ជាតិ
Habitat YLB នឹងបន្តសាងសង់លំនៅដ្ឋានដល់ពលរដ្ឋកម្ពុជា ដើម្បីកាត់បន្ថយកង្វះខាតលំនៅដ្ឋាន
× ភ្នំពេញ៖ យុទ្ធនាការអ្នកដឹកនាំសាងសង់លំនៅដ្ឋានវ័យក្មេង បានដឹកនាំយុវជនចំនួន ១៣០០នាក់ មកពីគ្រឹះស្ថានអប់រំ បុគ្គលិកក្រុមហ៊ុនមួយចំនួន ចុះសាងសង់លំនៅដ្ឋានក្នុងសហគមន៍ទួលសំបូរកាលពីថ្ងៃទី២០ ឧសភា។ ក្នុងយុទ្ធនាការនេះ យុវជនទាំងអស់ បានរួមគ្នាសាងសង់បង្គន់អនាម័យដល់ប្រជាពលរដ្ឋចំនួន ១០បង្គន់ និងសម្អាតបរិស្ថាន រួមទាំងលាបរបងសាលា ជញ្ជាំងសាលា ជួសជុលផ្លូវថ្នល់ជាដើម។ យុទ្ធនាការអ្នកដឹកនាំសាងសង់លំនៅដ្ឋានវ័យក្មេង នឹងបន្តសាងសង់លំនៅដ្ឋានដល់ប្រជាពលរដ្ឋកម្ពុជា ដែលមានលំនៅដ្ឋានមិនសមរម្យ ដើម្បីកាត់បន្ថយកង្វះខាតលំនៅដ្ឋាន។
ឆ្នាំនេះជាឆ្នាំទី៥ សម្រាប់អង្គការលំនៅដ្ឋានមនុស្សជាតិកម្ពុជា ដែលរៀបចំយុទ្ធនាការអ្នកដឹកនាំសាងសង់លំនៅដ្ឋានវ័យក្មេង។ យុទ្ធនាការអ្នកដឹកនាំសាងសង់លំនៅដ្ឋានវ័យក្មេងឆ្នាំនេះ បានចុះទៅសហគមន៍ទួលសំបូរ ស្ថិតនៅសង្កាត់ព្រៃវែង ខណ្ឌដង្កោ ដើម្បីជួសជុលលំនៅដ្ឋាន ជួសជុលផ្លូវថ្នល់ សម្អាតសហគមន៍ និងលាបជញ្ជាំង និងរបងសាលារៀនផ្សេងៗ។ យុទ្ធនាការនេះ បានកៀរគរអ្នកស្ម័គ្រចំនួន ១៣០០នាក់ ជាសិស្សនិស្សិត និងបុគ្គលិកនៅតាមស្ថាប័នផ្សេងៗ ក្នុងការសាងសង់សហគមន៍ខាងលើ កាលពីថ្ងៃទី២០ ឧសភា។
កញ្ញា ងិន លីដា អ្នកជំនាញអភិវឌ្ឍន៍ធនធាន ទំនាក់ទំនង និងតស៊ូមតិ នៃអង្គការលំនៅដ្ឋានមនុស្សជាតិកម្ពុជា បានឲ្យដឹងថា៖ «យុទ្ធនាការអ្នកដឹកនាំសាងសង់លំនៅដ្ឋានវ័យក្មេង នឹងបន្តសាងសង់លំនៅដ្ឋានដល់ប្រជាពលរដ្ឋកម្ពុជា ដែលមានលំនៅដ្ឋានមិនសមរម្យបន្ថែមទៀត ដើម្បីកាត់បន្ថយកង្វះខាតលំនៅដ្ឋាន »។ កញ្ញា លីដា បន្ថែមថា ដើម្បីបន្តយុទ្ធនាការនេះ អង្គការលំនៅដ្ឋានមនុស្សជាតិកម្ពុជា បានសហការជាមួយក្រសួងដែនដីនគរូបនីយកម្ម ដើម្បីពង្រឹងគោលនយោបាយលំនៅដ្ឋានមនុស្សជាតិផងដែរ។
អ្នកជំនាញអភិវឌ្ឍន៍ធនធាន ទំនាក់ទំនង និងតស៊ូមតិរូបនេះ បញ្ជាក់ថា យុទ្ធនាការអ្នកដឹកនាំសាងសង់លំនៅដ្ឋានវ័យក្មេង គឺចង់បានការបរិច្ចាគពេលវេលា កម្លាំងកាយ និងកម្លាំងចិត្តរបស់យុវជន ដោយឲ្យពួកគាត់យល់ពីបញ្ហាលំនៅដ្ឋាន។ ជាពិសេស ដើម្បីលើកកម្ពស់តម្រូវការលំនៅដ្ឋាននៅកម្ពុជា។ កញ្ញា ងិន លីដា បន្តថា សកម្មភាពបែបនេះ នឹងមានជារៀងរាល់ឆ្នាំរហូតដល់ឆ្នាំ២០២០-២០៣០ ដើម្បីកាត់បន្ថយកង្វះខាត់លំនៅដ្ឋាន។
គួរបញ្ជាក់ថា យុទ្ធនាការអ្នកដឹកនាំសាងសង់លំនៅដ្ឋានវ័យក្មេងឆ្នាំ២០១៧នេះ ជាឆ្នាំទី៥ ដែលមានអ្នកស្ម័គ្រចិត្តជាសិស្សនិស្សិត និងបុគ្គលិកក្រុមហ៊ុនចូលរួមចំនួន ១៣០០នាក់។ ដោយឡែកកាលពីឆ្នាំ២០១៦ យុទ្ធនាការអ្នកដឹកនាំសាងសង់លំនៅដ្ឋានវ័យក្មេង មានអ្នកស្ម័គ្រជាង ៥០០នាក់ បានជួសជុសលំនៅដ្ឋាន ចំនួន ១៦ខ្នង និងជួសជុសផ្លូវសហគមន៍មួយខ្សែ ក្នុងសហគមន៍ត្រពាំងអញ្ចាញ រាជធានីភ្នំពេញ៕
Tag:
យុទ្ធនាការអ្នកដឹកនាំសាងសង់លំនៅដ្ឋានវ័យក្មេង
Habitat YLB
© រក្សាសិទ្ធិដោយ thmeythmey.com