ជាតិ
ឧទ្ធរណ៍ សម្រេចដូចសាលាដំបូង ដែលបន្តឃុំមន្ត្រីអាដហុក ៦ខែទៀត
× ភ្នំពេញ៖ សាលាឧទ្ធរណ៍ មិនជំទាស់នឹងសាលាដំបូងរាជធានីភ្នំពេញនោះទេ ដែលបន្តឃុំមន្ត្រីអាដហុកទាំង៤រូប ក្នុងពន្ធានាគារចំនួន៦ខែ បន្ថែមទៀត ។ នេះ ជាការអះអាងរបស់មេធាវី ដែលការពារក្តីឲ្យមន្ត្រីអាដហុកទាំង៤រូប ខាងលើ។
នៅព្រឹកថ្ងៃពុធនេះ សាលាឧទ្ធរណ៍ បានបើកសវនាការ លើសំណើរបស់ក្រុមមេធាវី ដែលសុំប្រឆាំងនឹងសេចក្តីសម្រេចរបស់ចៅក្រមស៊ើបសួរនៃសាលាដំបូងរាជធានីភ្នំពេញ ដែលកំណត់ឲ្យមន្ត្រីអាដហុកទាំង៤រូប ជាប់ឃុំក្នុងពន្ធនាគាររយៈពេល ៦ខែបន្តទៀត ពាក់ព័ន្ធនឹងរឿងអាស្រូវរបស់ស្រីមុំ តាំងពីឆ្នាំ២0១៦ មក។ ក្រោយបញ្ចប់សវនាការ សាលាឧទ្ធរណ៍ ក៏បានប្រកាសថា សេចក្តីសម្រេចរបស់សាលាដំបូងរាជធានីភ្នំពេញ គឺសមហេតុផល។
លោក ឡោ ជុនធី មេធាវី១រូបរបស់មន្ត្រីអាដហុក បានប្រាប់សារព័តមានថ្មីៗថា ហេតុផលរបស់សាលាឧទ្ធរណ៍ ក្នុងការបន្តឃុំមន្ត្រីអាដហុក គឺមិនខុសពីសាលាដំបូងរាជធានីភ្នំពេញ នោះទេ។ លោក និយាយដូច្នេះថា៖«ចៅក្រមស៊ើបសួរនៃសាលាដំបូងរាជធានីភ្នំពេញ ថាសំណុំរឿងហ្នឹង មិនទាន់សួរចប់សព្វគ្រប់ ទើបបន្តឃុំពួកគាត់៦ខែទៀត។ ហើយសាលាឧទ្ធរណ៍ ក៏យល់អ៊ីចឹងដែរ។ ហេតុផលគឺដូចគ្នា»។
យ៉ាងណាក៏ដោយ លោក ឡោ ជុនធី នៅតែយល់ថា សំណុំរឿងខាងលើ របស់មន្ត្រីអាដហុក មិនធ្ងន់ធ្ងរឬស្មុគស្មាញ រហូតដល់ចៅក្រមស៊ើបសួរ ត្រូវចំណាយពេលដ៏យូរបែបនេះ ដើម្បីឃុំមន្ត្រីអាដហុក នោះទេ។ បើតាមលោក ឡោ ជុនធី ចៅក្រមស៊ើបសួរ គួរតែឆាប់បញ្ចូនសំណុំរឿង ទៅជំនុំជម្រះ ទើបប្រសើរ។
ដោយឡែក អគ្គលេខាធិការរងនៃគណៈកម្មាធិការជាតិរៀបចំការបោះឆ្នោត (គ.ជ.ប) លោក នី ចរិយា ដែលកំពុងជាប់ឃុំ ដោយសារតែរឿងអាស្រូវរបស់ស្រីមុំដែលនោះ មិនបានប្តឹងទៅកាន់សាលាឧទ្ធរណ៍ ជាមួយនឹងមន្ត្រីអាដហុក ឡើយ។ នេះជាការអះអាងរបស់លោក សំ សុគង់ ដែលជាមេធាវីការពារក្តីឲ្យលោក នី ចរិយា។
លោក សំ សុគង់ ធ្លាប់និយាយថា លោកបានដាក់ពាក្យទៅកាន់ចៅក្រមស៊ើបសួរតែម្តង ដើម្បីសុំឲ្យលោក នី ចរិយា បាននៅក្រៅឃុំ។ ប៉ុន្តែរហូតមកដល់ពេល សំណើរបស់លោក មិនទាន់ទទួលបានការឆ្លើយតបពីចៅក្រមស៊ើបសួរនោះទេ។
សូមបញ្ជាក់ថា មន្ត្រីអាដហុកទាំង៤រូប រួមមាន លោក នី សុខា លោក ណៃ វង់ដា លោក យី សុខសាន្ត និងលោកស្រី លឹម មុន្នី ព្រមទាំងអគ្គលេខាធិការរងគ.ជ.ប លោក នី ចរិយា បានជាប់ពន្ធនាគារ អស់រយៈពេលជាង១ឆ្នាំហើយ។ ចៅក្រមសើបសួរ ទើបតែសម្រេចសាជាថ្មី ដោយឲ្យមន្ត្រីអាដហុក និងមន្ត្រីគ.ជ.ប បន្តជាប់ឃុំជាបណ្តោះអាសន្ន ចំនួន៦ខែទៀត។ មន្ត្រីអាដហុក រងពីបទចោទ «សូកប៉ាន់សាក្សី» ហើយលោក មន្ត្រីគ.ជ.ប រងពីបទចោទ «សមគំនិតក្នុងអំពើសូកប៉ាន់សាក្សី»៕
Tag:
តុលាការ
អាដហុក
គជប
© រក្សាសិទ្ធិដោយ thmeythmey.com