ជាតិ
ដើម្បីកុំឲ្យមានហិង្សា គ.ជ.ប ហាមបក្សទាំងអស់ជេរគ្នាពេលឃោសនា
× ភ្នំពេញ៖ ការមិនជេរប្រមាថគ្នា គឺជាយន្តការដ៏សំខាន់ ដើម្បីបញ្ចៀសអំពើហិង្សា នៅក្នុងអំឡុងនៃការឃោសនាបោះឆ្នោត។ ផ្ទុយពីការជេរប្រមាថ គណបក្សនយោបាយ ត្រូវឃោសនាពីគោលនយោបាយវិញ ទើបអាចទាក់ទាញសន្លឹកឆ្នោត ពីប្រជាពលរដ្ឋ។ ទាំងនេះ គឺជាការចង់បានរបស់គណៈកម្មាធិការជាតិរៀបចំការបោះឆ្នោត (គ.ជ.ប)។
លោក ហង្ស ពុទ្ធា អ្នកនាំពាក្យគ.ជ.ប បានប្រាប់សារព័ត៌មានថ្មីៗថា កន្លងមក គ.ជ.ប បានសហការយ៉ាងល្អ ជាមួយគណបក្សនយោបាយ ជាពិសេសការទាក់ទងគ្នា ទៅលើកិច្ចការបោះឆ្នោត។ លោក អះអាងថា គ.ជ.ប ក៏បានណែនាំដល់គណបក្សនយោបាយរួចហើយដែរ ជុំវិញបញ្ហាឃោសនាបោះឆ្នោតថ្នាក់ឃុំ សង្កាត់ ដែលនឹងប្រព្រឹត្តទៅនៅថ្ងៃទី២0 ខែឧសភា ដល់ថ្ងៃទី២ ខែមិថុនា ឆ្នាំ២0១៧។
អ្នកនាំពាក្យគ.ជ.ប រូបនេះ សង្កត់ធ្ងន់ថា គោលការណ៍ជាចម្បង ដើម្បីបញ្ចៀសអំពើហិង្សា និងការប៉ះទង្គិចគ្នា នៅក្នុងអំឡុងនៃការឃោសនាបោះឆ្នោត អ្នកគាំទ្រ និងសកម្មជននៃគណបក្សនយោបាយទាំងអស់ ត្រូវឃោសនាតែពីកម្មវិធីនយោបាយ និងគោលនយោបាយ បានហើយ ដោយមិនត្រូវប្រើពាក្យអសុរោះ និងជេរប្រមាថគ្នាទៅវិញទៅមក ឡើយ។ លោក និយាយដូច្នេះថា៖«បើអនុវត្តត្រង់ហ្នឹងបាន គឺយើងអាចបញ្ចៀសអំពើហិង្សាបានហើយ។ បើអ្នកនយោបាយ នៅតែប្រើវោហារសាស្ត្រ ដើម្បីវាយប្រហារអ្នកដទៃ វា គឺជាការខាតប្រយោជន៍របស់ខ្លួនទៅវិញទេ ព្រោះឥឡូវប្រជាពលរដ្ឋ បានទទួលព័ត៌មានអស់ហើយ ហើយក៏ដឹងថា អ្នកណា យ៉ាងម៉េចដែរ»។
ជុំវិញបញ្ហានេះ លោក សូ ចន្ថា អ្នកតាមដានស្ថានការណ៍នយោបាយនៅកម្ពុជា ក៏យល់ឃើញស្រដៀងនឹង លោក ហង្ស ពុទ្ធា ដែរ។ លោក សូ ចន្ថា លើកឡើងថា គ្រប់គណបក្ស នយោបាយ ត្រូវយកគោលនយោបាយ ដែលបង្ហាញពីដំណោះស្រាយនិងការអភិវឌ្ឍប្រទេសជាតិ ទៅឃោសនា ប្រសើរជាងការជេរប្រមាថ ឬការឌឺដងដាក់គ្នា ដែលជាហេតុ នាំឲ្យមានជម្លោះ។ លោក បន្ថែមថា ថ្នាក់ដឹកនាំនៃគណបក្សនយោបាយទាំងអស់ ក៏ត្រូវតែពន្យល់សកម្មជន និងឃោសនិករបស់ខ្លួនឲ្យបានយល់ផងដែរ អំពើក្រមសីលធម៌ ក្នុងការឃោសនាបោះឆ្នោត។
អ្នកតាមដានស្ថានការណ៍នយោបាយរូបនេះ បញ្ជាក់ដូច្នេះថា៖«ដោយសារតែសកម្មជន ប្រកាន់គណបក្សរៀងៗខ្លួន ហើយក៏ប្រើប្រាស់ពាក្យគ្រោតគ្រាតមួយចំនួន ដើម្បីចង់ឈ្នះគ្នា ទើបបណ្តាលឲ្យមានអំពើហិង្សា។ បើពួកគាត់ យល់ពីដំណើរការនៃការឃោសនាក្នុងសង្គមប្រជាធិបតេយ្យ គឺពួកគាត់ គ្រាន់តែឃោសនាទៅ ពេលចប់ គឺយើងជាបងប្អូន ជាជនជាតិតែមួយ អ៊ីចឹង មានរឿងអ្វីត្រូវប៉ះទង្គិចគ្នា»។
កន្លងមកអ្នកនាំពាក្យគណបក្សប្រជាជនកម្ពុជា និងអ្នកនាំពាក្យគណកប្សសង្គ្រោះជាតិ សុទ្ធតែអះអាងថា គណបក្សរបស់ពួកគេ បានណែនាំសកម្មជន និងឃោសនិករួចអស់ហើយ ទាក់ទងនឹងការឃោសនាបោះឆ្នោត។ ពួកគេ លើកឡើងថា ដើម្បីជៀសវាងកុំឲ្យកើតអំពើហិង្សា សកម្មជននិងឃោសនិកទាំងអស់ ត្រូវគោរពគោលការណ៍ និងក្រមសីលធម៌ ដែលគ.ជ.ប បានចែង។
សូមបញ្ជាក់ថា គណបក្សចំនួន១២ បានចូលរួមប្រកួនប្រជែងការបោះឆ្នោតថ្នាក់ឃុំ សង្កាត់ ក្នុងអាណត្តទី៤នេះ។ គណបក្សទាំង១២ មានរយៈពេល១៤ថ្ងៃ ដើម្បីធ្វើយុទ្ធនាការនៃការឃោសនាបោះឆ្នោត៕
© រក្សាសិទ្ធិដោយ thmeythmey.com