បក្សសំបុកឃ្មុំ មានគោលនយោបាយបង្កើតក្លិបកីឡាសម្រាប់យុវជនហាត់ប្រាណ

ជាតិ

បទយកការណ៍ / បទសម្ភាសន៍

បក្សសំបុកឃ្មុំ មានគោលនយោបាយបង្កើតក្លិបកីឡាសម្រាប់យុវជនហាត់ប្រាណ

22, May 2017 , 3:58 pm

រូបភាព

ដោយ:

គណបក្សសំបុកឃ្មុំសង្គមប្រជាធិបតេយ្យ បានដាក់បេក្ខជនឈរឈ្មោះបោះឆ្នោតនៅក្នុងឃុំ សង្កាត់ចំនួន ២៥០ ក្នុងចំណោមឃុំ សង្កាត់ទូទាំងប្រទេសចំនួន ១៦៤៦ ។ ប្រធានគណបក្សលោក ម៉ម សូណង់ដូ បានថ្លែងថា គណបក្សលោកមានគោលនយោបាយសំខាន់ចំនួន ៥ យ៉ាង ដើម្បីអភិវឌ្ឍឃុំ សង្កាត់ នៅពេលដែលបេក្ខជនគណបក្សលោកជាប់ឆ្នោត។ ការបង្កើតក្លិបកីឡា ដើម្បីហាត់ប្រាណ ក៏ស្ថិតនៅក្នុងគោលនយោបាយសំខាន់ៗទាំង ៥ របស់គណបក្សសំបុកឃ្មុំផងដែរ។

សូមអានបទសម្ភាសរវាងលោក ជា ធីរិទ្ធ និពន្ធនាយករងនៃសារព័ត៌មានថ្មីៗ ជាមួយលោក ម៉ម សូណង់ដូ ខាងក្រោម៖

លោក ជា ធីរិទ្ធ៖ គណបក្សសំបុកឃ្មុំសង្គមប្រជាធិបតេយ្យ បានដាក់បេក្ខជនឈរឈ្មោះបោះឆ្នោតឃុំសង្កាត់ ចំនួន ២៥០ ឃុំ-សង្កាត់។ តើគណបក្សលោក បានកំណត់នូវលក្ខណៈសម្បត្តិអ្វីខ្លះ ដើម្បីសម្រេចជ្រើសរើសបេក្ខជនទាំងនោះ ឲ្យឈរឈ្មោះ?

លោក ម៉ម សូណង់ដូ៖ គណបក្សយើង បានកំណត់លក្ខខណ្ឌសម្រាប់បេក្ខជនដែលឈ្មោះ គឺត្រូវមានចិត្តស្នេហាជាតិពិតប្រាកដ។ នេះជាលក្ខខណ្ឌចម្បង ហើយបន្ទាប់មកយើងមើលទៅលើប្រជាប្រិយភាពពួកគាត់នៅក្នុងឃុំ-សង្កាត់ នីមួយៗ និងសមត្ថភាពរបស់ពួកគគាត់។

លោក ជា ធីរិទ្ធ៖ លោកមើលយ៉ាងដូចម្តេចទើបដឹងថា បេក្ខជនរបស់បក្សលោកជាមនុស្ស ស្នេហាជាតិ?

លោក ម៉ម សូណង់ដូ៖ ដោយសារខ្ញុំជាមនុស្សស្នេហាជាតិ និងខ្ញុំហ៊ានធ្វើនូវអ្វីដែលខ្ញុំហ៊ាននិយាយ ខ្ញុំមិនក្បត់ឆន្ទៈប្រជាពលរដ្ឋ ខ្ញុំមិនលក់ឧត្តមគតិ ខ្ញុំធ្លាប់ជាប់គុក នៅតែមិនខ្លាច។ ដូច្នេះខ្ញុំងាយនឹងមើលទឹកចិត្តមនុស្សដែលស្រឡាញ់ជាតិដឹងណាស់។ ម្យ៉ាងពួកគាត់ចូលរួមជាមួយខ្ញុំ ដោយសារពួកគាត់ចូលចិត្តសកម្មភាព និងសេចក្តីក្លាហានរបស់ខ្ញុំ។

លោក ជា ធីរិទ្ធ៖ តើក្នុងចំណោម ២៥០ ឃុំ សង្កាត់ ដែលគណបក្សលោកបានដាក់បេក្ខជនឈរឈ្មោះ នៅខេត្តណាច្រើនជាងគេ? ព្រោះអ្វី?

លោក ម៉ម សូណង់ដួ៖ គណបក្សរបស់ខ្ញុំ បានដាក់បេក្ខជនច្រើនជាងគេនៅខេត្តព្រៃវែង។ នៅក្នុងខេត្តនេះ យើងឈរឈ្មោះចំនួន ៦០ ឃុំ ។ មូលហេតុ ដោយសារនៅក្នុងខេត្តនេះ ប្រជាពលរដ្ឋគាំទ្រយើងច្រើន ហើយប្រជាពលរដ្ឋនៅខេត្តនេះ ភាគច្រើនស្តាប់វិទ្យុខ្ញុំឮ។

លោក ជា ធីរិទ្ធ៖ តើគណបក្សលោក មានគោលនយោបាយពិសេសអ្វីខ្លះ ដើម្បីទាក់ទាញប្រជាពលរដ្ឋ? ហើយបើបេក្ខជនបក្សលោកជាប់ជាមេឃុំ ដោះស្រាយបញ្ហាអ្វីមុនគេ?

លោក ម៉ម សូណង់ដូ៖ មេឃុំគណបក្សសំបុកឃ្មុំសង្គមប្រជាធិបតេយ្យជាប់ឆ្នោត យើងនឹងដោះស្រាយបញ្ហាសំខាន់ៗ ដែលបានកំណត់ជាគោលនយោបាយរបស់បក្សយើង។ បញ្ហាទាំងនោះដូចជា ទី ១ បោះសម្អាតអំពើពុករលួយ គ្រឿងញៀន ល្បែងស៊ីសង និងបម្រើសេវាសាធារណៈ ដោយគោរពតាមច្បាប់កំណត់។ ទី២ ប្រជាពលរដ្ឋត្រូវមានបាយទទួលទាន មានពេទ្យព្យាបាល មានការសិក្សាប្រកបដោយគុណភាព និងក្រមសីលធម៌។ ទី ៣ ការពារដីធ្លី លំនៅដ្ឋាន និងទប់ស្កាត់បទល្មើសនេសាទខុសច្បាប់។ ទី៤ ជួសជុល និងកសាងបន្ថែម ហេដ្ឋារចនាសម្ព័ន្ធ ដូចជា លូបង្ហូរទឹក ផ្លូវលំ ស្ពាន ទំនប់ទឹក ប្រឡាយទឹក ស្រះទឹក អណ្តូងទឹក។ ទី ៥ បង្កើតក្លិបកីឡា សម្រាប់យុវជន បង្កើតការងារ និងតំបន់ទេសចរណ៍។

លោក ជា ធីរិទ្ធ៖ ខ្ញុំចាប់អារម្មណ៍ ត្រង់គោលនយោបាយ បង្កើតក្លិបកីឡា។ លោក អាចពន្យល់ថា ហេតុអ្វីបានជាបក្សលោកសម្រេចយកការបង្កើតក្លិបហាត់ប្រាណនេះ ដាក់នៅក្នុងគោលនយោបាយ?

លោក ម៉ម សូណង់ដូ៖ ខ្ញុំសូមបញ្ជាក់ថា យើងបង្កើតក្លិបកីឡា ដើម្បីឲ្យយុវជនហាត់ប្រាណ នៅក្នុងឃុំ សង្កាត់របស់ពួកគេតែម្តង។ យើងយល់ថា សុខភាពនេះសំខាន់ណាស់ សម្រាប់ប្រជាពលរដ្ឋខ្មែរជាពិសេសយុវជន ដើម្បីមានលទ្ធភាពដឹកនាំ និងអភិវឌ្ឍប្រទេសជាតិ។ បក្សយើងចង់ឲ្យយុវជននាំគ្នាហាត់ប្រាណទាំងអស់គ្នា។ ម្យ៉ាងមកពីខ្ញុំខ្លួនឯងស្រឡាញ់ហាត់ប្រាណ ដោយចូលចិត្តហាត់ប្រដាល់៕