ជាតិ
មន្ទីរសុខាភិបាលរាជធានី នឹងផ្ដល់ថ្នាំអាប៊ែតចំនួន ៥តោន ទប់ស្កាត់ជំងឺគ្រុនឈាមក្នុងរដូវវស្សា
× ភ្នំពេញ៖ មន្ទីរសុខាភិបាលរាជធានីភ្នំពេញ បានត្រៀមផ្ដល់ថ្នាំអាប៊ែតចំនួន៥ តោន និងថ្នាំបាញ់មូស ជូនដល់ប្រជាពលរដ្ឋដែលរស់នៅក្នុងសហគមន៍នៃរាជធានីភ្នំពេញ។ ការផ្ដល់ថ្នាំនេះ ដើម្បីបង្ការទប់ស្កាត់ជំងឺគ្រុនឈាម និងជំងរាតត្បាតផ្សេងៗ ដែលកើតឡើងក្នុងរដូវវស្សា។ នេះបើតាមទីភ្នាក់ងារសារព័ត៌មានកម្ពុជា AKP។
ក្នុងរដូវវស្សានេះ មន្ទីរសុខាភិបាលរាជធានីភ្នំពេញ បានត្រៀមថ្នាំអាប៊ែត និងថ្នាំបាញ់មូស ដើម្បីបង្ការជំងឺគ្រុនឈាម ដែលចម្លងដោយសារមូសខ្លា។ មន្ទីរសុខាភិបាលរាជធានី នឹងយកថ្នាំអាប៊ែត ដើម្បីចែកជូនដល់ពលរដ្ឋដែលរស់នៅសហគមន៍ មានជម្រុកមូសខ្លា សម្រាប់បង្ការ និងការពារកុំឲ្យមានជំងឺគ្រុនឈាម។
ប្រធានមន្ទីរសុខាភិបាលរាជធានីភ្នំពេញ លោក ងី មានហេង បានលើកឡើងថា៖ «នៅរដូវវស្សានេះ មន្ទីរបានផ្សព្វផ្សាយដំណឹងដល់អាជ្ញាធរ និងភ្នាក់ងារសុខាភិបាល នៅតាមភូមិ សង្កាត់ រួចរាល់ហើយ។ ជាពិសេស នៅពេលពិនិត្យឃើញថា ភូមិ សង្កាត់ណាមួយមានជម្រកសត្វមូសខ្លា ត្រូវរាយការណ៍ មកមន្ទីរជាបន្ទាន់ ដើម្បីឲ្យមន្ត្រីជំនាញចុះទៅពិនិត្យ និងដាក់ថ្នាំនៅតាមខ្នងផ្ទះពលរដ្ឋ»។ នេះបើតាមការដកស្រង់សម្ដីរបស់ទីភ្នាក់ងារសារព័ត៌មានកម្ពុជា AKP។
លោក ងី មានហេង បន្ថែមថា ក្រោយពីទទួលបានការរាយការណ៍ថាមានជំងឺគ្រុនឈាមនៅភូមិ សង្កាត់ណាមួយ មន្ត្រីសុខាភិបាលរាជធានី នឹងយកថ្នាំអាប៊ែតទៅដាក់ និងបាញ់ថ្នាំបន្ថែមនៅក្នុងភូមិ សង្កាត់នោះតែម្ដង។ ម្យ៉ាងទៀត ការរាតត្បាត និងកើតឡើងនៅជំងឺគ្រុនឈាម ដោយសារមូសខ្លានេះ មិនមែនរាតត្បាតនៅទូទាំងរាជធានីភ្នំពេញទាំងមូលទេ ពោលគឺកើតមាននៅជាយក្រុងប៉ុណ្ណោះ។
គួរបញ្ជាក់ថា ការរាតត្បាតជំងឺគ្រុនឈាមនេះ អាចកើតឡើងដោយការខ្វះការយកចិត្តទុកដាក់ ក្នុងការសម្អាតផ្ទះ ដោយទុកឲ្យមានសំបកកំប៉ុង ដូង កង់ឡាន ថូផ្កា ដែលមានទឹកដក់ជាប់។ មន្ទីរសុខាភិបាលរាជធានី អំពាវនាវដល់ពលរដ្ឋឲ្យមានការប្រុងប្រយ័ត្ន ត្រូវសម្រាកក្នុងមុង និងត្រូវលុបបំបាត់ជម្រកមូសខ្លា ដែលកើតមានឡើងក្នុងរដូវវស្សានេះ៕
Tag:
ថ្នាំអាប៊ែត
ថ្នាំបាញ់មូស
© រក្សាសិទ្ធិដោយ thmeythmey.com