ជាតិ
អតីតប្រធាន និងប្រធានCNRP ត្រេកអរនឹងលទ្ធផល និងរំពឹងឈ្នះឆ្នាំ ២០១៨ រូបឯកឧត្តម កឹម សុខា និងលោក សម រង្ស៊ី នៅទីលានប្រជាធិបតេយ្យកាលពីឆ្នាំ ២០១៣
× អតីតប្រធានគណបក្សសង្គ្រោះជាតិលោក សម រង្ស៊ី ទំនងពេញចិត្តនឹងលទ្ធផលក្រៅផ្លវការដែលគណបក្សសង្គ្រោះជាតិទទួលបានក្នុងការបោះឆ្នោតឃុំសង្កាត់អាណត្តិនេះ។ លោក សម រង្ស៊ី មានសុទិដ្ឋិនយមដូចឯកឧត្តម កឹម សុខា ថា លទ្ធផលនេះ បង្ហាញថា គណបក្សសង្គ្រោះជាតិនឹងឈ្នះឆ្នោតជ្រើសតាំងតំណាងរាស្ត្រខាងមុខ។
Twitter ជាបណ្តាញសង្គមដែលលោកអតីតប្រធានគណបក្សសង្គ្រោះជាតិ សម រង្ស៊ី បង្ហាញពីការយល់ឃើញរបស់លោកជុំវិញលទ្ធផលក្រៅផ្លូវការនៃការបោះឆ្នោតជ្រើសរើសក្រុមប្រឹក្សាឃុំ សង្កាត់។ លោក សម រង្ស៊ី លើកឡើងថា ការបោះឆ្នោតឃុំ សង្កាត់ អាណត្តិនេះ សំឡេងគាំទ្រគណបក្សសង្គ្រោះជាតិប្រមាណ ៤៦ ភាគរយ ដែលជាសញ្ញាសម្រាប់ឈ្នះឆ្នោតនៅ ឆ្នាំ ២០១៨។ លោក បញ្ជាក់តាមTwitter របស់លោកយ៉ាងនេះថា៖«លទ្ធផលទាំងនេះ គឺជាមូលដ្ឋានដ៏រឹងមាំ សម្រាប់ CNRP ទទួលជ័យជម្នះនៅក្នុងការបោះឆ្នោតជ្រើសតាំងតំណាងរាស្ត្រនៅខែ កក្កដា ឆ្នាំ ២០១៨ ខាងមុខ»។
ជាមួយគ្នានេះ ប្រធានគណបក្សសង្គ្រោះជាតិឯកឧត្តម កឹម សុខា អះអាងនូវលទ្ធផលក្រៅផ្លូវការដែលគណបក្សលោកទទួលបានថា គណបក្សសង្គ្រោះជាតិ ដណ្តើមតំណែងជាមេឃុំ ចៅសង្កាត់ប្រមាណជិត ៥០០ ឃុំសង្កាត់ និងសមាជិកក្រុមប្រឹក្សាឃុំ-សង្កាត់ ចំនួនជិតពាក់កណ្តាលនៃចំនួនក្រុមប្រឹក្សាឃុំ-សងកាត់ទូទាំងប្រទេស។ តាមរយៈលិខិតនៅថ្ងៃទី ៥ ខែមិថុនា ឯកឧត្តម កឹម សុខា បន្ថែមដូច្នេះថា៖«យើងដណ្តើមបានពីបក្សកាន់អំណាច យ៉ាងច្រើនសន្ធឹកសន្ធាប់នេះ សបញ្ជាក់ឲ្យឃើញថា គណបក្សសង្គ្រោះជាតិ ទទួលបានជោគជ័យមួយជំហានធំទៀតហើយ ក្នុងការដណ្តើមយកជ័យជម្នះក្នុងការគ្រប់គ្រងដឹកនាំឃុំ សង្កាត់»។
ឯកឧត្តម កឹម សុខា មានសុទិដ្ឋិស្រដៀងលោក សម រង្ស៊ី ជុំវិញការបោះឆ្នោត ឆ្នាំ ២០១៨ បែបនេះថា៖«លទ្ធផលនេះផងដែរ គឺជាមូលដ្ឋាន ដែលអាចបញ្ជាក់ថា យើងនឹងទទួលបានជ័យជម្នះមួយជំហានទៀត ក្នុងការជ្រើសសមាជិករដ្ឋសភា ឆ្នាំ ២០១៨ និងដើម្បីឈានទៅដឹកនាំប្រទេសនាពេលឆាប់ៗខាងមុខនេះ»។
សហសេវិកលោកសម រង្ស៊ី រូបនេះ ពន្យល់ថា មូលហេតុដែលឯកឧត្តម រំពឹងថា គណបក្សសង្គ្រោះជាតិនឹងឈ្នះឆ្នោតនៅឆ្នាំ ២០១៨ ដោយសារផ្អែកលើលទ្ធផលនៃការបោះឆ្នោតកន្លងមក។ « បទពិសោធន៍កន្លងមក ការបោះឆ្នោតជ្រើសតាំងតំណាងរាស្ត្រ គណបក្សប្រឆាំងតែងបានសំឡេងគាំទ្រលើស ១៥ ភាគរយនៃចំនួនពេលបោះឆ្នោតឃុំ សង្កាត់»។ ឯកឧត្តម កឹម សុខា បញ្ជាក់យ៉ាងនេះ ក៏អំពាវនាវឲ្យប្រជាពលរដ្ឋខ្មែរ ជាពិសេសអ្នកគាំទ្រគណបក្សសង្គ្រោះជាតិ បន្តចូលរួមជាមួយគណបក្ស ដើម្បីឆ្ពោះទៅរកជ័យជម្នះនៅឆ្នាំ ២០១៨ ៕
Tag:
កឹម សុខា
សម រង្ស៊ី
បោះឆ្នោតឃុំ សង្កាត់
© រក្សាសិទ្ធិដោយ thmeythmey.com