ២០១៧ ពួកឧទ្ទាម បានពួនស្ទាក់ ហើយវាយប្រហារទៅលើក្បួនកងកម្លាំងរក្សាសន្តិសុខនៃអង្គការសហប្រជាជាតិ នៅអាហ្វ្រិកកណ្តាល។ សេចក្តីប្រកាសព័ត៌មានខាងលើ បានបញ្ជាក់ថា ការវាយប្រហាររបស់ពួកឧទ្ទាមនេះ បណ្តាលឲ្យទាហានមួកខៀវកម្ពុជាមួយរូប គឺលោក អ៊ឹម សំ បានស្លាប់ នៅកន្លែងកើតហេតុតែម្តង ហើយមួយរូបទៀត រងរបួស។
ចំណែកឯ ទាហានមួកខៀវកម្ពុជាបីរូបទៀត គឺលោក មុំ តុលា លោក ស៊ាង នរិន្ទ និងលោក ម៉ៅ អេង បានបាត់ខ្លួន ក្រោយការវាយប្រហារពីពួកឧទ្ទាម។ ប៉ុន្តែពេលនេះ អ្នកទាំងបីរូប បានស្លាប់ហើយ។ សាកសពរបស់អ្នកទាំងបី ត្រូវបានរកឃើញ នៅថ្ងៃទី៩ ខែឧសភា ឆ្នាំ២០១៧ ដោយស្ថិតនៅចម្ងាយប្រហែលជា ២គីឡូម៉ែត្រ ពីកន្លែង ដែលពួកឧទ្ទាមវាយប្រហារ។ ទាំងនេះ គឺជាការរៀបរាប់របស់ក្រសួងការពារជាតិ នៅក្នុងសេចក្តីប្រកាសព័ត៌មាន។
តាមរយៈសេចក្តីប្រកាសព័ត៌មាន ក្រសួងការពារជាតិ បានសម្តែងការសោកស្តាយយ៉ាងខ្លាំងចំពោះការបាត់បង់ជីវិតរបស់កងកម្លាំងកម្ពុជាទាំង៤រូបខាងលើ។ សេចក្តីប្រកាសព័ត៌មាននោះ បានសរសេរដូច្នេះថា៖«សូមសម្តែងការសោកស្តាយជាពន់ពេក និងសូមចូលរួមរំលែកទុក្ខយ៉ាងក្រៀមក្រំជាមួយក្រុមគ្រួសារនៃសព ចំពោះការពលីជីវិតប្រកបដោយកិត្តិយស សេចក្តីថ្លៃថ្នូរ និងវីរភាពដ៏អង់អាចក្លាហាន នៃកងយោធពលខេមរភូមិន្ទ ដែលបានបាត់បង់ជីវិតក្នុងការបំពេញបេសកកម្មមនុស្សធម៌អន្តរជាតិ ក្រោមឆត្រនៃអង្គការសហប្រជាជាតិ នៅអាហ្រិ្វកកណ្តាល»។
នៅក្នុងការវាយប្រហារនោះផងដែរ កងទ័ពមួកខៀវខ្មែរម្នាក់ទៀត គឺ លោក ធុច ធីម តួនាទីអនុសេនីយ៍ឯក រងរបួសដៃឆ្វេង (អ្នកបើកបរ)។ ចំណែកកងទ័ពម៉ារ៉ុក មាន១នាក់កំពុងបន្តបាត់ខ្លួន ហើយ៦នាក់រងរបួស៕
Tag:
ទាហានមួកខៀវខ្មែរ
ស្លាប់
ពួកឧទ្ទាម
អាហ្វ្រិកកណ្តាល
© រក្សាសិទ្ធិដោយ thmeythmey.com