សម្ដេចក្រុមព្រះ នឹងយាងទៅកូរ៉េខាងជើងនៅខែកក្កដា ហើយគ្រោងជួយដោះស្រាយបញ្ហាឧបទ្វីបកូរ៉េ

ជាតិ

នយោបាយជាតិ

សម្ដេចក្រុមព្រះ នឹងយាងទៅកូរ៉េខាងជើងនៅខែកក្កដា ហើយគ្រោងជួយដោះស្រាយបញ្ហាឧបទ្វីបកូរ៉េ

13, May 2017 , 1:20 pm

រូបភាព

រូបសម្ដេចក្រុមព្រះក្នុងពិធីសំណេះសំណាល កាលពីឆ្នាំ២០១៤

ដោយ: រំដួល ចិត្រា (Romdoul Chetra)

ភ្នំពេញ៖ សម្ដេចក្រុមព្រះ នរោត្តម រណឫទ្ធិ ប្រធានគណបក្សហ្វ៊ុនស៊ិនប៉ិច មានបន្ទូលជាថ្មីថា ព្រះអង្គនឹងយាងទៅកូរ៉េខាងជើង នៅក្រោយពេលបោះឆ្នោតក្រុមប្រឹក្សា ឃុំ-សង្កាត់ ខាងមុខ។ ព្រះអង្គ រណឫទ្ធិ បន្តថា ទ្រង់យាងទស្សនកិច្ចនៅកូរ៉េខាងជើងនេះ គឺក្នុងក្របខណ្ឌគណបក្សនយោបាយ ដើម្បីជួបពិភាក្សាជាមួយថ្នាក់ដឹកនាំកូរ៉េ និងជាការរំឮកដល់អនុស្សាវរីយ៍នៃទំនាក់ទំនងរវាងប្រទេសទាំងពីរ ដែលបានកសាងឡើងដោយព្រះបរមរតនកោដ្ឋ សម្ដេច នរោត្តម សីហនុ និងលោក គីម អ៊ីលស៊ុង ដែលត្រូវជាជីតារបស់លោក គីម ជុងអ៊ុន មេដឹកនាំកូរ៉េខាងជើងបច្ចុប្បន្ននេះ។

រឿងដែលគួរឲ្យចាប់អារម្មណ៍ គឺបញ្ហាឧបទ្វីបកូរ៉េ។ តបនឹងសំនួររបស់អ្នកសារព័ត៌មាននៅមុខព្រះបរមរាជវាំងកាលពីថ្ងៃទី១២ ឧសភា សម្តេចក្រុមព្រះ មានបន្ទូលថា បញ្ហានេះទុកឲ្យប្រទេសមហាអំណាច ដូចចិនជាអ្នកសម្របសម្រួលជាមួយកូរ៉េខាងជើង ដើម្បីបន្ថយកម្ដៅសង្គ្រាមឧបទ្វីបកូរ៉េចុះ។ «ប្រសិនជាចិនដោះស្រាយមិនកើត គឺខ្ញុំ ដែលជាមិត្តស្និទ្ធជាមួយមេដឹកនាំកូរ៉េខាងជើង ក៏និយាយជាមួយគេខ្លះដែរ ធ្វើម៉េចកុំឲ្យមានសង្គ្រាមនុយក្លេអ៊ែរ»។ នេះជាបន្ទូលរបស់ប្រធានគណបក្សហ្វ៊ុនស៊ិនប៉ិច។

សូមស្ដាប់សំឡេង៖

គណបក្សរាជានិយមហ្វ៊ុនស៊ិនប៉ិច ដែលបានបន្សល់ទុកពីស្នាមព្រះហស្ថរបស់សម្ដេច នរោត្តម សីហនុ គឺមានប្រវត្តិបង្កើតឡើងនៅក្នុងទីក្រុងព្យុងយ៉ាង ប្រទេសកូរ៉េខាងជើងផងដែរ។ នេះបើតាមសម្ដេចក្រុមព្រះ។

គួរបញ្ជាក់ថា ទំនាក់ទំនងរវាងប្រទេសកម្ពុជា និងប្រទេសកូរ៉េខាងជើង បានចាប់ផ្ដើមឡើងនៅក្នុងឆ្នាំ ១៩៦៥ ដែលកាលណោះព្រះបរមរតនកោដ្ឋ នរោត្តម សីហនុ បានជួបជាមួយលោក គីម អ៊ីលស៊ុង នៅក្នុងទីក្រុង Jakarta ប្រទេសឥណ្ឌូណេស៊ី។ ហើយនៅឆ្នាំ១៩៧០ ក្រោយពីសម្ដេចនរោត្តម សីហនុ ត្រូវបានសេនាប្រមុខ លន់ នល់ ធ្វើរដ្ឋប្រហារទម្លាក់ចេញពីតំណែងនោះ ព្រះអង្គក៏បាននិរទ្ទេសខ្លួនរស់នៅប្រទេសកូរ៉េខាងជើង ដោយរដ្ឋាភិបាលកូរ៉េ បានកសាងព្រះរាជដំណាក់មួយជូនព្រះបរមរតនកោដ្ឋ ដែលមានឈ្មោះថា Chansuwon នៅជិតទីក្រុងព្យុងយ៉ាងផងដែរ៕