ជាតិ
នយោបាយជាតិ
បក្ស RDP របស់លោកស្រី សុខ រ័ត្នសុវណ្ណបញ្ចៈសីលា៖ ត្រូវដាំដុះគ្រប់រដូវលើដីដែលនៅទំនេរ លោកស្រី សុខ រ័ត្នសុវណ្ណបញ្ចៈសីលា ប្រធានគណបក្សសាធារណរដ្ឋប្រជាធិបតេយ្យ។ រូបថត Thmey Thmey
× គណបក្សសាធារណរដ្ឋប្រជាធិបតេយ្យ (RDP) ដឹកនាំដោយស្ត្រីខ្មែរ-អាមេរិក គឺលោកស្រី សុខ រ័ត្នសុវណ្ណបញ្ចៈសីលា។ គណបក្សនេះបង្កើតឡើងកាលពីឆ្នាំ២០១២ ហើយបានប្រកួតប្រជែងក្នុងការបោះឆ្នោតជ្រើសរើសតំណាងរាស្ត្រអណត្តិទី៥កន្លងមកផងដែរ។ សម្រាប់ការបោះឆ្នោតឃុំសង្កាត់នាពេលខាងមុខ RDP ដាក់បេក្ខភាពប្រកួតប្រជែងនៅឃុំ-សង្កាត់ចំនួន១៤នៅខេត្តបន្ទាយមានជ័យ បាត់ដំបង កំពង់ឆ្នាំង កំពង់ធំ ពោធិ៍សាត់ សៀមរាប ប៉ៃលិន និងឧត្តរមានជ័យ ដោយមានបេក្ខជនសរុប២០៧នាក់ (ស្ត្រី៨៤នាក់)។
គណបក្សសាធារណរដ្ឋប្រជាធិបតេយ្យ បានផ្តោតជាពិសេសទៅលើវិស័យកសិកម្មនៅមូលដ្ឋាន និងទីផ្សាសម្រាប់ផលិតផលកសិកម្ម។ តាមខ្លឹមសារនយោបាយដែលបានផ្សព្វផ្សាយ បក្ស RDP បានលើកឡើងថា ការអភិវឌ្ឍមូលដ្ឋានពឹងផ្អែកជាសំខាន់លើវិស័យកសិកម្មដោយពលរដ្ឋ៧៣ភាគរយជាកសិករ។
«កសិកម្មទាំងអស់ត្រូវមានការដាំដុះ ឲ្យមានគ្រប់រដូវលើដីដែលនៅទំនេរ និងសង់លំនៅដ្ឋាន បង្កើតប្រព័ន្ធធារាស្ត្រឲ្យលឿនបំផុតជូនប្រជាពលរដ្ឋ ទំនប់ ប្រឡាយ អាងទឹក លូទឹក ចែកចាយចូលដល់ប្រព័ន្ធជនបទ ស្រុកស្រែចម្ការ និងទំបន់ ដែលគ្មានទឹកសម្រាប់ប្រើប្រាស់»។ នេះបើតាមខ្លឹមសារនយោបាយរបស់ RDP។
ក្រៅពីនេះ គណបក្សដែលដឹកនាំដោយលោកស្រី សុខ រ័ត្នសុវណ្ណបញ្ចៈសីលា បានលើកឡើងពីគោលការណ៍គ្រប់គ្រងដីធ្លី ទីផ្សារការងារ និងទីផ្សារសម្រាប់ផលិតផលកសិកម្ម។ គណបក្សបានសន្យាថា នឹងបង្កើតវិនិយោគក្នុងប្រទេស និងក្រៅប្រទេស ការពារមិនឲ្យមានការគាបសង្កត់យកលុយពីអ្នកវិនិយោគ ដោយនីតិវិធីច្បាប់រដ្ឋាភិបាលត្រូវបន្ថយពន្ធដារ និងតម្លៃក្នុងការបើកក្រុមហ៊ុន និងមុខរបរទាំងអស់ដើម្បីបង្កើតការងាររោងចក្រ ឲ្យបាន ៥0% នៃការងារ។
ទាក់ទងនឹងលទ្ធិប្រជាធិបតេយ្យនៅមូលដ្ឋាន គណបក្សនឹងប្រគល់សិទ្ធិអំណាចបរិបូរណ៍ បញ្ចេញមតិដោយសេរី តាមបែបប្រជាធិបតេយ្យ ដែលមានចែងក្នុងរដ្ឋធម្មនុញ្ញ និងសេចក្តីថ្លែងការណ៍ជាសាកលពីសិទ្ធិមនុស្ស។ RDP សន្យាផងដែរក្នុងការបញ្ឈប់ពលកម្មកុមារបម្រើតាមផ្ទះ បញ្ហាអន្តោប្រវេសន៍នៅកម្ពុជា និងវិធានការ ក្នុងការការពារច្បាប់ដើម្បីដោះស្រាយបាតុភាពអវិជ្ជមានក្នុងឃុំ-សង្កាត់៕
Tag:
បោះឆ្នោតឃុំ-សង្កាត់
សុខ រ័ត្នសុវណ្ណបញ្ចៈសីលា
© រក្សាសិទ្ធិដោយ thmeythmey.com