ជាតិ
ឃុំ-សង្កាត់៖ គ.ជ.ប លុបឈ្មោះបេក្ខជន៨៨នាក់ ក្រោមហេតុផល... លោក ទេព នីថា អគ្គលេខាធិការ គជប
× ភ្នំពេញ៖ គណៈកម្មាធិការជាតិរៀបចំការបោះឆ្នោត (គ.ជ.ប) បានដកបេក្ខជន៨៨នាក់ ដែលឈរឈ្មោះជាសមាជិកក្រុមប្រឹក្សាឃុំ-សង្កាត់ សម្រាប់ការបោះឆ្នោតឃុំ-សង្កាត់ នាអាណត្តិទី៤ នេះ ចេញពីបញ្ជី។ នេះ បើតាមសេចក្តីសម្រេច របស់គ.ជ.ប។
យោងតាមសេចក្តីសម្រេចខាងលើ ដែលចុះហត្ថលេខាដោយលោក ស៊ិក ប៊ុនហុក ប្រធាន គ.ជ.ប ការលុបឈ្មោះបេក្ខជនក្រុមប្រឹក្សាឃុំ-សង្កាត់ ទាំង៨៨នាក់ គឺដោយសារតែមិនគ្រប់លក្ខខណ្ឌ តាមច្បាប់កំណត់។
បេក្ខជន៦៣នាក់ មិនគ្រប់អាយុ២៥ឆ្នាំ បើគិតទៅដល់ពេលបោះឆ្នោតជ្រើសរើសក្រុមប្រឹក្សាឃុំ-សង្កាត់ នៅថ្ងៃទី៤ ខែមិថុនា ឆ្នាំ២0១៧។ រីឯបេក្ខជន៤នាក់ បានឈរឈ្មោះជាសមាជិកក្រុមប្រឹក្សាឃុំ-សង្កាត់ ឲ្យគណបក្សនយោបាយលើសពី១។ ចំណែក ក្នុងចំណោមបេក្ខជន២១នាក់ មានអ្នកខ្លះ បានសុំលាលែងដោយខ្លួនឯង ហើយអ្នកខ្លះទៀត បានទទួលមរណភាព។ ទាំងនេះ គឺជាហេតុផល ដែលគ.ជ.ប បញ្ជាក់នៅក្នុងសេចក្តីសម្រេចរបស់ខ្លួន ថាត្រូវតែលុបឈ្មោះអ្នកខាងលើ ចេញពីបញ្ជីបេក្ខជនឈរឈ្មោះជាសមាជិកក្រុមប្រឹក្សាឃុំ-សង្កាត់។
បេក្ខជនទាំង៨៨នាក់ ដែលត្រូវលុបចេញពីបញ្ជី គឺមកពីគណបក្សនយោបាយចំនួន៩ គឺគណបក្សប្រជាជនកម្ពុជា គណបក្សសង្គ្រោះជាតិ គណបក្សហ្វ៊ុនស៊ិនប៊ិច គណបក្សសម្ព័ន្ធដើម្បីប្រជាធិបតេយ្យ គណបក្សសំបុកឃ្មុំសង្គមប្រជាធិបតេយ្យ គណបក្សអំណាចខ្មែរ គណបក្សខ្មែររួបរួមជាតិ និងគណបក្សសញ្ជាតិកម្ពុជា៕
Tag:
លុបឈ្មោះបេក្ខជនឃុំ-សង្កាត់
© រក្សាសិទ្ធិដោយ thmeythmey.com