ជាតិ
សង្គមជាតិ
គ.ជ.ប នឹងបើកកិច្ចប្រជុំជាមួយភាគីពាក់ព័ន្ធ ក្នុងការពិសោធន៍ទឹកថ្នាំខ្មៅជ្រលក់ដៃ ដើម្បីជម្រះមន្ទិលសង្ស័យ
× ភ្នំពេញ៖ គណកម្មាធិការជាតិរៀបចំការបោះឆ្នោត (គ.ជ.ប) សម្រេចបើកកិច្ចប្រជុំជាសាធារណៈ ជាមួយគ្រប់ភាគីពាក់ព័ន្ធ ក្នុងការពិសោធន៍លើទឹកថ្នាំខ្មៅជ្រលក់ដៃ ដើម្បីធានាភាពត្រឹមត្រូវនៃដំណើរការបោះឆ្នោតឃុំ-សង្កាត់នៅពេលខាងមុខនេះ។ ការរៀបចំកិច្ចប្រជុំជាសាធារណៈនៅសប្ដាហ៍ក្រោយនេះ គឺ គ.ជ.ប ចង់ឆ្លើយតបទៅនឹងក្តីព្រួយបារម្ភរបស់សង្គមស៊ីវិល ដែលទទួលបានព័ត៌មានថា ទឹកថ្នាំខ្មៅជ្រលក់ដៃក្នុងការបោះឆ្នោត នឹងអាចលុបជ្រះវិញ។
អ្នកនាំពាក្យគ.ជ.ប លោក ហង្ស ពទ្ធា ទទួលស្គាល់ថា ទឹកថ្នាំខ្មៅជ្រលក់ដៃ ដែល គ.ជ.ប បានពិសោធន៍លើកដំបូងនោះ គឺពិតជាអាចលុបជ្រះបានមែន ។ នោះក៏ព្រោះតែវា គ្រាន់តែជាទឹកថ្នាំគំរូ ដែលក្រុមហ៊ុនឥណ្ឌាបានផ្ញើមកឲ្យ គ.ជ.ប ពិសោធន៍សាកល្បងមើលប៉ុណ្ណោះ។ លោក ហង្ស ពុទ្ធា បន្ថែមថា ក្រោយពីពិសោធន៍ឃើញបញ្ហាលុបជ្រះនេះ គ.ជ.ប ក៏បានទាក់ទងទៅក្រុមហ៊ុនឥណ្ឌាវិញ ហើយក្រុមហ៊ុនផ្គត់ផ្គងទឹកថ្នាំនេះ ក៏បានផ្ញើផលិតផលមកម្ដងទៀត ។ ប៉ុន្តែការពិសោធន៍លើកទីពីរ គ.ជ.ប ឃើញថា ទឹកថ្នាំជ្រលក់ដៃម្ដងនេះ គឺមិនអាចលុបជ្រះទៀតទេ។
តែយ៉ាងណា គ.ជ.ប ក៏បានសម្រេចរៀបចំកិច្ចប្រជុំជាមួយភាគីពាក់ព័ន្ធទាំងអស់ ក្នុងពិសោធន៍ទឹកថ្នាំខ្មៅជ្រលក់ដៃ នៅសប្ដាហ៍ក្រោយនេះ ដើម្បីជម្រះមន្ទិលសង្ស័យរបស់សាធារណជន។
ថ្លែងប្រាប់សារព័ត៌មានថ្មីៗ អ្នកនាំពាក្យគ.ជ.ប រូបនេះ បានបញ្ជាក់ដូច្នេះថា៖«យើងនឹងបើកឲ្យមានការចូលរួមពីភាគីគណបក្សនយោបាយ សង្គមស៊ីវិលជាតិ និងអន្តរជាតិ ម្ចាស់ជំនួយរៀបចំការបោះឆ្នោត និងអ្នកជំនាញការបោះឆ្នោតឲ្យជួយពិសោធន៍មើលទឹកថ្នាំជ្រលក់ដៃនេះ។ ហើយភាគីពាក់ព័ន្ធទាំងអស់អាចយកទឹកប្រភេទអ្វីផ្សេងមកពិសោធន៍ មកលាងក៏បានដែរ ដើម្បីចង់ដឹងថាតើទឹកថ្នាំជ្រលក់ដៃនេះ អាចលុបជ្រះវិញបាន ឫក៏អត់។ ហើយបើវានៅតែលុបជ្រះនោះ យើងនឹងរកវិធីដោះស្រាយបញ្ហានេះបន្តទៀត»។
មន្ត្រីជាន់ខ្ពស់នៃគណកម្មាធិការដើម្បីការបោះឆ្នោតដោយសេរី និងយុត្តិធម៌ (comfrel) លោក កង សាវង្ស យល់ឃើញថា ការៀបចំឲ្យមានការចូលរួមធ្វើតេស្តលើទឹកថ្នាំជ្រលក់ដៃនេះ គឺជារឿងល្អ ដែលអាចឲ្យសាធារជនអស់ក្តីព្រួយបារម្ភ។ ប៉ុន្តែអ្វីដែលលោក កង សាវង្ស នៅព្រួយបារម្ភនោះ គឺពេលវេលានៃការបោះឆ្នោតជិតចូលមកដល់ហើយ បើសិនជាទឹកថ្នាំមានបញ្ហានោះ វានឹងអាចឲ្យប៉ះពាល់ដល់ដំណើរការបោះឆ្នោតជាក់ជាមិនខាន។ «មកដល់ពេលនេះវាគៀកនឹងការបោះឆ្នោត ដូច្នេះគជប ត្រូវជជែកជាមួយក្រុមហ៊ុនផ្គត់ផ្គង់ទឹកថ្នាំជ្រលក់ដៃ គួរធ្វើបែបណា ដាក់រូបមន្តបន្ថែមទៀតយ៉ាងណាដើម្បីឲ្យទឹកថ្នាំខ្មៅជ្រលក់ដៃនេះដុសមិនជ្រះ»។ នេះជាការលើកឡើងរបស់លោក កង សាវង្ស ដែលបានបន្ថែមថា គជប ក៏ត្រូវពង្រឹងឲ្យមន្ត្រីកិច្ចការបោះឆ្នោត និងអ្នកចូលរួមសង្កេតការបោះឆ្នោតទាំងអស់ អនុវត្តការងារប្រកបដោយវិជ្ជាជីវៈ និងតាមដានត្រួតពិនិត្យឲ្យបានត្រឹមត្រូវ ដើម្បីបញ្ជៀសកុំឲ្យឈ្មោះមនុស្សម្នាក់ អាចបោះឆ្នោតបានពីរទៅបីលើក ដោយសារតែបញ្ហាទឹកថ្នាំជ្រលក់ដៃនេះ។
តែយ៉ាងណាអ្នកនាំពាក្យ គ.ជ.ប លោក ហង្ស ពុទ្ធា ធានាថា ការបោះឆ្នោតឃុំ-សង្កាត់ខាងមុខនេះ នឹងមិនឲ្យមានអ្នកបន្លំចូលបោះឆ្នោតលើកពីមួយដងឡើយ។«ខ្ញុំចង់ជម្រាបថា ទោះជាទឹកខ្មៅជ្រលក់ដៃនេះលុបជ្រះ ឬមិនជ្រះ ឫក៏គ្មានប្រើថ្នាំទឹកខ្មៅក្នុងការបោះឆ្នោតក៏ដោយ ក៏ គ.ជ.ប អាចគ្រប់គ្រងបាន និងមានយន្តការត្រួតពិនិត្យតាមរយៈប្រព័ន្ធបច្ចេកវិទ្យា ដែលធានាមិនឲ្យមានជនខិលខូចអាចបន្លំចូលបោះឆ្នោតបាននោះទេ»។ នេះជាការអះអាងរបស់លោក ហង្ស ពុទ្ធា ដែលអំពាវនាវឲ្យសាធារណជន ជឿជាក់លើគ.ជ.ប ហើយមិនត្រូវជឿលើពាក្យសម្ដីញុះញង់របស់ក្រុមណាមួយ ដែលមានបំណងបំផ្លាញដំណើរការបោះឆ្នោតនោះឡើយ។
គណៈកម្មាធិការជាតិរៀបចំការបោះឆ្នោត (គ.ជ.ប) បានចំណាយថវិកាប្រមាណជា៧.៩ ម៉ឺនដុល្លារ ដើម្បីទិញទឹកខ្មៅជ្រលក់ដៃចំនួន ៤៦៥០០ដប ពីក្រុមហ៊ុនក្នុងប្រទេសឥណ្ឌា ។ ទឹកខ្មៅនេះ គឺសម្រាប់ជ្រលក់ដៃអ្នក ដែលបោះឆ្នោតរួចហើយ កុំឲ្យបន្លំទៅបោះឆ្នោតម្តងទៀត។ ទឹកថ្នាំទាំងនេះបានបញ្ជូនមកដល់ដៃគណៈកម្មាធិការជាតិរៀបចំការបោះឆ្នោតហើយ។ នេះបើតាមអ្នកនាំពាក្យ គ.ជ.ប ។
ការបោះឆ្នោតថ្នាក់ឃុំ សង្កាត់ ដែលមានគណបក្សនយោបាយចំនួន១២ ចូលរួមប្រកួតប្រជែង ក្នុងអាណត្តិទី៤នេះ នឹងប្រព្រឹត្តទៅនៅថ្ងៃទី៤ ខែមិថុនា ឆ្នាំ២០១៧។ គណបក្សនយោបាយ នឹងចាប់ផ្តើម ឃោសនាពីគោលនយោបាយ ពីថ្ងៃទី២០ ខែឧសភា ដល់ថ្ងៃទី២ ខែមិថុនា ឆ្នាំ២០១៧៕
Tag:
គជប
ទឹកថ្នាំខ្មៅ
សង្គមស៊ីវិល
© រក្សាសិទ្ធិដោយ thmeythmey.com