ជាតិ
អ្នកនយោបាយខ្មែរ និងទូតបរទេសនានាសោកស្តាយចំពោះការបាត់បង់វីរបុរសជាតិ៤រូប កងទ័ពមួកខៀវនាពេលបំពេញបេសកកម្មនៅអាហ្វ្រិកកណ្តាល។ រូបថត Minusca
× ភ្នំពេញ៖ មេដឹកនាំ និងអ្នកនយោបាយខ្មែរ រួមទាំងស្ថានទូតនានា និងអង្គការអន្តរជាតិផ្សេងទៀត ដែលមានទីតាំងនៅលើដីកម្ពុជា បានសម្តែងការសោកស្តាយ និងចូលរួមរំលែកទុក្ខ ចំពោះការបាត់បង់ជីវិតទាហានមួកខៀវកម្ពុជា៤រូប ដែលបម្រើការជាកងកម្លាំងរក្សាសន្តិភាពនៃអង្គការសហប្រជាជាតិ នៅសាធារណរដ្ឋអាហ្វ្រិកណ្តាល ដោយសារការវាយប្រហាររបស់ក្រុមឧទ្ទាម នៅថ្ងៃទី៨ ខែឧសភា ឆ្នាំ២០១៧។ ទាហានមួកខៀវកម្ពុជាទាំង៤រូប ដែលត្រូវពួកឧទ្ទាម នៅអាហ្វ្រិកកណ្តាល សម្លាប់ គឺលោកអនុសេនីយ៍ទោ អ៊ឹម សំ លោកអនុសេនីយ៍ឯង ម៉ៅ អេង លោកព្រឹន្ទបាលទោ មុំ តុលា និងលោកព្រឹន្ទបាលទោ ស៊ាង នរិន្ទ។
សម្តេច ហ៊ុន សែន នាយករដ្ឋមន្ត្រីកម្ពុជា៖«ជនជាតិកម្ពុជា ដែលធ្វើសកម្មភាពក្រោមឆត្រអង្គការសហប្រជាជាតិ ក្នុងគោលដៅមនុស្សធម៌ បានពលីជីវិត ដោយកិត្តិយស និងសេចក្តីក្លាហាន នៅលើទឹកដីនៃអាហ្វ្រិកកណ្តាល។ […..] នេះ ជាការបាត់បង់មួយសម្រាប់កងទ័ព និងប្រជាជនកម្ពុជា។ ក្នុងនាមរាជរដ្ឋាភិបាល ក្នុងនាមប្រធានអតីតយុទ្ធជន ក៏ដូចជាខ្លួនខ្ញុំផ្ទាល់ ខ្ញុំសូមចូលរួមមរណទុក្ខ ចំពោះគ្រួសារនៃសព ហើយសូមឧទ្ទិសការងារនេះ ជាកិត្តិយស សម្រាប់ជាតិទាំងមូល»។
លោក ទៀ បាញ់ រដ្ឋមន្ត្រីក្រសួងការពារជាតិ៖«ក្នុងនាមខ្ញុំផ្ទាល់ នាយទាហាន នាយទាហានរង និងពលទាហាន នៃកងយោធពលខេមរភូមិន្ទ សូមចូលរួមរំលែកទុក្ខដ៏ក្រៀមក្រំជាទីបំផុត ជាមួយក្រុមគ្រួសារញាតិមិត្តទាំងអស់នៃសព និងសូមបួងសួងដល់ព្រះពុទ្ធ ព្រះធម៌ ព្រះសង្ឃ តាមបីបាច់រក្សាដួងវិញ្ញាណក្ខន្តនៃទាហានកម្ពុជា ដែលបានពលីជីវិត ក្នុងការចូលរួមចំណែកដោយស្ម័គ្រចិត្តក្នុងបេសកកម្មរក្សាសន្តិភាពរបស់អង្គការសហប្រជាជាតិ ឲ្យបានទៅសោយសុខក្នុងសុគតិភព ជានិរន្តរ៍តរៀងទៅ»។
លោក ប្រាក់ សុខុន រដ្ឋមន្ត្រីក្រសួងការបរទេស៖«(ខ្ញុំ) សូមចូលរួមរំលែកទុក្ខ ដោយក្តីសោកសៅ និងអាឡោះអាល័យជាទីបំផុត ជូនចំពោះក្រុមគ្រួសារ ញាតិមិត្តទាំងអស់នៃសព និងសូមសម្តែងនូវការគោរពដ៏ខ្ពង់ខ្ពស់ ចំពោះវីរភាពអង់អាចក្លាហាន ហើយនិងស្មារតីបំពេញកាតព្វកិច្ចអន្តរជាតិរបស់កងកម្លាំងមួកខៀវកម្ពុជាទាំង៤រូប ដែលបានពលីជីវិត។ (ខ្ញុំ) ក៏សូមសម្តែងអំណរគុណដ៏ជ្រាលជ្រៅបំផុត ចំពោះមាតាបិតា និងក្រុមគ្រួសារសាច់ញាតិ ដែលបានលះបង់កុលបុត្ររបស់ខ្លួន ឲ្យចូលរួមបំពេញការងារប្រកបដោយមោទនភាព កិត្តិយស និងការលើកកម្ពស់កិត្យានុភាពជាតិ នៅលើឆាកអន្តរជាតិ ដោយត្រូវបានទទួលស្គាល់យ៉ាងពិតប្រាកដថាជា វីរបុរស»។
លោក យឹម សុវណ្ណ តំណាងរាស្ត្រនៃគណបក្សសង្គ្រោះជាតិ៖«ខ្ញុំ មានសេចក្តីសង្វេគ និងសោកស្តាយយ៉ាងខ្លាំង ចំពោះមរណភាពរបស់ទាហានមួកខៀវកម្ពុជា ក្នុងបេសកកម្មរក្សាសន្តិភាពនៃអង្គការសហប្រជាជាតិ នៅសាធារណរដ្ឋអាហ្វ្រិកកណ្តាល ដែលបានពលីជីវិតក្នុងហេតុការណ៍នៃការពួនស្ទាក់វាយប្រហារពីក្រុមប្រដាប់អាវុធមួយក្រុម កាលពីយប់ថ្ងៃទី០៨ ខែឧសភា ឆ្នាំ២០១៧។ ខ្ញុំ សូមលំឱនកាយគោរពវិញ្ញាណក្ខន្ធរបស់ទាហានមួកខៀវកម្ពុជា និងចូលរួមរំលែកមរណទុក្ខដ៏សែនក្រៀមក្រំជាមួយក្រុមគ្រួសារ និងញាតិសន្តានទាំងអស់នៃសព។ សូមឧទ្ទិសបួងសួងជូនដួងវិញ្ញាណក្ខន្ធទាហានមូកខៀវកម្ពុជា បានទៅកាន់សុគតិភព កុំបីឃ្លៀងឃ្លាតឡើយ»។
លោក យ៉ែម បុញ្ញឫទ្ធិ តំណាងរាស្ត្រនៃគណបក្សសង្គ្រោះជាតិ៖«ក្នុងនាមជាពលរដ្ឋខ្មែរមួយរូប និងក្រុមគ្រួសារ ខ្ញុំសូមសម្តែងនូវការសោកស្តាយ ក្ដុកក្ដួលក្រៀមក្រំបំផុត ចំពោះការបាត់បង់ ទាហានមួកខៀវរបស់កម្ពុជាយើងចំនួន៤នាក់ ដែលបានពលីជីវិតនៅសាធារណរដ្ឋអាហ្វ្រិកកណ្តាល ក្នុងពេលបំពេញបេសកកម្មមនុស្សធម៌អន្តរជាតិ ក្រោមឆ័ត្ររបស់អង្គការសហប្រជាជាតិ ប្រកបដោយកិត្តិយសថ្លៃថ្នូរ និងវីរភាពដ៏អង់អាចក្លាហាន នៃកុលបុត្រកម្ពុជា។ ខ្ញុំសូមចូលរួមរំលែកទុក្ខដ៏ក្រៀមក្រំបំផុតនេះជាមួយក្រុមគ្រួសារ និងញាតិមិត្តទាំងអស់នៃសព និងសូមឧទ្ទិសឱ្យវិញ្ញាណក្ខន្ធសព បានទៅកាន់ក្នុងសុគតិភព កុំបីឃ្លៀងឃ្លាតឡើយ»។
ស្ថានទូតបារាំង ប្រចាំកម្ពុជា៖«ស្ថានទូតបារាំងប្រចាំកម្ពុជា សូមសម្តែងមរណទុក្ខ ចំពោះក្រុមគ្រួសារសព និងអាជ្ញាធរកម្ពុជា បន្ទាប់ពីមានការវាយប្រហារ កាលពីថ្ងៃទី៨ ខែឧសភា នៅសាធារណរដ្ឋអាហ្វ្រិកកណ្តាល ដែលបានបណ្តាលឱ្យទាហានមួកខៀវកម្ពុជា៤រូប បាត់បង់ជីវិត។ វា ជាការចាំបាច់ ដែលត្រូវស្វែងរកអ្នកទទួលខុសត្រូវ ក្នុងការវាយប្រហារនេះ ដើម្បីនាំខ្លួនពួកគេទៅកាត់ទោសតាមច្បាប់។ ប្រទេសបារាំង សូមសម្តែងការគាំទ្រសាជាថ្មី ដល់បេសកកម្មរបស់កងទ័ពមួកខៀវអង្គការសហប្រជាជាតិ ក្នុងការរក្សាស្ថិរភាពនៅសាធារណរដ្ឋអាហ្វ្រិកកណ្តាល និងការពារប្រជាជនស៊ីវិល»។
ស្ថានទូកអាមេរិក ប្រចាំកម្ពុជា៖«ស្ថានទូតអាមេរិក កំពុងតាមដានយ៉ាងដិតដល់នូវព័ត៌មានដែលថា ទាហានកម្ពុជាឈ្មោះ អ៊ឹម សំ ម៉ៅ អេង ស៊ាង នរិន្ទ និងមុំ តុលា ត្រូវបានសម្លាប់ ក្នុងពេលបំពេញបេសកកម្មថែរក្សាសន្តិភាព នៅសាធារណរដ្ឋអាហ្វ្រិកកណ្តាល។ យើង សូមសម្តែងជាថ្មីនូវសមានទុក្ខដ៏ក្រៀមក្រំ ចំពោះគ្រួសាររបស់ទាហាន និងរាជរដ្ឋាភិបាលកម្ពុជា»។
កម្មវិធីអភិវឌ្ឍនៃអង្គការសហប្រជាជាតិ (UNDP) ប្រចាំនៅកម្ពុជា៖« UNDP សូមសម្តែងទុក្ខដ៏ក្រៀមក្រំបំផុត ចំពោះការបាត់បង់ជីវិតដ៏គួរឲ្យសង្វេគ នៃវីរជនការពារសន្តិភាពខ្មែរទាំង៤រូប ដែលត្រូវបានសម្លាប់ កាលពីយប់ម្សិលមិញ ក្នុងបេសកកម្ម នៅភាគខាងត្បូងនៃសាធារណរដ្ឋអាហ្រិ្វកកណ្តាល។ យើង សូមចូលរួមរំលែកទុក្ខដ៏ក្រៀមក្រំបំផុតនេះ ជាមួយនឹងប្រជាជនកម្ពុជាទាំងអស់ ជាពិសេសសហការី មិត្តភក្តិ និងក្រុមគ្រួសារនៃសព»។
រដ្ឋាភិបាលអេស្ប៉ាញ ក៏បានចេញសារថ្កោលទោសពួកឧទ្ទាមផងដែរ៕
Tag:
ទាហានខ្មែរស្លាប់
ពួកឧទ្ទាម
អាហ្វ្រិកកណ្តាល
កងទ័ពមួកខៀវ
© រក្សាសិទ្ធិដោយ thmeythmey.com