ជាតិ
ឃោសនា១៤ថ្ងៃ មានបណ្ដឹង៧៩ តែ គ.ជ.ប វាយតម្លៃថា ដំណើរការបោះឆ្នោតល្អច្រើនជាងអាណត្តិមុន
× ភ្នំពេញ៖ គណៈកម្មាធិការជាតិរៀបចំការបោះឆ្នោត (គ.ជ.ប) បានទទួលពាក្យបណ្ដឹងចំនួន៧៩ ពីគណបក្សនយោបាយ ក្នុងយុទ្ធនាការបោះឆ្នោតឃុំ-សង្កាត់ រយៈពេល១៣ថ្ងៃនេះ។ តែគជប វាយតម្លៃ ដំណើរការបោះឆ្នោតល្អជាងអាណត្តិមុន ដោយសារតែអ្នកនយោបាយ និងអ្នកគាំទ្រ មានភាពចាស់ទុំច្រើន។
សមាជិកគ.ជ.ប លោកស្រី តែ ម៉ានីរុង បានឲ្យដឹងថា ពាក្យបណ្ដឹងភាគច្រើនប្ដឹងដោយគណបក្សប្រជាជនចំនួន៥៣បណ្ដឹង គណបក្សសង្គ្រោះជាតិ ២១ បណ្ដឹង គណបក្សហ្វ៊ុនស៊ីនប៉ិច១បណ្ដឹង និងពីពលរដ្ឋ ៥ បណ្ដឹង។ បើតាមលោកស្រី ម៉ានីរុង ដើមចមនៃការប្ដឹងផ្ដល់គ្នានេះ ដោយសារតែការប្រើប្រាស់ពាក្យសម្ដីរិះគន់ធ្ងន់ៗ ជេប្រមាថ បន្តុះបង្អាប់គ្នាទៅវិញទៅមករវាងបេក្ខជនគណបក្សនយោបាយ នៅពេលឃោសនា។
ប៉ុន្តែបណ្ដឹងខ្លះ ក៏មានលក្ខណៈមិនសមស្របតាមលក្ខខណ្ឌរបស់ គ.ជ.ប ដែរ។ នេះជាការពន្យល់របស់លោក ម៉ានីរ៉ុង ដែលបានបន្ថែមថា បណ្ដឹងមួយចំនួន ត្រូវបាន គ.ជ.ប ដោះស្រាយបណ្ដើរៗហើយ ។ ចំណែកបណ្ដឹងដែលនៅសល់ គ.ជ.ប នឹងដោះស្រាយបន្តក្រោយបោះឆ្នោតឃុំ-សង្កាត់រួច។
តែយ៉ាងណាសមាជិកគ.ជ.បរូបនេះ នៅតែវាយតម្លៃថា ដំណើការឃោសនាបោះឆ្នោតឃុំ-សង្កាត់ អាណត្តិទី៤នេះ មានភាពល្អប្រសើច្រើនជាងឆ្នាំមុន ត្រង់ថា គ.ជ.ប ទទួលបានពាក្យបណ្ដឹងតិច ហើយភាគច្រើនអាចដោះស្រាយបានតាមនីតិវិធី។ អ្វីដែល គ.ជ.ប មើលឃើញពីដំណើរការល្អប្រសើរនៃការឃោសនាបោះឆ្នោតនោះ គឺភាពចាស់ទុំរបស់អ្នកនយោបាយ និងអ្នកគាំទ្រ ដែលមានការអត់ឱន និងចេះអធ្យាស្រ័យគ្នាច្រើនជាមុន។
ក្នុងយុទ្ធនាការឃោសនាបោះឆ្នោតនេះ គ.ជ.ប បានសង្តេតឃើញថា គណបក្សប្រជាជនកម្ពុជា និងគណបក្សសង្គ្រោះជាតិ ដង្ហែក្បួនឃោសនាទ្រង់ទ្រាយធំ ទូទាំង២៥ រាជធានី-ខេត្ត ជារៀងរាល់ថ្ងៃ ខណៈដែលគណបក្សចំនួន១០ទៀត បានត្រឹមតែហែក្បួនឃោសនានៅក្នុងឃុំ-សង្កាត់ ដែលពួកគេដាក់បេក្ខជនឈរឈ្មោះប៉ុណ្ណោះ។ ក្រៅពីហែក្បួនឃោសនានេះ គណបក្សទាំង១២នេះ ក៏មានសកម្មភាពចុះចែកខិតបណ្ណ មួក អាវយឺត បដា ពាក្យស្លោក ស្លាកសញ្ញាគណបក្សតាមផ្ទះ និងចាក់មេក្រូផ្សព្វផ្សាយពីគោលនយោបាយគណបក្សតាមភូមិផងដែរ។
សូមបញ្ជាក់ថា ការបោះឆ្នោតជ្រើសរើសក្រុមប្រឹក្សាឃុំ-សង្កាត់ នាអាណត្តិទី៤ នឹងប្រព្រឹត្តទៅនៅថ្ងៃទី៤ ខែមិថុនា ឆ្នាំ២០១៧ ដោយមានគណបក្សនយោបាយចំនួន ១២ ចូលរួមប្រកួតប្រជែងដណ្តើមបេក្ខភាព នៅក្នុងឃុំ-សង្កាត់ចំនួន ១,៦៤៦ ទូទាំង ២៥រាជធានី-ខេត្ត៕
Tag:
គ.ជ.ប
បោះឆ្នោតឃុំសង្កាត់
© រក្សាសិទ្ធិដោយ thmeythmey.com