ជាតិ
គ.ជ.ប ប្រាប់ឲ្យពលរដ្ឋត្រៀមខ្លួន និងឯកសារដែលពាក់ព័ន្ធ ដើម្បីអាចបោះឆ្នោតបាន
× គណៈកម្មាធិការជាតិរៀបចំការបោះឆ្នោត (គ.ជ.ប) បានអំពាវនាវឲ្យប្រជាពលរដ្ឋដែលមានឈ្មោះក្នុងបញ្ជីបោះឆ្នោតថ្មី ត្រៀមខ្លួន និងត្រូវអត្តសញ្ញាណប័ណ្ណសញ្ជាតិខ្មែរ ឬឯកសារបញ្ជាក់អត្តសញ្ញាណបម្រើឲ្យការបោះឆ្នោត ដើម្បីឲ្យពួកគេ អាចបោះឆ្នោតបាននៅថ្ងៃទី៤ ខែមិថុនាខាងមុខ។ ការអំពាវនាវនេះ ធ្វើឡើងតាម រយៈ សេចក្តីជូនដំណឹងរបស់គ.ជ.ប ចុះថ្ងៃទី២៤ ខែឧសភា របស់ គ.ជ.ប។
ស្ថាប័នរៀបចំការបោះឆ្នោតដដែល ក៏បានរំលឹកដល់ ពលរដ្ឋដែលបានប្រើឯកសារបញ្ជាក់អត្តសញ្ញាណ ក្នុងពេលចុះឈ្មោះក្នុងបញ្ជីឈ្មោះបោះឆ្នោតឆ្នាំ២០១៦ ហើយពុំទាន់មានអត្តសញ្ញាណប័ណ្ណសញ្ជាតិខ្មែរ និងពលរដ្ឋដែលខូច ឬបាត់ ឬដាក់បញ្ចាំ អត្តសញ្ញាណប័ណ្ណ ត្រូវរួសរាន់ទៅសុំឯកសារបញ្ជាក់អត្តសញ្ញាណបម្រើឲ្យការបោះឆ្នោត ពីគណៈកម្មការឃុំ សង្កាត់រៀបចំការបោះឆ្នោត និងអាជ្ញាធរឃុំ សង្កាត់ដែលខ្លួនត្រូវបោះឆ្នោត។
បើតាមសេចក្តីជូនដំណឹងដដែល ការចេញឯកសារបញ្ជាក់អត្តសញ្ញាណបម្រើឲ្យការបោះឆ្នោតដោយឥតគិតថ្លៃនេះ នឹងបិទបញ្ចប់នៅម៉ោង ៥ កន្លះល្ងាច ថ្ងៃទី២ ខែមិថុនា។
ជាមួយគ្នានេះ គ.ជ.ប ក៏អំពាវនាដល់ប្រធានគណៈកម្មការឃុំ សង្កាត់ រៀបចំការបោះឆ្នោត មេឃុំ ចៅសង្កាត់ មេភូមិ ត្រូវផ្សព្វផ្សាយបញ្ហានេះឲ្យទូលាយ និងជំរុញឲ្យពលរដ្ឋទៅសុំឯកសារបញ្ជាក់អត្តសញ្ញាណបម្រើឲ្យការបោះឆ្នោត ឲ្យទាន់ពេលវេលា។
គ.ជ.ប បានគូសបញ្ជាក់ជាថ្មីថា ពលរដ្ឋដែលមានឈ្មោះក្នុងបញ្ជីបោះឆ្នោត ប៉ុន្តែគ្មានអត្តសញ្ញាណប័ណ្ណ ឬឯកសារបញ្ជាក់អត្តសញ្ញាណបម្រើឲ្យការបោះឆ្នោត មិនអាចបោះឆ្នោតបានឡើយនៅថ្ងៃទី៤ ខែមិថុនាខាងមុខ។
ទន្ទឹមនឹងនេះដែរ នៅក្នុងសេចក្តីជូនដំណឹងដាច់ដោយឡែកមួយទៀត ចេញផ្សាយនៅថ្ងៃទី២៤ ខែឧសភាដែរនោះ គ.ជ.ប បានអំពាវនាវដល់គ្រឹះស្ថានធនាគារ និងហិរញ្ញវត្ថុ និងប្រតិបត្តិករឥណទានជនបទទាំងអស់ ឈប់ទទួលយកអត្តសញ្ញាណប័ណ្ណសញ្ជាតិខ្មែរ សម្រាប់ការធានាលើការផ្តល់ឥណទាន។ គ.ជ.ប បានជំរុញឲ្យគ្រឹះស្ថានធនាគារ និងហិរញ្ញវត្ថុ និងប្រតិបត្តិករឥណទានជនបទទាំងនោះ ប្រគល់អត្តសញ្ញាណប័ណ្ណជូនពលរដ្ឋវិញ ដើម្បីប្រើប្រាស់នៅថ្ងៃបោះឆ្នោតខាងមុខ។
ទាក់ទងនឹងករណីនេះដែរ នៅថ្ងៃទី ២២ ខែឧសភា កន្លងទៅ ធនាគារជាតិបានព្រមានដកអាជ្ញាប័ណ្ណគ្រឹះស្ថានហិរញ្ញវត្ថុ ដែលយកអត្តសញ្ញាណប័ណ្ណ និងសៀវភៅគ្រួសារពីពលរដ្ឋ ជាថ្នូរនឹងការផ្ដល់ប្រាក់កម្ចីនេះ៕
Tag:
អត្តសញ្ញាណប័ណ្ណ
បោះឆ្នោត
គ.ជ.ប
© រក្សាសិទ្ធិដោយ thmeythmey.com