ក្រសួងពាណិជ្ជកម្ម ដាក់ឲ្យប្រើប្រាស់ប្រព័ន្ធចុះបញ្ជីម៉ាកពាណិជ្ជកម្មតាមអនឡាញ

ជាតិ

សេដ្ឋកិច្ច

ក្រសួងពាណិជ្ជកម្ម ដាក់ឲ្យប្រើប្រាស់ប្រព័ន្ធចុះបញ្ជីម៉ាកពាណិជ្ជកម្មតាមអនឡាញ

25, May 2017 , 10:39 pm

រូបភាព

ចុះបញ្ជីម៉ាក (រូបពីក្រសួងពាណិជ្ចកម្ម)

ដោយ:

ភ្នំពេញ៖ ក្រសួងពាណិជ្ជកម្មបើកឲ្យមានការចុះបញ្ជីម៉ាកតាមប្រព័ន្ធអនឡាញជាផ្លូវការ ចាប់ពីថ្ងៃទី២៥ខែឧសភាតទៅ ដែលផ្ដល់ភាពងាយស្រួល និងផលប្រយោជន៍ទាំងម្ចាស់អាជីវកម្ម និងអ្នកប្រើប្រាស់ បានផ្ដល់ និងប្រើប្រាស់ផលិតផលមានអត្តសញ្ញាណត្រឹមត្រូវ។

រដ្ឋមន្ត្រីក្រសួងពាណិជ្ជកម្ម លោក ប៉ាន សូរសក្ដិ បានថ្លែងនៅក្នុងពិធីសម្ពោធនេះថា ប្រព័ន្ធថ្មីនេះ នឹងផ្ដល់ភាពងាយស្រួលជាងមុខ ដោយវាអាចកាត់បន្ថយពេលវេលា និងការចំណាយ ក្នុងការស្នើសុំចុះបញ្ជីម៉ាក និងសេវាផ្សេងៗពាក់ព័ន្ធនឹងម៉ាក ព្រមទាំងការគ្រប់គ្រងប្រព័ន្ធចុះបញ្ជីម៉ាក ប្រកបដោយប្រសិទ្ធភាព។

លោក ប៉ាន សូរសក្ដិ ឲ្យដឹងទៀតថា ការចុះបញ្ជីម៉ាកមិនត្រឹមតែជួយការពារផលប្រយោជន៍អាជីវកម្មប៉ុណ្ណោះទេ ប៉ុន្តែថែមទាំងផ្ដល់លទ្ធភាពដល់សហគ្រាសធុនតូច និងមធ្យម (SME) ពង្រីកសក្ដានុពលអាជីវកម្ម តាមរយៈការនាំចេញផលិតផលទៅកានទីផ្សារអន្តរជាតិ។

លោក Yoshiyuki Takagi ជំនួយការអគ្គនាយកផ្នែកហេដ្ឋារចនាសម្ព័ន្ធសកលនៃអង្គការកម្មសិទ្ធិបញ្ញាពិភពលោក បានថ្លែងថា សហគ្រាសនីមួយៗចង់បានទំនុកចិត្តពីអ្នកប្រើប្រាស់លើគុណភាពទំនិញរបស់ខ្លួន ហើយការកាពារបាននូវម៉ាកពាណិជ្ជកម្មរបស់សហគ្រាសនឹងបំពេញចំណុចនេះ។ លោកបន្តថា ក្នុងបរិបទសេដ្ឋកិច្ចទីផ្សារសេរី ដែលអ្នកប្រើប្រាស់មានជម្រើសច្រើនក្នុងការជ្រើសរើសមុខទំនិញ ឬសេវាណាមួយនោះ អ្នកប្រើប្រាស់ក៏អាចជួបបញ្ហាទំនិញដែលមានម៉ាកស្រដៀង ឬទំនិញក្លែងបន្លំម៉ាកផងដែរ។

លោកបន្ថែមថា ការចុះបញ្ជីម៉ាកនឹងធានាបាននូវភាពពិតប្រាកដនៃផលិតផលរបស់សហគ្រាសណាមួយដល់អ្នកប្រើប្រាស់។ ហើយទន្ទឹមនឹងបើកឲ្យមានប្រព័ន្ធចុះបញ្ជីម៉ាកតាមអនឡាញនេះ សាធារណជនក៏អាចស្វែងរកព័ត៌មានក្នុងវេបសៃយ៍របស់ស្ថាប័នមានសមត្ថកិច្ចចុះបញ្ជីម៉ាក ដើម្បីកំណត់ម៉ាកទំនិញណាមួយយ៉ាងពិតប្រាកដ។ លោកប្រាប់ទៀតថា ប្រព័ន្ធនេះក៏សម្រួលដល់មន្ត្រីមានសមត្ថកិច្ចក្នុងការបង្ក្រាបទំនិញក្លែងបន្លំម៉ាកផងដែរ។

ការកាពារម៉ាកនៅកម្ពុជាត្រូវបានធានាដោយច្បាប់ស្ដីពីម៉ាក ពាណិជ្ជនាម និងការប្រកួតប្រជែងមិនស្មោះត្រង់ឆ្នាំ២០០២ ។ ច្បាប់នេះបានឲ្យនិយមន័យពាក្យ«ម៉ាក»ថា គឺជាសញ្ញាដែលមើលឃើញ ហើយអាចសម្គាល់លក្ខណៈខុសគ្នានៃទំនិញ ឬសេវានៃសហគ្រាសនីមួយៗ។ ម៉ាកដែលប្រើប្រាស់សម្រាប់ទំនិញហៅថាពាណិជ្ជសញ្ញា ហើយម៉ាកដែលប្រើប្រាស់សម្រាប់សេវាហៅថាសេវាសញ្ញា។

ចាប់តាំងពីឆ្នាំ២០០២ មកដល់បច្ចុប្បន្ន ក្រសួងពាណិជ្ជកម្មបានចុះបញ្ជីម៉ាកប្រមាណ ៧ម៉ឺនម៉ាក។ ហើយការរៀបចំការចុះបញ្ជីម៉ាកតាមប្រព័ន្ធថ្មីនេះ គឺទទួលបានកិច្ចសហការបច្ចេកទេសពី អង្គការកម្មសិទ្ធបញ្ញាអន្តរជាតិ (WIPO) ។

ការចុះបញ្ជីម៉ាកតាមអនឡាញ ដែលស្ថិតក្រោមសមត្ថកិច្ចនាយកដ្ឋានកម្មសិទ្ធិបញ្ញានៃក្រសួងពាណិជ្ជកម្ម អាចធ្វើបានតាមរយៈ www.efiling.cambodiaip.gov.kh ៕