ព័ត៌មានជាតិ
ខ្មែរក្រហម
កំណាព្យ
ONE Championship
ចំណេះដឹងទូទៅ
ពន្យល់ពាក្យ
នយោបាយ
សេដ្ឋកិច្ច
សង្គម
ព័ត៌មានកីឡាជាតិ
វិទ្យុ
ព័ត៌មានសុខភាព
រូបត្លុក
ពីនេះ ពីនោះ
ព័ត៌មានអន្តរជាតិ
នយោបាយ
សិល្បៈ
COVID-19
សេដ្ឋកិច្ច
សង្គម
វប្បធម៌
FIFA
កីឡាអន្តរជាតិ
សង្រ្កាន្តឆ្នាំថ្មី
អត្ថបទពាណិជ្ជកម្ម
បទយកការណ៍/សម្ភាស
ជាតិ
ទឹកខ្មៅជ្រលក់ម្រាមដៃ ដែលប្រើសម្រាប់ការបោះឆ្នោត នៅតែមានបញ្ហា
17, May 2017 ,
9:59 pm
រូបភាព
លោក George Engar ឯកអគ្គរដ្ឋទូតនៃប្រតិភូសហភាពអឺរ៉ុបប្រចាំកម្ពុជា ចូលរួមសាកល្បងទឹកខ្មៅ ដោយជ្រលក់ម្រាមដៃ នៅក្នុងសន្និសីទសារព័តមាន នៅថ្ងៃទី១៧ ខែឧសភា ឆ្នាំ២0១៧។
×
ដោយ:
ម៉ៅ សុផា
ភ្នំពេញ៖ គណៈកម្មាធិការជាតិរៀបចំការបោះឆ្នោត (គ.ជ.ប ) បានសាកល្បងរួចហើយ ចំពោះទឹកខ្មៅជ្រលក់ម្រាមដៃ ដែលនឹងត្រូវយកទៅប្រើប្រាស់នៅពេលបោះឆ្នោតថ្នាក់ឃុំ សង្កាត់ នៅថ្ងៃទី៤ ខែមិថុនា ឆ្នាំ២0១៧។ ក្រោយសាកល្បង ដោយមានការជ្រលក់ម្រាមដៃចូលទៅក្នុងទឹកខ្មៅនោះ ភាគីខ្លះ អះអាងថា លាងមិនជ្រះ ហើយភាគីខ្លះទៀត បែរជា អះអាងថា អាចលាងជ្រះ។
ទឹកខ្មៅជ្រលក់ចង្អុលដៃ របស់អ្នកបោះឆ្នោត ដែលនាំមកពីក្រុមហ៊ុននៃប្រទេសឥណ្ឌា ត្រូវបានសាកល្បងរួចហើយ នៅថ្ងៃទី១៧ ខែឧសភា ឆ្នាំ២0១៧នេះ។ ការសាកល្បងនេះ គឺធ្វើឡើងនៅក្នុងសន្និសីទសារព័ត៌មាន ដែលរៀបចំដោយ គ.ជ.ប ដោយមានភាគីពាក់ព័ន្ធជាច្រើនចូលរួម ដូចជា តំណាងប្រទេសជាម្ចាស់ជំនួយ តំណាងអង្គការជាតិ-អន្តរជាតិ និងតំណាងគណបក្សនយោបាយ ជាដើម។
តំណាងចំនួន១៧នាក់ ដែលមកគណបក្សនយោបាយ អង្គការជាតិ-អន្តរជាតិ រួមទាំងអ្នកសារព័ត៌មានផងនោះ បានចូលរួមជ្រលក់ម្រាមដៃ ដើម្បីសាកល្បងគុណភាពទឹកខ្មៅ ថាអាចលាងជ្រះ ឬក៏លាងមិនជ្រះ។ ក្រោយជ្រលក់រួចហើយ មតិផ្ទុយពីគ្នាក្នុងចំណោមអ្នកទាំង១៧នាក់ខាងលើ ក៏កើតឡើង ដោយតំណាងខ្លះ បង្ហាញការគាំទ្រ ហើយតំណាងខ្លះទៀត ក៏មិនគាំទ្រចំពោះទឹកខ្មៅនោះ។
លោក ម៉ន ផល្លា ប្រធានប្រតិបត្តិគណបក្សសង្គ្រោះជាតិ ក្នុងរាជធានីភ្នំពេញ ដែលបានសាកល្បងជ្រលក់ម្រាមដៃនាងខាងស្តាំ ចូលទៅក្នុងទឹកខ្មៅ អះអាងថា សម្រាប់លោក ទឹកខ្មៅជ្រលក់ម្រាមដៃ នៅមិនទាន់មានប្រសិទ្ធភាព ដែលគួរឲ្យទទួលយកនោះទេ ហើយក៏មិនគួរយកទៅប្រើប្រាស់នៅក្នុងការបោះឆ្នោត ដែរ។ លោក និយាយដូច្នេះថា៖«វា ពិបាកទទួលយក។ [……] ខ្ញុំបានជ្រលក់ ហើយប្រហែល១0នាទីក្រោយ បានលាងជ្រះ។ ហើយយើង មើលមួយភ្លែត អត់ឃើញស្នាមខ្មៅ ដូចដែលខ្ញុំបានជ្រលក់លើកដំបូងទេ»។
តាមការសង្កេត ម្រាមដៃនាងខាងស្តាំរបស់លោក ម៉ន ផល្លា ដែលបានជ្រលក់ទឹកខ្មៅនោះ គឺបានលាងជ្រះមែន។ ប៉ុន្តែ មិនមែនលាងជ្រះបាន ១00ភាគរយ នោះទេ។ ប្រសិនបើគេ ព្យាយាមពិនិត្យមើលម្រាមដៃនាងខាងស្តាំរបស់លោក ម៉ន ផល្លា ដែលបានជ្រលក់ចូលទៅក្នុងទឹកខ្មៅ គឺអាចកត់សម្គាល់បានថា ម្រាមដៃនាងខាងស្តាំនោះ គឺមានលក្ខណៈផ្សេងពីម្រាមដៃដទៃទៀត។ ទោះបីជាលាងជ្រះពិតមែន តែម្រាមដៃនាងខាងស្តាំរបស់លោក ម៉ន ផល្លា នៅតែមើលឃើញព័ណ៌ក្រម៉ៅព្រិលៗ ដែលគេអាចសន្និដ្ឋានថា លោក បានជ្រលក់ទឹកខ្មៅនោះ។
ផ្ទុយពីតំណាងគណបក្សសង្គ្រោះជាតិ តំណាងគណបក្សប្រជាជនកម្ពុជា បានលើកឡើងថា ទឹកខ្មៅជ្រលក់ដៃនោះ មានគុណភាពល្អ ដែលអាចយកទៅប្រើប្រាស់នៅក្នុងការបោះឆ្នោត។
លោក ចាន់ សុខសាន្ត អនុប្រធាននាយកដ្ឋានបូកសរុបនៃខុទ្ទកាល័យគណៈកម្មាធិការកណ្តាលរបស់គណបក្សប្រជាជនកម្ពុជា ក៏ទទួលស្គាល់ដែរថា ទឹកខ្មៅនោះ អាចលាងជ្រះ ប៉ុន្តែមិនមែនលាងជ្រះ១00ភាគរយឡើយ។ លោក និយាយដូច្នេះថា៖«លាងជ្រះតែក្រចក តែសាច់ដៃអត់ជ្រះទេ»។
ចំណែកឯ តំណាងអង្គការក្រៅរដ្ឋាភិបាលវិញ អ្នកខ្លះ ក៏អះអាងថា ទឹកខ្មៅនោះ អាចទទួលយកបាន ហើយអ្នកខ្លះទៀត ក៏អះអាងថា មិនអាចទទួលយកបាន។
យ៉ាងណា ទឹកខ្មៅនោះ ត្រូវបានគ.ជ.ប សម្រេចជាផ្លូវការហើយថា នឹងយកទៅប្រើប្រាស់នៅក្នុងការបោះឆ្នោតថ្នាក់ឃុំ សង្កាត់។ នេះបើតាមលោក ស៊ិក ប៊ុនហុក ប្រធានគ.ជ.ប ដែលបានលើកឡើងនៅក្នុងសន្និសីទសារព័ត៌មាន។
លោក ស៊ិក ប៊ុនហុក មិនធានាទេថា ទឹកខ្មៅនោះ មិនអាចលាងជ្រះ១00ភាគរយ ។ លោក បញ្ជាក់ថា គ.ជ.ប នៅមានវិធានការចំនួន៥ផ្សេងទៀត ដើម្បីទប់ស្កាត់កុំឲ្យអ្នកបោះឆ្នោត អាចបន្លំបោះឆ្នោតលើសពីម្តង។
វិធានការទាំង៥ ដែលលោក ស៊ិក ប៊ុនហុក បានលើកឡើងគឺ ចេញឯកសារបញ្ជាក់អត្តសញ្ញាណបម្រើឲ្យការបោះឆ្នោត ដល់អ្នកដែលមិនមានឬបាត់អត្តសញ្ញាណបណ្ណ, ពង្រឹងភារកិច្ចនៃលេខាធិការការិយាល័យបោះឆ្នោត, ណែនាំឲ្យលេខាធិការ គូសលើប្រអប់លេខរៀងនៃបញ្ជីបោះឆ្នោត, រម្លឹកដល់ភ្នាក់ងារគណបក្សនយោបាយ ដែលមានបញ្ជីឈ្មោះនៅក្នុងដៃ ឲ្យតាមដានមើលដំណើរការពិនិត្យផ្ទៀងផ្ទាត់ឯកសារប្រើប្រាស់សម្រាប់ការបោះឆ្នោតរបស់អ្នកបោះឆ្នោត និងព្រមានផាកពិន័យជាប្រាក់ពី ៥លានរៀល ដល់ ២0លានរៀល ចំពោះជនណា ដែលធ្វើឲ្យមានការភាន់ច្រឡំ ហើយនាំឲ្យបាត់បង់ទំនុកចិត្តលើការបោះឆ្នោត។
ប្រធានគ.ជ.បរូបនេះ សង្កត់ធ្ងន់ៗថា៖«ខ្ញុំគិតថា វិធានការ៥យ៉ាងនេះ សំខាន់ជាង (ទឹកខ្មៅ)។ វិធានការទាំងហ្នឹង ខ្ញុំឲ្យសារសំខាន់ជាង ហើយនឹងផ្សាយឲ្យបានទូលំទូលាយជាង។ វិធានការទាំងហ្នឹង ធ្វើឲ្យអ្នកដែលចង់ (បន្លំបោះឆ្នោតលើសពីម្តង) មិនហ៊ានប្រថុយប្រថានទេ»។
សូមបញ្ជាក់ថា
គ.ជ.ប បានចំណាយថវិកាចំនួន ៧.៩ ម៉ឺនដុលា្លរ ដើម្បីទិញទឹកខ្មៅចំនួន ៤៦៥០០ ដប
ពីក្រុមហ៊ុននៃប្រទេសឥណ្ឌា៕
សូមចុចត្រង់នេះដើម្បីអានថ្មីៗជាភាសាអង់គ្លេស (Cambodianess.com)
Tag:
ទឹកខ្មៅជ្រលក់ម្រាមដៃ
© រក្សាសិទ្ធិដោយ thmeythmey.com
អត្ថបទពេញនិយម
នាយទាហាន ៨រូប ត្រូវបានព្រះមហាក្សត្រដំឡើងឋានន្តរស័ក្តិផ្កាយ៤
5 ថ្ងៃ
សត្វជាង ៧០០ប្រភេទ ត្រូវបានរកឃើញក្នុងតំបន់ព្រៃកោងកាងខេត្តកោះកុង
1 សប្តាហ៍
«មជ្ឈការ»មានន័យខុសពី«វិមជ្ឈការ»ដូចម្តេច?
3 ថ្ងៃ
អាចសរសេរបានថា «រួញរា» ឬ «រញ់រា» ប៉ុន្តែមិនមែន «រុញរា» ឡើយ
5 ថ្ងៃ
«ប្រេសិត»មានន័យដូចម្តេច?
4 ថ្ងៃ
អត្ថបទពេញនិយមបន្ថែម