ជាតិ
អាជ្ញាធររកឃើញថា អ្នកមានសិទ្ធិបោះឆ្នោត៤ម៉ឺននាក់កំពុងទុកអត្តសញ្ញាណបណ្ណនៅកន្លែងបញ្ចាំ
× ភ្នំពេញ៖ ខណៈការបោះឆ្នោតថ្នាក់ឃុំ-សង្កាត់ កាន់តែខិតជិតមកដល់ ប្រជាពលរដ្ឋប្រមាណជា ៤ម៉ឺនាក់ ដែលបានចុះឈ្មោះបោះឆ្នោត បានយកអត្តសញ្ញាណបណ្ណ ទៅប្រគល់ឲ្យធនាគារ និងគ្រឹះស្ថានហិរញ្ញវត្ថុនានា ដើម្បីធ្វើជាវត្ថុបញ្ចាំក្នុងការខ្ចីប្រាក់។ នេះជាការអះអាងរបស់លោក ហង្ស ពុទ្ធា អ្នកនាំពាក្យគណៈកម្មាធិការជាតិរៀបចំការបោះឆ្នោត (គ.ជ.ប)។
លោក ហង្ស ពុទ្ធា បានប្រាប់សារព័ត៌មានថ្មីៗថា ក្នុងចំណោមប្រជាពលរដ្ឋប្រមាណ ៤ម៉ឺននាក់ អ្នកខ្លះបានទទួលអត្តសញ្ញាណប័ណ្ណពីធនាគារឬគ្រឹះស្ថានហិរញ្ញវត្ថុវិញហើយ។ យ៉ាងណាលោក មិនបានបញ្ជាក់ពីចំនួនប្រជាពលរដ្ឋ ដែលបានទទួលអត្តសញ្ញាណបណ្ណពីធនាគារឬគ្រឹះស្ថានហិរញ្ញវត្ថុ ឡើយ។
អ្នកនាំពាក្យគ.ជ.ប រូបនេះ និយាយយ៉ាងដូច្នេះ៖«គ.ជ.ប មិនមានចំណាត់ការ ទៅទារអត្តសញ្ញាណប័ណ្ណពីធនាគារឬក៏គ្រឹះស្ថានហិរញ្ញវត្ថុ ឲ្យប្រជាពលរដ្ឋវិញទេ។ នេះ ជាសមត្ថកិច្ចរបស់ក្រសួងមហាផ្ទៃ។ ទាល់តែសួរទៅខាងក្រសួងមហាផ្ទៃទើបដឹង។ តែគ.ជ.ប បានណែនាំឲ្យប្រជាពលរដ្ឋ ប្រញាប់ទៅធ្វើឯកសារបញ្ជាក់អត្តសញ្ញាណបម្រើឲ្យការបោះឆ្នោត ក្នុងករណីមិនមានអត្តសញ្ញាណបណ្ណ»។
កាលពីកន្លងទៅ គណបក្សសង្គ្រោះជាតិ បានសុំឲ្យគ.ជ.ប ស្នើទៅធនាគារនិងគ្រឹះស្ថានហិរញ្ញវត្ថុ កុំឲ្យយកអត្តសញ្ញាណប័ណ្ណពីប្រជាពលរដ្ឋ ធ្វើជាវត្ថុសម្រាប់បញ្ចាំ។ ម្យ៉ាងទៀត គណបក្សសង្គ្រោះជាតិ ក៏សុំគ.ជ.ប ធ្វើយ៉ាងណាឲ្យធនាគារនិងគ្រឹះស្ថានហិរញ្ញវត្ថុ ប្រគល់អត្តសញ្ញាណប័ណ្ណ ទៅឲ្យប្រជាពលរដ្ឋវិញ ដើម្បីយកទៅបោះឆ្នោត។ ក្រោយមក គ.ជ.ប ក៏បានសេចក្តីអំពាវនាវ ទៅដល់ធនាគារនិងគ្រឹះស្ថានហិរញ្ញវត្ថុ ទាក់ទង់នឹងការស្នើសុំរបស់គណបក្សសង្គ្រោះជាតិខាងលើ។
សូមបញ្ជាក់ថា អត្តសញ្ញាណបណ្ណ គឺជាឯកសារគោល សម្រាប់បម្រើឲ្យការបោះឆ្នោត។ ក្នុងករណីមិនមានឬបាត់អត្តសញ្ញាណបណ្ណ ប្រជាពលរដ្ឋ អាចទៅជួបគណៈកម្មការឃុំ-សង្កាត់រៀបចំការបោះឆ្នោត និងមេឃុំឬចៅសង្កាត់ ដើម្បីសុំធ្វើឯកសារបញ្ជាក់អត្តសញ្ញាណបម្រើឲ្យការបោះឆ្នោត ។ ការបោះឆ្នោតជ្រើរើសក្រុមប្រឹក្សាឃុំ-សង្កាត់ នាអាណត្តិទី៤ នឹងប្រព្រឹត្តទៅនៅថ្ងៃទី៤ ខែមិថុនា ឆ្នាំ២០១៧៕
Tag:
បោះឆ្នោតឃុំ-សង្កាត់
អត្តសញ្ញាណប័ណ្ណ
© រក្សាសិទ្ធិដោយ thmeythmey.com