ជាតិ
ក្នុងខែឧសភា ពលករខ្មែរ ៨១នាក់ ដែលរងគ្រោះនៅបរទេស ត្រូវបានបញ្ជូនមកកម្ពុជាវិញ
× ភ្នំពេញ៖ ដោយគិតពីថ្ងៃទី១ ដល់ថ្ងៃទី២៧ ខែឧសភា ឆ្នាំ២០១៧ ពលករ-ពលការិនីខ្មែរ ចំនួន៨១ នាក់ ដែលរងគ្រោះនៅតាមបណ្តាប្រទេសផ្សេងៗ ត្រូវបានក្រសួងការបរទេស និងសហប្រតិបត្តិការអន្តរជាតិ ជួយសង្គ្រោះ និងរៀបចំបញ្ជូនមកកម្ពុជាវិញ។ នេះបើតាម ការបូកបញ្ចូលគ្នានូវតួលេខនីមួយៗ ក្នុងសេចក្តីប្រកាសព័ត៌មានចំនួន ១២ ដែលក្រសួងការបរទេសនិងសហប្រតិបត្តិការអន្តរជាតិ បានចេញផ្សាយជាបន្តបន្ទាប់រយៈពេលជិត ១ខែកន្លងមក។
សេចក្តីប្រកាសរបស់ក្រសួងការបរទេស បានឲ្យដឹងថា ពលករ-ពលការិនីទាំង៨១នាក់ ដែលទទួលបានការជួយជ្រោមជ្រែងឲ្យមកកម្ពុជាវិញនោះ ត្រូវបានក្រសួង និងស្ថានទូតខ្មែរ ធ្វើអន្តរាគមន៍ពីប្រទេសចំនួន៣ ដោយក្នុងនោះរួមមាន ម៉ាឡេស៊ី ២៥នាក់, ថៃ ៥៣នាក់ និងវៀតណាម ៣នាក់។
បើផ្អែកលើសេចក្តីប្រកាសនោះ មុខរបរ ដែលពលករ-ពលករិនី ទទួលបានពេលទៅដល់បរទេស មានដូចជា ការងារតាមផ្ទះ តាមភោជនីយដ្ឋាន អ្នកបោសសំអាត និងអ្នកជៀរជ័រកៅស៊ូជាដើម។ សេចក្តីប្រកាសដដែល បានដឹងទៀតថា ក្នុងអំឡុងនៃការបម្រើការងារ ពលករ-ពលការិនីខ្មែរខាងលើ បានជួបការលំបាក និងរងគ្រោះដោយសារតែការធ្វើបាប ពីសំណាក់ថៅកែ និងនិយោជក។
ក្នុងចំណោមពលករ-ពលការិនីទាំងនោះ អ្នកខ្លះ មានលិខិតឆ្លងដែននិងទិដ្ឋាការត្រឹមត្រូវ ប៉ុន្តែ អ្នកខ្លះទៀត បានទៅរស់នៅនិងធ្វើការនៅបរទេស ដោយខុសច្បាប់តែម្តង។ ដោយឡែក ពលរដ្ឋខ្មែរមួយចំនួនទៀត បានលួចឆ្លងដែនខុសច្បាប់ចូលប្រទេសថៃ ដើម្បីកាប់ឈើគ្រញូង។ នេះបើយោងតាមប្រភពខាងលើដដែល។
កន្លងមក ជុំវិញបញ្ហាចំណាកស្រុករបស់ពលករនេះ ក្រសួងការបរទេសនិងសហប្រតិបត្តិការ បានអំពាវនាវម្តងហើយម្តងទៀតដល់ប្រជាពលរដ្ឋខ្មែរគ្រប់រូប ជាពិសេសស្ត្រីដែលងាយរងគ្រោះ គួរស្វែងរកការងារដែលមានស្រាប់ក្នុងស្រុក ជាជាងការចំណាកស្រុកទៅធ្វើការនៅប្រទេសក្រៅ ដើម្បីចៀសវាង ការឃ្លាតឆ្ងាយពីក្រុមគ្រួសារនិងអាចជួបគ្រោះដោយការចាញ់បោកមេខ្យល់ ឬក្រុមហ៊ុន។
សូមរម្លឹកថា ពលករ-ពលការិនីខ្មែរ ជិត១ពាន់នាក់ ដែលរងគ្រោះនៅតាមបណ្តាប្រទេសផ្សេងៗ ត្រូវបានក្រសួងការបរទេស និងសហប្រតិបត្តិការអន្តរជាតិ ជួយសង្គ្រោះ និងរៀបចំបញ្ជូនមកកម្ពុជាវិញ ក្នុងឆ្នាំ ២០១៦។ ចំណែកឯ កាលពីឆ្នាំ២០១៥ អាជ្ញាធរកម្ពុជា បានជួយសង្គ្រោះពលករ-ពលការិនី ប្រមាណ៦០០នាក់ ឲ្យបានវិលមកកម្ពុជាវិញ៕
© រក្សាសិទ្ធិដោយ thmeythmey.com