ជាតិ
×![]()
សៀមរាប៖ ចម្លាក់ផ្កាឈូកមួយដ៏ធំ ដែលមានទីតាំងនៅលើរានហាលលានជល់ដំរីផ្នែកខាងជើង កំពុងត្រូវបានជួសជុលដោយអ្នកជំនាញរបស់អាជ្ញាធរជាតិអប្សរា។ តាមអ្នកជំនាញ ចម្លាក់នេះត្រូវបានសាងសង់ឡើងនៅសម័យក្រោយបាយ័ន ហើយដែលមានកម្ពស់១ម៉ែត្រកន្លះ និងអង្កត់ផ្ចិត៣ម៉ែត្រកន្លះ ដោយផ្គុំឡើងពីថ្មភក់តូចៗចំនួន៦៩ដុំ និងមានជើងទម្រជាថ្មបាយក្រៀម។
លោក ម៉ៅ សុខនី មន្ត្រីនាយកដ្ឋានអភិរក្សប្រាសាទក្នុងឧទ្យានអង្គរ និងជាអ្នកមើលការខុសត្រូវក្នុងការដ្ឋានជួសជុលត្របកផ្កាឈូក បានឲ្យដឹងថា ការជួសជុលដោយសារអ្នកជំនាញមើលឃើញពីហានិភ័យរបស់វា ដែលនឹងអាចខូចខាតខ្លាំងប្រសិនមិនបានយកចិត្តទុកដាក់។ លោកបន្ថែមថា នៅពាក់កណ្តាលឆ្នាំ២០១៥ ក្នុងរដូវវស្សាពេលមានភ្លៀងធ្លាក់ខ្លាំង ធ្វើឲ្យទឹកហូរច្រោះគ្រឹះ និងធ្វើឲ្យចម្លាក់ផ្លាឈូល របេះធ្លាក់ថ្មមួយចំនួននៅជ្រុងនិរតី។ នៅពេលនោះ ក្រុមការងារនៃនាយកដ្ឋានអភិរក្សប្រាសាទក្នុងឧទ្យានអង្គរ ក៏បានទល់ទ្រជាបណ្តោះអាសន្ន។
ក្រោយការសិក្សា និងសិក្សាតម្រង់ប្លង់រួចមក នៅពាក់កណ្តាលឆ្នាំ២០១៦ ចម្លាក់ផ្កាឈូកក៏ត្រូវបានចាប់ផ្តើមជួសជុល ហើយគ្រោងនេះអាចនឹងបញ្ចប់នៅក្នុងខែសីហា ឆ្នាំ២០១៧នេះ។ លោក សុខនីបន្ថែមថា ចម្លាក់នេះធ្លាប់បានជួសជុលម្តងរួចមកហើយ ដោយសាលាបារាំងចុងបូព៌ា អំឡុងឆ្នាំ១៩៩៥។ សម្រាប់ការជួសជុលលើកទី២នេះ គឺធ្វើឡើងដោយអ្នកជំនាញរបស់អាជ្ញាធរជាតិអប្សរាផ្ទាល់ ដោយមានការឆ្លងយោបល់ពីគណៈកម្មាធិការអាយស៊ីស៊ីអង្គរផង។
បច្ចុប្បន្នការដ្ឋានជួសជុលត្របកផ្កាឈូកបានចំនួន៧០%ហើយ។ ដោយអ្នកជំនាញបានរៀបគ្រឹះ និងស្រទាប់ត្របកឈូកទី១ ហើយបន្តរៀបត្របកទី២ និងកំពូល។ ក្នុងការជួសជុលនេះ លោក សុខនី បញ្ជាក់ថា មានការកាត់ថ្មថ្មីខ្លះដើម្បីជំនួសកន្លែងខ្លះដែលបាត់ថ្មចាស់ផងដែរ៕
Tag:
ផ្កាឈូក
លានជល់ដំរី
© រក្សាសិទ្ធិដោយ thmeythmey.com
