គណៈដឹកនាំនៃសាសនាឥស្លាមប្រាប់ឲ្យពលរដ្ឋមើលខ្នើតដើម្បីត្រៀមចូលខែបួស

ជាតិ

គណៈដឹកនាំនៃសាសនាឥស្លាមប្រាប់ឲ្យពលរដ្ឋមើលខ្នើតដើម្បីត្រៀមចូលខែបួស

25, May 2017 , 8:19 am

រូបភាព

«លោក សុះ កំរ៉ី ចាងហ្វាងនៃគណៈដឹកនាំជាន់ខ្ពស់នៃសាសនាឥស្លាមកម្ពុជា»។ រូបភាពពីហ្វេសប៊ុកលោក។

ដោយ: អុីសា រ៉ហានី (Isa Rohany)

គណៈដឹកនាំជាន់ខ្ពស់នៃសាសនាឥស្លាមកម្ពុជា តាមរយៈសេចក្តីជូនដំណឹងរបស់ខ្លួន បានប្រាប់ទៅដល់ពលរដ្ឋ និងថ្នាក់ដឹកនាំសហគមន៍ខ្មែរឥស្លាមទាំងអស់ ឲ្យចាំមើលខែខ្នើតដើម្បីកំណត់ថ្ងៃចូលបួស ឬខែរ៉ម៉ាទន ក្នុងឆ្នាំ២០១៧នេះ។

តាមសេចក្តីជូនដំណឹង គណៈដឹកនាំជាន់ខ្ពស់នៃសាសនាឥស្លាមកម្ពុជា បានប្រាប់ទៅអ៊ីមាំគ្រប់ជាន់ថ្នាក់ ត្រូវសហការចាត់តាំងគណៈកម្មការ ដើម្បីមើលខែខ្នើតខែរ៉ម៉ាទនឲ្យបានត្រឹមត្រូវ និងត្រូវបានលក្ខខណ្ឌដែលអាចជឿជាក់បាននៅល្ងាចថ្ងៃសុក្រទី២៩ ខែសាក់ពាន ឆ្នាំ១៤៣៨ មូហាំម៉ាត់ហិជ្ជរោះ (ខែសាសនាឥស្លាម) ដែលត្រូវនឹងថ្ងៃទី២៦ ឧសភា ឆ្នាំ២០១៧។ គណៈដឹកនាំឥស្លាមកម្ពុជាបានបញ្ជាក់ថា៖« បើមើលឃើញខ្នើតខែ ការចូលបួសត្រូវចាប់ផ្តើមថ្ងៃសៅរ៍ ទី២៧ ឧសភា។ បើសិនមើលមិនឃើញ យើងកំណត់យកថ្ងៃសៅរ៍ជាថ្ងៃរាប់បង្គ្រប់ចំនួន ៣០ថ្ងៃ នៃខែសាក់ពាន ហើយការចូលបួសត្រូវចាប់ផ្តើមនៅថ្ងៃអាទិត្យទី២៨ ឧសភា ឆ្នាំ២០១៧ ជាកំហិត»។

លោក សុះ កំរ៉ី ដែលជាចាងហ្វាងនៃគណៈដឹកនាំជាន់ខ្ពស់សាសនាឥស្លាមកម្ពុជា បានបញ្ជាក់ថា អ៊ីមាំគ្រប់រាជធានី ខេត្តទាំងអស់ ព្រមទាំងសាសនិកឥស្លាម ត្រូវធ្វើការត្រួតពិនិត្យជាបន្ទាន់ និងកុំអាលផ្សព្វផ្សាយ ត្រូវរាយការណ៍ដល់ថ្នាក់លើដើម្បីត្រួតពិនិត្យ និងសម្រេចប្រកាសតាមប្រពន្ធផ្សព្វផ្សាយជាផ្លូវការ។ ការផ្សព្វផ្សាយ នឹងត្រូវផ្សព្វផ្សាយនៅតាមស្ថាប័នព័ត៌មានមួយចំនួន មានដូចជាទូរទស្សន៍បាយ័ន អប្សរា នៅល្ងាចថ្ងៃទី២៦ ឧសភា វេលាម៉ោង ៧និង១៥នាទី ឬតាមវិទ្យុ FM 96 MHz នៅម៉ោង ៩យប់៕