នៅថ្ងៃទី២0 ខែឧសភា ឆ្នាំ២0១៧នេះ គណបក្សសង្គ្រោះជាតិ បានចាប់ផ្តើមដង្ហែក្បួនឃោសនា ពីកម្មវិធីនយោបាយ និងគោលនយោបាយ តាមការគ្រោងទុក។ ឯកឧត្តម កឹម សុខា ប្រធានគណបក្សសង្គ្រោះជាតិ និងមន្ត្រីជាន់ខ្ពស់ជាច្រើនរូបទៀត បានស្ថិតនៅក្នុងពិធីដង្ហែក្បួនឃោសនា ជាមួយសកម្មជននិងអ្នកគាំទ្រ។
តាមការប៉ាន់ស្មាន សកម្មជននិងអ្នកគាំទ្រនៃគណបក្សសង្គ្រោះជាតិ ដែលចូលរួមដង្ហែក្បួនឃោសនានាព្រឹកនេះ មិនតិចជាង១ម៉ឺននាក់ ឡើយ។ ភាគច្រើននៃអ្នកគាំទ្រនិងសកម្មជនទាំងនោះ បាននាំគ្នាពាក់អាវ និងមួក ដែលមានរូបសញ្ញារបស់គណបក្សសង្គ្រោះជាតិ។ លើសពីនេះ អ្នកគាំទ្រនិងសកម្មជនខ្លះទៀត ថែមទាំងយករូបសញ្ញាព្រះអាទិត្យ ដែលតំណាងឲ្យគណបក្សសង្គ្រោះជាតិ បិទជាប់នឹងថ្ពាល់និងចិញ្ចើមរបស់ពួកគេ ទៀត ផង។
អ្នកគាំទ្រ សកម្មជន និងមន្ត្រីជាន់ខ្ពស់នៃគណបក្សសង្គ្រោះជាតិ បានជួបជុំគ្នា នៅម៉ោងប្រមាណជា៦ព្រឹក នៅតាមផ្លូវ៦0ម៉ែត្រ ដែលស្ថិតនៅក្នុងសង្កាត់ចាក់អង្រែលើ។ មុននឹងក្បួនឃោសនា ចាប់ផ្តើមចេញដំណើរ ឯកឧត្តម កឹម សុខា បានឡើងនិយាយតាមឧគ្ឃោសនសព្ទ ទៅកាន់អ្នកគាំទ្រនិងសកម្មជនរបស់ខ្លួន។
ឯកឧត្តម កឹម សុខា បានអំពាវនាវឲ្យអ្នកគាំទ្រនិងសកម្មជនទាំងអស់ ប្រកាន់ភ្ជាប់នូវក្រមសីលធម៌ ក្នុងការដង្ហែក្បួនឃោសនា ដោយមិនត្រូវបង្កអំពើហិង្សានិងជេរប្រមាថទៅកាន់អ្នកដទៃ ជាដាច់ខាត។ បន្ទាប់មក ឯកឧត្តម កឹម សុខា បានបកស្រាយយ៉ាងលម្អិតពីគោលនយោបាយអាទិភាពទាំ៥ចំណុច ដែលគណបក្សសង្គ្រោះជាតិ បង្កើតឡើង ដើម្បីយកទៅឃោសនាការបោះឆ្នោតថ្នាក់ឃុំ-សង្កាត់ ក្នុងអាណត្តិទី៤នេះ។
ថ្វីដ្បិតឯកឧត្តម កឹម សុខា មិនបានវាយប្រហារគណបក្សប្រជាជនកម្ពុជាក៏ពិតមែន តែឯកឧត្តម កឹម សុខា បានទិតៀន ជាច្រើនចំពោះប្រព័ន្ធរដ្ឋបាលនៅថ្នាក់ឃុំ-សង្កត់ នាពេលបច្ចុប្បន្ន។ ឯកឧត្តម កឹម សុខា ហ៊ានសន្យាថា វិស័យនានា ដូចជាការអប់រំ ប្រព័ន្ធសុខាភិបាល និងជីវភាពរបស់ប្រជាពលរដ្ឋ នៅតាមមូលដ្ឋាន នឹងមានការរីកចម្រើន ប្រសិនបើគណបក្សសង្គ្រោះជាតិ ឈ្នះការបោះឆ្នោតថ្នាក់ឃុំ-សង្កាត់។
ឯកឧត្តម កឹម សុខា និយាយដូច្នេះ៖«គណបក្សសង្គ្រោះជាតិ សន្យាថា នៅពេលគណបក្សសង្គ្រោះជាតិ ដឹកនាំឃុំ-សង្កាត់ តាមឆន្ទៈប្រជាពលរដ្ឋ ដែលបោះឆ្នោតឲ្យនោះ មេឃុំ-ចៅសង្កាត់របស់គណបក្សសង្គ្រោះជាតិ នឹងផ្តល់សេវាសាធារណៈ ដល់ប្រជាពលរដ្ឋ ឲ្យមានប្រសិទ្ធភាព ឲ្យទាន់ពេលវេលា ឲ្យស្អាតស្អំ និងមិនរើសអើសជាដាច់ខាត។ បើមេឃុំ-ចៅសង្កាត់ណា ដែលជាប់ឆ្នោតហើយ តែមិនធ្វើតាមឆន្ទៈរបស់ប្រជាពលរដ្ឋ មិនបម្រើប្រជាពលរដ្ឋ យើង នឹងដកចេញ ហើយដាក់អ្នកថ្មីជំនួសវិញ»។
ការបរិយាយរបស់ឯកឧត្តម កឹម សុខា អំពីគោលនយោបាយ គឺអមជាមួយនឹងការអំពាវនាវឲ្យប្រជាពលរដ្ឋគ្រប់និន្នាការនយោបាយ រួមទាំងមន្ត្រីរាជការ និងកងកម្លាំងសមត្ថកិច្ច បោះឆ្នោត ឲ្យគណបក្សសង្គ្រោះជាតិ ដើម្បីនាំមកនូវការផ្លាស់ប្តូរ និងការអភិវឌ្ឍនៅតាមមូលដ្ឋាន។
មុននឹងឡើងរថយន្ត លោក យឹម សុវណ្ណ អ្នកនាំពាក្យគណបក្សសង្គ្រោះជាតិ ដែលកំពុងធ្វើដំណើរដោយថ្មើរជើង ជាមួយអ្នកគាំទ្រនិងសកម្មជនក្នុងពិធីដង្ហែក្បួនឃោសនា បានឆ្លៀតផ្តល់បទសម្ភាសខ្លីមួយ ដល់អ្នកកាសែតនៃសារព័ត៌មានថ្មីៗ ជុំវិញទិដ្ឋភាពនៃការដង្ហែក្បួនឃោសនា។ លោក មើលឃើញថា អ្នកគាំទ្រនិងសកម្មជន ដែលបានចូលរួមឃោសនាក្នុងអាណត្តិនេះ គឺមានចំនួនច្រើនជាងអាណត្តិមុនៗ។
តាមរយៈទិដ្ឋភាពនៃអ្នកគាំទ្រនិងសកម្មជនដ៏ច្រើន ដែលចូលរួមឃោសនានៅថ្ងៃនេះ លោក យឹម សុវណ្ណ ហ៊ានសន្និដ្ឋានថា គណបក្សង្គ្រោះជាតិ ប្រាកដជាឈ្នះការបោះឆ្នោតថ្នាក់ឃុំ-សង្កាត់ ដែលនឹងប្រព្រឹត្តទៅនៅថ្ងៃទី៤ ខែមិថុនា ឆ្នាំ២0១៧។ លោក និយាយបែបនេះ៖«ខ្ញុំឃើញ អ្នកចូលរួមច្រើនកុះករ មានន័យថាគណបក្សសង្គ្រោះជាតិ មានអ្នកគាំទ្រច្រើន ហើយយើងសង្ឃឹមថា នឹងឈ្នះឆ្នោត។ អ្នកគាំទ្រចូលរួមច្រើន ហើយគគ្រឹកគគ្រេង ជាងអាណត្តិមុនៗ ឆ្ងាយណាស់»។
រហូតមកដល់ពេលនេះ គេ មិនទាន់ឃើញ ក្បួនដង្ហែគណបក្សសង្គោះជាតិ ប៉ះទង្គិចជាមួយនឹងកម្លាំងសមត្ថកិច្ច ឬក៏មានអំពើហិង្សាណាមួយ កើតឡើងនោះទេ បើទោះបីជាមានភាពគគ្រឹកគគ្រេង និងក្តុងក្តាំង ដោយសារតែការចាក់មេក្រូ និងការស្រែកហ៊ោ ក្នុងអំឡុងនៃការឃោសនា នៅតាមដងផ្លូវ ក៏ពិតមែន។ មែនទែនទៅ សូម្បីតែពាក្យសម្តីអសុរោះ ឬការឌឺឌងដាក់គ្នា ក៏មិនបានកើតឡើងរវាងអ្នកចូលរួមដង្ហែក្បួនឃោសនារបស់គណបក្សសង្គ្រោះជាតិ និងកម្លាំងសមត្ថកិច្ច ដែរ។ ទាំងនេះ គឺជាការលើកឡើងរបស់អ្នកគាំនិងសកម្មជននៃគណបក្សសង្គ្រោះជាតិមួយចំនួន ដែលបានចូលរួមដង្ហែក្បួនឃោសនាបោះឆ្នោត។
អ្នកគាំទ្រនិងសកម្មជនទាំងនោះ បានប្រាប់អ្នកកាសែតនៃសារព័ត៌មានថ្មីៗថា ពួកគេ សង្កេតឃើញ កម្លាំងសមត្ថកិច្ច ខិតខំជួយសម្រួលចរាចរ ដើម្បីឲ្យក្បួនឃោសនារបស់គណបក្សសង្គ្រោះជាតិ ធ្វើដំណើរដោយរលូន។ បុរសម្នាក់ ដែលជាអ្នកគាំទ្រគណបក្សសង្គ្រោះជាតិ បានលើកឡើងដូច្នេះថា៖«គ្មានទេ! តាំងពីខ្ញុំហែមក រហូតមកដល់ពេលនេះ ដូចអត់មានប្រទាំងប្រទើសអ្វីជាមួយសមត្ថកិច្ចផង។ ពួកគាត់ ជួយសម្រួលចរាចរ ឲ្យយើងហែបានស្រួល។ សូមសរសើរនិងអរគុណបងៗសមត្ថកិច្ច»។
«ជ័យយោ គណបក្សសង្គ្រោះជាតិ! ឈ្នះ មិនឈ្នះ! ឈ្នះ! ដូរមិនដូរ! ដូរ!»។ ទាំងនេះគឺជាសំឡេងស្រែករបស់អ្នកគាំទ្រនិងសកម្មជននៃគណបក្សសង្គ្រោះជាតិ។ ពួកគេ នាំគ្នាស្រែបែបនេះដដែល នៅក្នុងពិធីដង្ហែក្បួនឃោសនាបោះឆ្នោត។
នៅម៉ោងប្រមាណជា១២ថ្ងៃត្រង់ ក្បួនឃោសនារបស់គណបក្សសង្គ្រោះជាតិ បានដល់ម្តុំ កាំកូ ស៊ីតធី (Camko City) ។ ពួកគេ បានឈប់សម្រាកនៅទីនោះមួយស្របក់ ដើម្បីហូបអាហារ។ បន្ទាប់មក ពួគេ ក៏បន្តដំណើរទៅមុនទៀត តាមផ្លូវនានា ដែលបានគ្រោងទុក។
តាមការគ្រោងទុក ក្បួនឃោសនារបស់គណបក្សសង្គ្រោះជាតិ ត្រូវទៅជួបជុំគ្នានឹងនៅម្តុំវត្តជម្ពូវន្ត នៅពេលល្ងាច។ ក្បួនឃោសនារបស់គណបក្សសង្គ្រោះជាតិ នឹងរំសាយនៅទីនោះតែម្តង។
គណបក្សសង្គ្រោះជាតិ នឹងចាប់ផ្តើមដង្ហែក្បួនឃោសនាម្តងទៀត នៅថ្ងៃទី២ ខែមិថុនា ឆ្នាំ២0១៧។ ចាប់ពីថ្ងៃទី២១ ខែឧសភា រហូតដល់ថ្ងៃទី១ ខែមិថុនា ឆ្នាំ២0១៧ គណបក្សសង្គ្រោះជាតិ មិនអាចដង្ហែក្បួនឃោសនា នោះទេ។ មូលហេតុនោះ គឺថា គណៈកម្មាធិការជាតិរៀបចំការបោះឆ្នោត បានកំណត់ឲ្យគណបក្សនយោបាយទាំងអស់ មានរយៈពេលតែ២ថ្ងៃប៉ុណ្ណោះ ក្នុងការដង្ហែក្បួនឃោសនាបោះឆ្នោត៕