ជាតិ
នយោបាយជាតិ
CNRP ស្នើលោក ប្រាក់ សុខុន ជួយអន្តរាគមន៍ឲ្យពលករខ្មែរនៅថៃ អាចចូលរួមបោះឆ្នោតបាន
×![]()
ក្រុមសភាតំណាងរាស្ត្របក្សសង្គ្រោះជាតិ បានដាក់លិខិតស្នើទៅរដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ សុំជួយអន្តរាគមន៍ពលករខ្មែរដែលកំពុងបម្រើការងារនៅប្រទេសថៃ អាចមានឱកាសចូលរួមបោះឆ្នោតក្រុមប្រឹក្សាឃុំ-សង្កាត់ នៅថ្ងៃទី០៤ ខែមិថុនា ឆ្នាំ២០១៧ខាងមុខនេះ។ 
តំណាងរាស្ត្របក្សសង្គ្រោះជាតិ ដែលបានទទួលដំណឹងពីពលករខ្មែរថា ពួកគេពិបាកសុំអនុញ្ញាតច្បាប់ពីថៅកែថៃ ចូលរួមបោះឆ្នោតជ្រើសរើសក្រុមប្រឹក្សាឃុំ-សង្កាត់។ ហើយអាជ្ញាធរតាមច្រកព្រំដែនក៏បង្កការលំបាកយឺតយ៉ាវដល់ពលករឲ្យខកខានក្នុងការចូលរួមបោះឆ្នោតផងដែរ។
នៅក្នុងលិខិតអន្តរាគមន៍តាមរយៈប្រធានរដ្ឋសភា ដែលក្រុមតំណាងរាស្ត្រគណបក្សប្រឆាំង បានស្នើទៅលោក ប្រាក់ សុខុន កាលពីថ្ងៃទី០២ ខែឩសភា បានរៀបរាប់ដូច្នេះថា៖« យើងខ្ញុំបានទទួលសេចក្ដីរាយការណ៍ពីពលករខ្មែរចំណាកស្រុកជាច្រើននាក់ ដែលកំពុងបម្រើការងារនៅប្រទេសថៃ ពួកគាត់បាននិងកំពុងជួបប្រទះបញ្ហាប្រឈមមួយចំនួន ដែលនឹងមិនអាចធ្វើឲ្យពួកគាត់អាចទៅបោះឆ្នោតជ្រើសរើសក្រុមប្រឹក្សាឃុំ-សង្កាត់ ដែលនឹងប្រព្រឹត្តនៅថ្ងៃទី០៤ ខែមិថុនា ឆ្នាំ២០១៧ ខាងមុខនេះបានទេ»។
ម្យ៉ាងទៀតទិដ្ឋាការរបស់ពលករខ្មែរមានតម្លៃខ្ពស់រហូតដល់ ៣,៩០០បាត(បីពាន់ប្រាំបួនរយបាត) (ជាប្រភេទទិដ្ឋាការអាចចេញចូលច្រើនដងបាន) ដែលបង្កការលំបាកចំពោះពលករក្នុងការធ្វើដំណើរទៅមក ដើម្បីមកចូលរួមការបោះឆ្នោតជ្រើសរើសក្រុមប្រឹក្សាឃុំ-សង្កាត់។ ហើយនិងពលករខ្មែរកាន់ប័ណ្ណស៊ីជម្ពូ គឺមានការលំបាកក្នុងការចេញពីក្នុងខេត្តប្រទេសថៃដែលខ្លួនកំពុងបម្រើការងារនៅទីនោះណាស់ ព្រោះពួកគាត់ជាពលករពុំមានលក្ខណៈស្របច្បាប់ឡើយ។ ដូច្នេះពលករខ្មែរដែលកាន់ប័ណ្ណស៊ីជម្ពូ ពុំមានសិទ្ធិធ្វើដំណើរមកដើម្បីបោះឆ្នោតនៅកម្ពុជាបានទេ។ ទាំងនេះជាការលើកឡើងរបស់គណបក្សប្រឆាំង ដែលបានបន្ថែមថា បញ្ហាប្រឈមរបស់ពលករខ្មែរចំណាកស្រុកនៅប្រទេសថៃខាងលើ ប្រសិនបើគ្មានការជួយអន្តរាគមន៍រកដំណោះស្រាយជួយពួកគាត់ទាន់ពេលវេលានោះទេ ពួកគាត់និងត្រូវបាត់បង់ឱកាសចូលរួមបោះឆ្នោតនៅក្នុងប្រទេសកម្ពុជា ដែលនឹងប្រព្រឹត្តនៅថ្ងៃទី០៤ ខែមិថុនា ឆ្នាំ២០១៧ ខាងមុខនេះជាមិនខាន។
គណបក្សប្រឆាំង ស្នើលោក ប្រាក់ សុខុន ជួបពិភាក្សាជាមួយក្រសួងការបរទេសថៃ ដើម្បើស្នើសុំការអនុញ្ញាតច្បាប់ សម្រាប់ពលករខ្មែរចំនួន៣ថ្ងៃ ដើម្បីឲ្យពួកគាត់អាចមកចូលរួមបោះឆ្នោត ។ ជាពិសេសណែនាំមន្ត្រីច្រកព្រំដែនជួយសម្រួលឲ្យពលករខ្មែរ អាចចូលមកកម្ពុជាឲ្យបានងាយស្រួលផងដែរ៕
Tag:
បោះឆ្នោត
© រក្សាសិទ្ធិដោយ thmeythmey.com
