កីឡាអន្តរជាតិ
អន្តរជាតិ
ការប្រកួតវគ្គផ្តាច់ព្រ័ត្រ FA Cup អាចជាការដឹកនាំចុងក្រោយរបស់ Wenger នៅ Arsenal?
× លោក Arsene Wenger មិនទាន់ប្រាកដពីអនាគតរបស់លោក នៅក្រោយការប្រកួតវគ្គផ្តាច់ព្រ័ត្រពានរង្វាន់ FA Cup ថាជាការប្រកួតចុងក្រោយក្នុងនាមជាអ្នកចាត់ការទូទៅក្រុម Arsenal ឬយ៉ាងណានោះទេ។
ក្រុមកាំភ្លើងធំ Arsenal នៅមានភារកិច្ចសំខាន់មួយប្រកួតទៀតជាមួយតោខៀវ Chelsea នាការប្រកួតដណ្តើមពាន FA Cup ដែលជាពានលំដាប់ទី២ បន្ទាប់ពី Premier League នាថ្ងៃសៅរ៍ទី២៧ នេះ នៅកីឡដ្ឋាន Wembley វេលាម៉ោង១១:៣០នាទី [ម៉ោងនៅកម្ពុជា]។ បណ្តាញព័ត៌មានជាច្រើនបានដាក់សម្ពាធថា នេះអាចជាការប្រកួតលើកចុងក្រោយរបស់អ្នកចាត់ការទូទៅសញ្ជាតិបារាំង វ័យ៦៧ឆ្នាំ ប្រសិនបើមិនអាចជួយ Arsenal លើកពាន FA Cup បានទេ ខណៈដែលអ្នកគាំទ្រក៏កំពុងទាមទារឲ្យរូបលោកចាកចេញផងដែរនោះ។
សម្រាប់ការដឹកនាំរបស់ Wenger នៅរដូវកាលនេះ Arsenal មិនទាន់ស្គាល់ពានណាមួយនៅឡើយទេ និងថែមទាំងមិនមានកៅអីនៅ UEFA Champion League នារដូវកាលក្រោយទៀតផង ក្រោយបញ្ចប់ទៅក្នុងចំណាត់ថ្នាក់ទី៥នៃតារាង Premier League។
Wenger បានចូលមកដឹកនាំក្រុមដែលមានមូលដ្ឋាននៅទីក្រុងឡុងដ៍នេះ អស់រយៈពេល២១ឆ្នាំមកហើយ ពោលគឺចាប់តាំងពីលោកបានចាកចេញពីក្រុមក្នុងលីកកំពូលជប៉ុន Nagoya Grampus Eight កាលពីឆ្នាំ១៩៩៦។
អតីតអ្នកចាត់ការក្រុម Monaco និងNancy រូបនេះ បានជួយឲ្យក្រុមដែលមានរហស្សនាមកាំភ្លើងធំឈ្នះជើងឯក Premier League ៣ដង និងពាន FA Cup ៦ដង៕
© រក្សាសិទ្ធិដោយ thmeythmey.com