ជាតិ
លោក ទៀ បាញ់ ប្រាប់អាជ្ញាធរឲ្យចូលរួមសកម្មក្នុងពិធីបុណ្យសពលោក អ៊ឹម សំ
× សៀមរាប៖ លោក ទៀ បាញ់ រដ្ឋមន្ត្រីក្រសួងការពារជាតិ បានថ្លែងទៅកាន់មន្ត្រីរបស់ខ្លួន រួមនិងអាជ្ញាធរទាំងអស់ ត្រូវយកចិត្តទុកដាក់ និងចូលរួមយ៉ាងសកម្ម ក្នុងពិធីបុណ្យសពអនុសេនីយ៍ទោ អ៊ឹម សំ ដែលបានស្លាប់ពេលបំពេញបេសកកម្មរក្សាសន្តិភាពនៅសាធារណរដ្ឋអាហ្វ្រិកកណ្តាល កាលពីថ្ងៃទី៨ ឧសភា ឆ្នាំ២០១៧។ លោក ទៀ បាញ់ ថ្លែងថា នេះជាការពលីជីវិតដ៏ធំធេងសម្រាប់បុព្វហេតុសន្តិភាពពិភពលោក។
ក្នុងពិធីសម្ភោធដាក់ឲ្យប្រើប្រាស់ នូវមណ្ឌលមន្ទីររដ្ឋបាលខេត្តសៀមរាបនៅព្រឹកថ្ងៃទី១៤ ឧសភា លោករដ្ឋមន្ត្រី ទៀ បាញ់ បានរម្លឹកពីវីរភាពរបស់កងកម្លាំងមួកខៀវកម្ពុជា ដែលកំពុងឈរជើងនៅបរទេស។ ហើយសម្រាប់លោក អ៊ឹម សំ លោក ទៀ បាញ់ បានប្រាប់អាជ្ញាធរទាំងអស់ ត្រូវចូលរួមយ៉ាងសកម្មបំផុតក្នុងពិធីបុណ្យសព ដែលគ្រួសារសពគ្រោងនឹងរៀបចំ ពេលដែលសាកសពត្រូវបានបញ្ជូនមកដល់ផ្ទះ ដែលស្ថិតនៅភូមិកំពង់ក្តី ឃុំកំពង់ក្តី ស្រុកជីក្រែង ខេត្តសៀមរាប។
លោក ទៀ បាញ់ បានរម្លឹកទៀតថា កម្ពុជាបានចូលរួមក្នុងបេសកកម្មរក្សាសន្តិភាពជាង១០ឆ្នាំមកហើយ ហើយបេសកកម្មនេះបានរួមចំណែកយ៉ាងខ្លាំងក្លា និងបាននាំកេរ្តិ៍ឈ្មោះកម្ពុជាទៅលើឆាកអន្តរជាតិផង។ លោក ទៀ បាញ់ ដែលជាប្រធានក្រុមការងារថ្នាក់ជាតិចុះជួយខេត្តសៀមរាបថ្លែងថា បច្ចុប្បន្នកម្ពុជាមានកងកម្លាំងរក្សាសន្តិភាព ដែលស្ថិតក្រោមសេនាធិការអង្គការសហប្រជាជាតិ នៅក្រៅប្រទេសមានជិតមួយពាន់នាក់ ក្នុងប្រទេសចំនួន៥។ សម្រាប់សាធារណរដ្ឋអាហ្វ្រិកកណ្តាល ដែលកងទ័ពកម្ពុជាទើបនឹងជួបគ្រោះថ្នាក់ប៉ះទង្គិចគ្នាជាមួយក្រុមឧទ្ទាមស្លាប់៤នាក់នោះ មានកងទ័ពជិត២០០នាក់។
គួររម្លឹកថា នៅថ្ងៃចន្ទទី ៨ ខែ ឧសភា ក្រុមឧទ្ទាម Anti-Balaka បានវាយប្រហារលើកងកម្លាំងថែរក្សាសន្តិភាព MINUSCA ដែលបណ្តាលឲ្យកងទ័ពមួកខៀវខ្មែរ៤នាក់ស្លាប់ របួស១នាក់ រីឯទ័ពម៉ារ៉ុក បាត់ខ្លួន១នាក់ និងរបួស៧នាក់។ ជាមួយគ្នានេះ ភាគីខាងឧទ្ទាម ត្រូវបានរាយការណ៍ថា ស្លាប់៨នាក់។ លោក អ៊ឹម សំ ជាជនរងគ្រោះដែលបានទទួលមរណភាពភ្លាមៗនៅកន្លែងកើតហេតុ៕
© រក្សាសិទ្ធិដោយ thmeythmey.com