អន្តរជាតិ
នារីម្នាក់ត្រូវឃុំខ្លួនមួយយប់នៅអាមេរិក ដោយសារសំណេរក្នុងកំណត់ហេតុប្រចាំថ្ងៃរបស់នាង
× កញ្ញា Molly Hill រំពឹងឆ្លងកាត់វិស្សមកាលដ៏រីករាយនៅកោះហាវ៉ៃ ជាមួយមិត្តប្រុសរបស់ខ្លួន ប៉ុន្តែបែរជាបានជួបនូវសុបិនអាក្រក់ទៅវិញ។ គាត់ត្រូវបានអាជ្ញាធរអាមេរិក ឃុំខ្លួនមួយយប់ បន្ទាប់ពីមន្ត្រីគយនៅអាកាសយានដ្ឋាន គិតថា នារីអូស្ត្រាលីម្នាក់នេះ មានគម្រោងធ្វើអន្តោប្រវេសន៍នៅសហរដ្ឋអាមេរិក ដោយយោងតាមសំណេរប៉ុន្មានឃ្លានៅក្នុងសៀវភៅកំណត់ហេតុប្រចាំថ្ងៃ។
Molly Hill ជនជាតិអូស្ត្រាលី អាយុ២៦ឆ្នាំ កាន់ទិដ្ឋាការទៅសហរដ្ឋអាមេរិកដែលមានសុពលភាព៣ខែ។ នាងមានគម្រោងសម្រាកវិស្សមកាលជាមួយមិត្តប្រុសរបស់ខ្លួន ឈ្មោះ Ross ដែលជាជនជាតិអាមេរិក។ Hill បានសរសេរនៅលើហ្វេសប៊ុករបស់ខ្លួនថា៖ «ខ្ញុំត្រូវបានមន្ត្រីអាកាសយានដ្ឋាននាំទៅសាកសួរក្នុងបន្ទាប់អស់រយៈពេលជាច្រើនម៉ោង ហើយមានការឆែកឆេរគ្រប់សព្វបែបយ៉ាង»។
Hill បានអះអាងថា នាងត្រូវបានជាប់សង្ស័យពីបទចង់ស្នាក់នៅសហរដ្ឋអាមេរិកដោយខុសច្បាប់ បន្ទាប់ពីគយអាកាសយានដ្ឋាន Honolulu International Airport មើលឃើញសំណេររបស់នាងនៅលើសៀវភៅកំណត់ហេតុប្រចាំថ្ងៃ ដែលសរសេរថា «Last Day at Work» (ថ្ងៃចុងក្រោយនៃការងារ)។
បើតាមការសន្និដ្ឋានរបស់ Hill មន្ត្រីអាកាសយានដ្ឋាននៅ Honolulu គិតថា នាងបានឈប់ពីការងារនៅអូស្ត្រាលី ហើយមានចង់ធ្វើអន្តោប្រវេសន៍ដោយខុសច្បាប់នៅហាវ៉ៃ ពោលគឺមិនមែនសម្រាកវិស្សមកាលតែរយៈពេល៣ខែនោះឡើយ។ ក្រោយដាក់ការសង្ស័យ Hill ត្រូវបញ្ជូនទៅឃុំខ្លួនមួយយប់។ រយៈពេលពេញ១ថ្ងៃ Hill មិនអាចទាក់ទងទៅអ្នកណាបាននោះឡើយ សូម្បីតែមិត្តប្រុសរបស់នាង ដែលបានរង់ចាំនៅកន្លែងយកអ៊ីវ៉ាន់។
ជាមួយគ្នានេះផងដែរ Hill ត្រូវបានចោទសួរជាច្រើនសំណួរទាក់ទងនឹងស្នាមសាក់នៅលើខ្លួន។ អាជ្ញាធរអាមេរិកពិតឃើញថា ស្នាមសាក់របស់នាងមិនជាប់ពាក់ព័ន្ធនឹងសកម្មភាពក្រុមជើងកាងណាមួយឡើយ ទីបំផុតពួកគេសម្រេចដោះលែង និងបញ្ជូននាងត្រឡប់ទៅកាន់ប្រទេសអូស្ត្រាលីវិញ។
ឆ្លងផុតមួយរាត្រីនៃការឃុំខ្លួន វាថ្ងៃខួបកំណើតរបស់ Hill ផ្ទាល់ ប៉ុន្តែវាជាសុបិនអាក្រក់មួយ ដោយនាងត្រូវបានមន្ត្រីអាកាសយានដ្ឋាននាំឡើងយន្តហោះត្រឡប់ទៅផ្ទះវិញ។ បន្ថែមពីលើនេះ នាងត្រូវចំណាយលុយ៦២០ដុល្លារអូស្ត្រាលី (ជាង៤៦៥ដុល្លារអាមេរិក) សម្រាប់ជើងហោះហើរត្រឡប់ទៅទីក្រុងស៊ីដនី។
Hill បានរៀបរាប់ថា មុនចេញដំណើរនាងត្រូវបង្ខំចិត្តរង់ចាំ៤ម៉ោងបន្ថែមទៀតដើម្បីទទួលវ៉ាលីរបស់ខ្លួនត្រឡប់មកវិញ ហើយនៅលើយន្តហោះបន្ថែម១១ម៉ោងក្នុងដំណើរវិលត្រឡប់ទៅផ្ទះវិញ។
ភ្នាក់ងារគយ និងការពារព្រំដែនអាមេរិក បានអះអាងប្រាប់សារព័ត៌មានអនឡាញអូស្ត្រាលី news.com.au ថា អាជ្ញាធរពិតជាបានរកឃើញថា Molly Joan Hill ពិតជាមានគម្រោងទៅរៀបការនៅទឹកដីសហរដ្ឋអាមេរិកពិតមែន ដោយនាងមិនមានទិដ្ឋាការគូដណ្តឹង K-1 Fiance Visa។
ទាក់ទងនឹងការលាលែងពីការងារ អ្នកស្រី Mini Sakissian ដែលជាអតីតថៅកែរបស់ Hill បានអះអាងប្រាប Herald Sun ថា វាជារឿងធម្មតានៅក្រុមហ៊ុនទៅហើយ។ គាត់រៀបរាប់ថា៖ «ខ្ញុំតែងតែធ្វើបែបនេះសម្រាប់បុគ្គលិកទាំងអស់ដែលសម្រាកវិស្សមកាលរយៈពេលយូរ។ ប្រសិនបើអ្នកសម្រាករហូតដល់ពី៦ ឬ៧សប្តាហ៍ អ្នកត្រូវតែលាឈប់ពីការងារ។ នេះជារឿងធម្មតា»។
ទីបំផុត លោក Ross បានទៅរកមិត្តស្រីរបស់ខ្លួននៅអូស្ត្រាលី។ សង្សាទាំងពីរបានជួបគ្នាវិញ ប៉ុន្តែគេមិនទាន់ដឹងថា Hill អាចមានឱកាសទៅធ្វើការនៅកន្លែងចាស់របស់ខ្លួនបានវិញ ឬយ៉ាងណានោះឡើយ ប៉ុន្តែចំណាយពេលរាប់សិបម៉ោងក្នុងដំណើរពីអូស្ត្រាលី ហើយរងការឃុំខ្លួនមួយយប់នៅហាវ៉ៃ៕
© រក្សាសិទ្ធិដោយ thmeythmey.com