ជាតិ
ក្រៅផ្លូវការ៖ ហ៊្វុនស៊ិនប៉ិច មិនទទួលបានអាសនៈមេឃុំ ចៅសង្កាត់
× លទ្ធផលក្រៅផ្លូវការ គណបក្សរាជានិយមហ្វ៊ុនស៊ិនប៉ិច ដែលដឹកនាំដោយសម្តេចក្រុមព្រះ នរោត្តម រណឫទ្ធិ មិនទទួលបានអាសនៈមេឃុំ ឬចៅសង្កាត់ សោះឡើយ នៅក្នុងការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី ៤ នេះ។
លោក ញ៉េប ប៊ុនជិន អនុប្រធានគណបក្សហ្វ៊ុនស៊ិនប៉ិច ជាអ្នកប្រាប់សារព័ត៌មានថ្មីៗ នូវលទ្ធផលក្រៅផ្លូវការដែលបក្សលោកទទួលបានថា គណបក្សហ្វ៊ុនស៊ិនប៉ិចមិនទទួលជ័យជម្នះលើអាសនៈមេឃុំ និងចៅសង្កាត់ទេ។ យ៉ាងណា លោក ប៊ុនជិន បញ្ជាក់ថា ទោះបីមិនបានឈ្នះអាសនៈមេឃុំ ឬចៅសង្កាត់ គណបក្សនេះ ឈ្នះបានអាសនៈក្រុមប្រឹក្សាប្រមាណ ២០ ដែរ។
សូមបញ្ជាក់ថា ការបោះឆ្នោតជ្រើសក្រុមប្រឹក្សាឃុំ សង្កាត់ កាលពីឆ្នាំ ២០១២ គណបក្សរាជានិយមមួយនេះ ដែលពេលនោះដឹកនាំដោយលោក ញឹក ប៊ុនឆៃ ទទួលបានជ័យជម្នះអាសនៈមេឃុំចំនួន ១ និងអាសនៈក្រុមប្រឹក្សាចំនួន ១៥១ នៅទូទាំងប្រទេស។
ចំណែកគណបក្ស នរោត្តម រណឫទ្ធិ ដែលមានសម្តេចក្រុមព្រះជាប្រធាន នៅក្នុងការបោះឆ្នោតកាលពីឆ្នាំ ២០១២ បក្សនេះមិនទទួលបានអាសនៈមេឃុំ និងចៅសង្កាត់នោះទេ ដោយទទួលបានអាសនៈក្រុមប្រឹក្សាចំនួន ៥២ ។
នៅក្នុងការបោះឆ្នោតជ្រើសរើសក្រុមប្រឹក្សាអាណត្តិនេះ គណបក្សហ៊្វុនស៊ិនប៉ិច ដាក់បេក្ខជនឈរឈ្មោះចំនួន ៨៦៦ ឃុំ សង្កាត់ នៅទូទាំងប្រទេស។ © រក្សាសិទ្ធិដោយ thmeythmey.com