ជាតិ
លោក ទៀ បាញ់ មិនចង់ឮពាក្យ «ហ៊ុន សែនអើយចុះចេញទៅ» ទៀតឡើយ «លោក ទៀ បាញ់ ពេលសម្ពោធអគាររដ្ឋបាលខេត្តសៀមរាបនៅថ្ងៃទី១៤ ឧសភា ឆ្នាំ២០១៧»។
× សៀមរាប៖ ក្នុងនាមជាប្រធានក្រុមការងារថ្នាក់ជាតិចុះជួយខេត្តសៀមរាបរបស់គណបក្សប្រជាជនកម្ពុជា លោក ទៀ បាញ់ តែងបញ្ចេញសារនយោបាយជាច្រើនតាមវេទិកានៅក្នុងខេត្តមួយនេះ។ លោកបានប្រាប់ឲ្យមន្ត្រីក្រោមឱវាទទាំងអស់ ត្រូវត្រៀមលក្ខណៈអំឡុងពេលចុះឃោសនាបោះឆ្នោតឃុំ សង្កាត់ ដែលនឹងមកដល់ក្នុងពេលឆាប់ៗខាងមុខនេះ។ ក្នុងពិធីមួយកាលពីចុងសប្តាហ៍កន្លងទៅ លោក ទៀ បាញ់ បានបញ្ចេញសារនយោបាយដ៏ក្តៅមួយ ដោយលោកបញ្ជាក់ថា ម្តងនេះលោកមិនចង់ឮពាក្យស្រែកថា «ដូរៗ ហ៊ុន សែនអើយចុះចេញទៅ« ជាដាច់ខាត ដោយលោកចាត់ទុកថា សំដីទាំងនេះធ្វើឲ្យកើតបញ្ហាអស្ថិរភាពក្នុងសង្គម ដែលត្រូវទប់ស្កាត់ជាចាំបាច់។
នៅចំពោះមុខមន្ត្រីរាជការ កងកម្លាំងប្រដាប់អាវុធ សិស្សានុសិស្ស ជាង៣០០នាក់ ក្នុងពិធីសម្ពោធដាក់ឲ្យប្រើប្រាស់មណ្ឌលរដ្ឋបាលមន្ទីរខេត្តសៀមរាបនៅព្រឹកថ្ងៃទី១៤ ខែឧសភា ឆ្នាំ២០១៧ រដ្ឋមន្ត្រីក្រសួងការពារជាតិ លោក ទៀ បាញ់ បានលើកឡើងថា ការកកើតហេតុការណ៍ដែលធ្វើឲ្យមានចលាចល ឬនាំមកនូវសញ្ញាអសន្តិសុខសង្គម ក្នុងរូបភាពណាមួយក៏ដោយ គឺមិនត្រូវបណ្តោយដូចពេលមុនឡើយ។ លោក ទៀ បាញ់ បានលើកជាឧទាហរណ៍ ដោយបន្ថែមថា៖« ...ដើរជេរអានេះឲ្យចុះចេញ អានោះឲ្យចុះចេញ ដូរចេញ ដូរចូល គឺអត់មានទៀតទេ។ ហេតុការណ៍ទាំងនេះ គឺមិនអនុញ្ញាតឲ្យមានទៀតទេ ព្រោះយើងបានចំណាយច្រើនមកហើយ។... ពីមុន មិនដឹងនៅទីណា មិនស្គាល់ពីទុក្ខលំបាកប្រជាជនផង ដល់មកភ្លាមស្រែកដូរ...»។
លោក ទៀ បាញ់ បន្ថែមទៀតថា៖« ពាក្យសំដីទាំងនេះ គឺបង្កើតឲ្យមានសង្គ្រាម ព្រោះជាសំដីញុះញង់ បង្កើតភាពចង្អៀតចង្អល់ជាតិសាសន៍។ ពីមុនគេមិនដឹងនៅទីណា ដល់យើងអនុវត្តន៍គោលនយោបាយឈ្នះៗបានជោគជ័យ មានមនុស្សមួយចំនួនចុះពីណាពីណី មកអួតអាង ស្រែកដូរចេញ។ ហ៊ុន សែនអើយចុះចេញទៅ! អាហ្នឹងគឺថាអត់បានទេ ម្តងនេះគ្មានពាក្យហ្នឹងមកនិយាយទៀតទេ ប្រាប់ឲ្យហើយ។ [សម្តេច ហ៊ុន សែន] ពលីកម្មធំធេងណាស់ វីរភាពរបស់ជាតិយើងដ៏ធំណាស់ នាំមកនូវ [ការអភិវឌ្ឍ] សព្វគ្រប់បែបយ៉ាង គ្រប់យ៉ាងមកដល់សព្វថ្ងៃនេះ...»។
ក្នុងពិធីសម្ពោធអគាររដ្ឋបាលទាំងមានភ្លៀងធ្លាក់ផងនោះ លោក ទៀ បាញ់ លើកឡើងទៀតថា លោកសុំត្រឹមឲ្យអ្នកដទៃ ដែលលោកចង់សំដៅទៅបក្សប្រឆាំង ទទួលស្គាល់រាល់សមិទ្ធផលដែលរាជរដ្ឋាភិបាលបានធ្វើកន្លងមក ព្រោះថា សម្រាប់លោក រហូតបានមកដល់សព្វថ្ងៃនេះ គឺវាលំបាកខ្លាំងណាស់សម្រាប់រាជរដ្ឋាភិបាល ដែលប្រឹងស្ដារប្រទេស ដែលសេសសល់ពីសង្គ្រាម។ លោក ទៀ បាញ់ ព្រមានថា៖« ពេលបោះឆ្នោតចាញ់ មិនព្រមចាញ់ទេ គឺចេញមកព្រោងព្រាត ទាមទារនេះទាមទារនោះ ដាក់បែកធ្មេញឥឡូវហើយ។ ប្រាប់ឲ្យហើយ យើងនិយាយគ្នាឲ្យត្រង់ៗចឹងហ្មង»៕
សូមស្តាប់សំឡេងលោក ទៀ បាញ់៖
© រក្សាសិទ្ធិដោយ thmeythmey.com